നിങ്ങളുടേത് എസ്ബിഐ എടിഎം കാർഡാണോ? ഒരു മാസം എത്ര രൂപ പിൻവലിക്കാം, പുതിയ നിയമം ഇങ്ങനെ

രാജ്യത്തെ ഏറ്റവും വലിയ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) ഡെബിറ്റ് കാർഡ് ഉടമകൾക്ക് എടിഎമ്മുകളിൽ നിന്ന് സൗജന്യമായി പണം പിൻവലിക്കുന്നതിന് പരിധി നിശ്ചയിച്ചിട്ടുണ്ട്. വിവിധ കാർഡുകളനുസരിച്ച് സൗജന്യ ഇടപാടുകളുടെ എണ്ണത്തിലും വ്യത്യാസമുണ്ട്. കഴിഞ്ഞ വർഷം നവംബറിൽ ക്ലാസിക്, മാസ്ട്രോ ഡെബിറ്റ് കാർഡുകൾക്കുള്ള പണം പിൻവലിക്കൽ പരിധി പകുതിയായി ബാങ്ക് കുറച്ചിരുന്നു. ഒക്ടോബർ 1 മുതൽ പ്രാബല്യത്തിൽ വന്ന എസ്‌ബി‌ഐ ഡെബിറ്റ് കാർഡുകൾക്ക് ബാധകമായ ചില എടിഎം പണം പിൻവലിക്കൽ പരിധികൾ ഇതാ..

എസ്‌ബി‌ഐ ക്ലാസിക്, മാസ്ട്രോ ഡെബിറ്റ് കാർഡുകൾ

ബാങ്ക് നൽകുന്ന ഏറ്റവും ജനപ്രിയ എടിഎം-കം-ഡെബിറ്റ് കാർഡാണിത്. ഈ കാർഡ് ഉപയോ​ഗിച്ചുള്ള കുറഞ്ഞ എടിഎം പിൻവലിക്കൽ പരിധി 100 രൂപയും പരമാവധി പരിധി 20,000 രൂപയുമാണ്.

എസ്‌ബി‌ഐ ഗ്ലോബൽ ഇന്റർനാഷണൽ ഡെബിറ്റ് കാർഡ്

എസ്‌ബി‌ഐ ഗ്ലോബൽ ഇന്റർനാഷണൽ ഡെബിറ്റ് കാർഡ് ഉപയോഗിച്ച് നിങ്ങൾക്ക് ആവശ്യമുള്ളപ്പോഴെല്ലാം നിങ്ങളുടെ അക്കൗണ്ട് വഴി ഇടപാടുകൾ നടത്താം. ഏറ്റവും കുറഞ്ഞ എടിഎം പിൻവലിക്കൽ പരിധി 100 രൂപയും പരമാവധി പരിധി 40,000 രൂപയുമാണ്.

എസ്‌ബി‌ഐ ഗോൾഡ് ഇന്റർനാഷണൽ ഡെബിറ്റ് കാർഡ്

എസ്‌ബി‌ഐ ഗോൾഡ് ഇന്റർനാഷണൽ ഡെബിറ്റ് കാർഡ് വ്യാപാര സ്ഥാപനങ്ങളിൽ സാധനങ്ങൾ വാങ്ങുന്നതിനും ഓൺ‌ലൈനായി പണമടയ്ക്കുന്നതിനും ഇന്ത്യയിലും ലോകമെമ്പാടും പണം പിൻവലിക്കുന്നതിനും ഉപയോഗിക്കാവുന്നതാണ്. ഏറ്റവും കുറഞ്ഞ എടിഎം പിൻവലിക്കൽ പരിധി 100 രൂപയും പരമാവധി പരിധി 50,000 രൂപയുമാണ്.

എസ്‌ബി‌ഐ പ്ലാറ്റിനം ഇന്റർനാഷണൽ ഡെബിറ്റ് കാർഡ്

എസ്‌ബി‌ഐ പ്ലാറ്റിനം ഇന്റർനാഷണൽ ഡെബിറ്റ് കാർഡ് ഉപയോഗിച്ചും നിങ്ങൾക്ക് ഓൺലൈനായി പണമടയ്ക്കാനും ഇന്ത്യയിലും ലോകമെമ്പാടും പണം പിൻവലിക്കാനും കഴിയും. കുറഞ്ഞ എടിഎം പിൻവലിക്കൽ പരിധി 100 രൂപയും പരമാവധി പരിധി ഒരു ലക്ഷം രൂപയുമാണ്.

യോനോ ആപ്പ്

ഡെബിറ്റ് കാർഡ് തട്ടിപ്പുകൾ വ്യാപകമായതിനാൽ ഡെബിറ്റ് കാർഡ് ഇല്ലാതെ ബാങ്കിന്റെ തിരഞ്ഞെടുത്ത എടിഎമ്മുകളിൽ നിന്ന് പണം പിൻവലിക്കാൻ അനുവദിക്കുന്ന എസ്‌ബി‌ഐയുടെ ആപ്ലിക്കേഷനാണ് യോനോ ആപ്പ്. എസ്‌ബി‌ഐയുടെ ഡിജിറ്റൽ ബാങ്കിംഗ് പ്ലാറ്റ്‌ഫോമാണ് യോനോ. ഉപയോക്താക്കൾക്ക് അവരുടെ സ്മാർട്ട്‌ഫോണുകളിൽ ഡിജിറ്റൽ ഇടപാടുകളും പേയ്‌മെന്റുകളും നടത്താൻ ഇത് ഉപയോഗിക്കാം.

malayalam.goodreturns.in