2 വർഷത്തേക്ക് 8% പലിശ നിരക്കിൽ സ്ഥിര നിക്ഷേപമിടാൻ 4 ബാങ്കുകൾ; ശ്രദ്ധിക്കാൻ 4 കാര്യങ്ങളും

വർധിച്ചുവരുന്ന പലിശനനിരക്കുകൾക്ക് നന്ദി പറയുകയാണ് സ്ഥിര നിക്ഷേപകർ. റിസർവ് ബാങ്ക് തുടർച്ചയായി റിപ്പോ നിരക്കുയർത്താൻ തുടങ്ങിയതോടെ നിക്ഷേപ പലിശ നിരക്ക് ഉയർന്നു തുടങ്ങി. എല്ലാ കാലയളവിലെയും സ്ഥിര നിക്ഷേപങ്ങളുടെ പലിശ നിരക്ക് കഴിഞ്ഞ വർഷം മുതൽ മികച്ച രീതിയിൽ വർധിക്കുകയാണ്.

ചില ബാങ്കുകൾ സ്ഥിരനിക്ഷേപത്തിന് 8 ശതമാനത്തിന് മുകളിൽ വരെ പലിശ നൽകുന്നുണ്ട്. മുതിർന്ന പൗരന്മാർക്ക് സാധാരണ പലിശ നിരക്കിനേക്കാൾ 0.50 ശതമാനം അധിക പലിശയും ലഭിക്കും. 2 വർഷ കാലയളവിൽ നിക്ഷേപത്തിന് മികച്ച പലിശ നൽകുന്ന 4 ബാങ്കുകളും നിക്ഷേപിക്കുമ്പോൾ ശ്രദ്ധിക്കേണ്ട 4 കാര്യങ്ങളും നോക്കാം.

ഡിസിബി ബാങ്ക്

രണ്ട് വർഷത്തിനുള്ളിൽ കാലാവധി പൂർത്തിയാകുന്ന സ്ഥിര നിക്ഷേപങ്ങൾക്ക് ഏറ്റവും ഉയർന്ന പലിശ നൽകുന്ന സ്വകാര്യ ബാങ്ക് ഡിസിബി ബാങ്കാണ്. 700 ദിവസത്തിനും 24 മാസത്തിനും ഇടയിൽ കാലാവധിയുള്ള നിക്ഷേപങ്ങൾക്ക് ഡിസിബി ബാങ്ക് 8 ശതമാനം പലിശ നൽകുന്നു. മുതിർന്ന പൗരന്മാർക്ക് സമാന കാലാവധിയുള്ള നിക്ഷേപങ്ങൾക്ക് പലിശ നിരക്ക് 8.5 ശതമാനം ലഭിക്കും.

യെസ് ബാങ്ക്

മറ്റൊരു സ്വകാര്യ ബാങ്കായ യെസ് ബാങ്കും പലിശ നിരക്കിൽ മുൻപന്തിയിലാണ്. 18 മാസത്തിനും 36 മാസത്തിനും ഇടയിൽ കാലാവധിയുള്ള നിക്ഷേപങ്ങൾക്ക് യെസ് ബാങ്ക് 7.75 ശതമാനം പലിശ നൽകുന്നു. 18 മാസത്തിനും 36 മാസത്തിനും ഇടയിൽ കാലാവധിയുള്ള നിക്ഷേപങ്ങൾക്ക് മുതിർന്ന പൗരന്മാർക്ക് 8.25 ശതമാനം പലിശ ലഭിക്കും.

ഐഡിഎഫ്സി ഫസ്റ്റ് ബാങ്ക്

ഐഡിഎഫ്‌സി ഫസ്റ്റ് ബാങ്ക് രണ്ട് വർഷത്തിനുള്ളിൽ കാലാവധി പൂർത്തിയാകുന്ന നിക്ഷേപങ്ങൾക്ക് 7.75 ശതമാനം പലിശനൽകുന്നു. 18 മാസത്തിനും മൂന്ന് വർഷത്തിനും ഇടയിലുള്ള സ്ഥിര നിക്ഷേപങ്ങൾക്കും ഐഡിഎഫ്സി ഫസ്റ്റ് ബാങ്ക് 7.75 ശതമാനം പലിശയാണ് നൽകുന്നത്. 18 മാസത്തിനും മൂന്ന് വർഷത്തിനും ഇടയിൽ കാലാവധിയുള്ള സ്ഥിര നിക്ഷേപങ്ങൾക്ക് മുതിർന്ന പൗരന്മാർക്ക് 8.25 ശതമാനം പലിശ നേടാം.

ഇൻഡസ്ഇൻഡ് ബാങ്ക്

സ്വകാര്യ ബാങ്കായ ഇൻഡസ്ഇൻഡ് ബാങ്ക് രണ്ട് വർഷത്തിനുള്ളിൽ കാലാവധി തീരുന്ന നിക്ഷേപങ്ങൾക്ക് 7.75 ശതമാനം പലിശ നൽകുന്നുണ്ട്. ഇതേ കാലളവിലെ സ്ഥിര നിക്ഷേപങ്ങൾക്ക് മുതിർന്ന പൗരന്മാർക്ക് 8.25 ശതമാനം പലിശ ലഭിക്കും. 

ശ്രദ്ധിക്കേണ്ട കാര്യങ്ങൾ

1. സ്ഥിര നിക്ഷേപത്തിനായി ആദ്യം പരി​ഗണിക്കേണ്ടത് ഷെഡ്യൂൾഡ് ബാങ്കാണ്. ഷെഡ്യൂൾഡ് ബാങ്കുകൾ നിക്ഷേപത്തിന് കൂടുതൽ സുരക്ഷിതത്വം നൽകുന്നു. പലിശയും നിക്ഷേപവും അടക്കം 5 ലക്ഷം രൂപയ്ക്ക് ഡെപ്പോസിറ്റ് ഇൻഷൂറൻസ് ആൻഡ് ക്രെഡിറ്റ് ​ഗ്യാരണ്ടി കോർപ്പറേഷന്റെ പരിരക്ഷ ലഭിക്കും.

2. അടുത്തതായി നിക്ഷേപിക്കാൻ ആഗ്രഹിക്കുന്ന കാലാവധി നോക്കണം. മാന്യമായ വരുമാനം ലഭിക്കുന്നതിനായി മികച്ച പലിശ നൽകുന്ന പ്രത്യേക കാലയളവുകൾ പരിഗണിക്കുക. രണ്ട് വർഷം പോലെയുള്ള താരതമ്യേന കുറഞ്ഞ കാലയളവുകളിൽ മികച്ച പലിശ ലഭിക്കും. 

3. സ്ഥിര നിക്ഷേപ കാലയവും നിക്ഷേപകന്റെ സാമ്പത്തിക ലക്ഷ്യവുമായി ചേരുന്നതാകണം. കാലാവധിക്ക് ഇടയിൽ നിക്ഷേപം പിൻവലിക്കികയാണെങ്കിൽ വരുമാനത്തെ ഇത് ബാധിക്കും. നേരത്തെ പിൻവലിക്കുന്നതിന് ബാങ്ക് പിഴ ഈടാക്കും. ഇത് വരുമാനത്തെ ബാധിക്കും. ഇതിനാൽ സ്ഥിര നിക്ഷേപത്തിന് മുൻപ് ശരിയായ ആസൂത്രണവും ചിന്തകളും ഉണ്ടായിരിക്കണം.

4. സ്ഥിര നിക്ഷേപത്തിന് മുന്നോടിയായി പലിശ നിരക്കുകളെ വ്യക്തമായി പിന്തുടരണം. മാസത്തിൽ പലിശ വരുമാനം ആ​ഗ്രഹിക്കുന്നവരാണോ നിക്ഷേപം വളരാൻ ആ​ഗ്രഹിക്കുന്നവരാണോ എന്ന് സ്വയം മനസിലാക്കി നിക്ഷേപം നടത്തണം.