നവംബറെത്തി; സ്ഥിര നിക്ഷേപകരും പെന്‍ഷന്‍കാരും ശ്രദ്ധിക്കണം; 4 സാമ്പത്തിക മാറ്റങ്ങളറിയാം

പണം കൈകാര്യം ചെയ്യുന്നവരാണെങ്കിൽ ഓരോ മാസത്തിലും നടന്ന സാമ്പത്തിക മാറ്റങ്ങളെ പറ്റി ധാരണയുണ്ടാക്കേണ്ടതുണ്ട്. നിത്യജീവിതവുമായി ബന്ധപ്പെട്ട് കിടക്കുന്ന നിരവധി സാമ്പത്തിക മാറ്റങ്ങളാണ് നവംബര്‍ മാസത്തില്‍ കാത്തിരിക്കുന്നത്. ലൈഫ് സര്‍ട്ടിഫിക്കറ്റ് സമര്‍പ്പിക്കാനുള്ള അവസാന തീയതിയും വിവിധ ജനപ്രീയ നിക്ഷേപങ്ങളുടെ അവസാന തീയതിയും നവംബറിലാണ്. നവംബറിലെ സാമ്പത്തിക മാറ്റങ്ങളെ പരിശോധിച്ചാൽ മുതിർന്ന പൗരന്മാർക്കാണ് കൂടുതൽ ശ്രദ്ധപുലർത്തേണ്ടതെന്ന് കാണാം. 5 സാമ്പത്തിക മാറ്റങ്ങളെ വിശദമായി നോക്കാം.

ജീവന്‍ പ്രണാം ലൈഫ് സര്‍ട്ടിഫിക്കറ്റ്

80 വയസിന് മുകളില്‍ പ്രായമുള്ള പെന്‍ഷന്‍കാര്‍ക്ക് തുടര്‍ന്നും പെന്‍ഷന്‍ ലഭിക്കാന്‍ ലൈഫ് സര്‍ട്ടിഫിക്കറ്റ് (ജീവന്‍ പ്രണാം പത്രം) സമര്‍പ്പിക്കേണ്ടതുണ്ട്. 2023 നവംബര്‍ 30 വരെയാണ് ലൈഫ് സര്‍ട്ടിഫിക്കറ്റ് സമര്‍പ്പിക്കാനുള്ള സമയ പരിധി.

60 മുതല്‍ 80 വയസിന് ഇടയിലുള്ള പെന്‍ഷന്‍കാര്‍ക്ക് നവംബര്‍ 1 മുതല്‍ 30 വരെയാണ് ജീവന്‍ പ്രണാം ലൈഫ് സര്‍ട്ടിഫിക്കറ്റ് സമര്‍പ്പിക്കാന്‍ സമയം നല്‍കിയിട്ടുള്ളത്. സൂപ്പര്‍ സീനിയര്‍ സിറ്റിസണ്‍സിന് (80 വയസിന് മുകളില്‍ പ്രായമുള്ളവര്‍) ഒക്ടോബര്‍ 1 മുതല്‍ നല്‍കിയ സമയ പരിധി നവംബര്‍ 30 ന് അവസാനിക്കും.

ഐഡിബിഐ പ്രത്യേക സ്ഥിര നിക്ഷേങ്ങള്‍

ഐഡിബിഐ ബാങ്കിന്റെ 2 പ്രത്യേക സ്ഥിര നിക്ഷേപങ്ങളുടെ കാലാവധി നവംബര്‍ 30 വരെയാണ്. 375 ദിവസത്തേക്കും 444 ദിവസത്തേക്കുമുള്ള അമൃത് മഹോത്സവ് സ്ഥിര നിക്ഷേപങ്ങളുടെ കാലാവധിയാണ് ബാങ്ക് ഉയര്‍ത്തിയത്. ഐഡിബിഐ ബാങ്കിലെ 'സ്റ്റാര്‍' നിക്ഷേപങ്ങളാണ് അമൃത് മഹോത്സവ് എഫ്ഡികള്‍.

444 ദിവസത്തേക്ക് 7.15 ശതമാനം പലിശ നിക്ഷേപകര്‍ക്ക് ലഭിക്കും. മുതിര്‍ന്ന പൗരന്മാര്‍ക്ക് 7.65 ശതമാനം പലിശ നേടാം. 375 ദിവസത്തെ സ്ഥിര നിക്ഷേപത്തിന് 7.10 ശതമാനം പലിശ റെഗുലര്‍ നിക്ഷേപകര്‍ക്ക് ലഭിക്കും. മുതിര്‍ന്ന പൗരന്മാര്‍ക്ക് 7.65 ശതമാനമാണ് പലിശ നിരക്ക്.

2 നിക്ഷേപങ്ങളും നേരത്തെ പിന്‍വലിക്കാന്‍ അനുവദിക്കുന്നവയാണ്. സെപ്റ്റംബർ 15 നാണ് ബാങ്ക് അവസാനമായി നിക്ഷേപ പലിശ ഉയർത്തിയത്. 3 ശതമാനം മുതൽ 6.80 ശതമാനം വരെ പലിശ റെ​ഗുലർ നിക്ഷേപകർക്ക് ബാങ്ക് നൽകുന്നുണ്ട്.

പഞ്ചാബ് ആന്‍ഡ് സിന്‍ഡ് ബാങ്ക് എഫ്ഡി

പഞ്ചാബ് ആന്‍ഡ് സിന്‍ഡ് ബാങ്കിന്റെ പ്രത്യേക സ്ഥിര നിക്ഷേപമായ പിഎസ്ബി ധന്‍ ലക്ഷ്മി, പിഎസ്ബി സേവിംഗ് പ്ലസ് എന്നിവയുടെ കാലാവധിയും നവംബര്‍ 30 വരെയാണ്. സേവിം​ഗ്സ് പ്ലാനിൽ 333 ദിവസത്തേക്ക് നിക്ഷേപിക്കുമ്പോള്‍ 6.50 ശതമാനം റെഗുലര്‍ നിക്ഷേപകര്‍ക്ക് പലിശ ലഭിക്കും. മുതിര്‍ന്ന പൗരന്മാര്‍ക്ക് 7 ശതമാനവും സൂപ്പര്‍ സീനിയര്‍ സിറ്റിസണ്‍സിന് 7.15 ശതമാനവും പലിശ ലഭിക്കും.

444 ദിവസത്തേക്കുള്ള ധൻ ലക്ഷ്മി സ്ഥിര നിക്ഷേപത്തിന് 7.40 ശതമാനം പലിശ പൊതുമേഖലാ ബാങ്ക് നല്‍കുന്നു. മുതിര്‍ന്ന പൗരന്മാര്‍ക്ക് 7.90 ശതമാനവും സൂപ്പര്‍ സീനിയര്‍ക്ക് 8.05 ശതമാനം പലിശയും 444 ദിവസത്തേക്ക് ലഭിക്കും. 500 രൂപ മുതല്‍ 1.99 കോടി വരെ നിക്ഷേപിക്കാം.

എച്ച്ഡിഎഫ്‌സി സീനിയര്‍ സിറ്റിസണ്‍ കെയര്‍ എഫ്ഡി

മുതിര്‍ന്ന പൗരന്മാരായ നിക്ഷേപകര്‍ക്ക് നിശ്ചിത കാലയളവില്‍ 0.25 ശതമാനത്തിന്റെ അധിക നിരക്ക് നല്‍കുന്ന നിക്ഷേപമാണ് എച്ച്ഡിഎഫ്‌സി സീനിയര്‍ സിറ്റിസണ്‍ കെയര്‍ എഫ്ഡി. സാധാരണഗതിയില്‍ മുതിര്‍ന്ന പൗരന്മാര്‍ക്ക് ലഭിക്കുന്ന 0.50 ശതമാനം ഉയര്‍ന്ന നിരക്കിനൊപ്പം അധികമായാണ് 0.25 ശതമാനം പലിശ ലഭിക്കുന്നത്.

റെഗുലര്‍ നിക്ഷേപകനേക്കാള്‍ 0.75 ശതമാനം അധിക നിരക്ക് നിക്ഷേപത്തിന് ലഭിക്കും. 5 വര്‍ഷം 1 ദിവസം 10 വര്‍ഷ കാലയളവിലുള്ള 5 കോടിക്ക് താഴെയുള്ള നിക്ഷേപങ്ങള്‍ക്കാണ് ഈ നിരക്ക് ലഭിക്കുന്നത്. പദ്ധതി നവംബര്‍ 7 വരെയാണ് പ്രാബല്യത്തിലുള്ളത്.