5 വർഷത്തെ സ്ഥിര നിക്ഷേപം; ഒപ്പം നികുതി ഇളവും; ടാക്സ് സേവിം​ഗ് എഫ്ഡിക്ക് മികച്ച പലിശ എവിടെ

കഴിഞ്ഞ മാസങ്ങളിൽ റിപ്പോ നിരക്ക് ​ഗണ്യമായി വർധിച്ചു. 2.50 ശതമാനം റിപ്പോ നിരക്ക് വർധിച്ചതോടെ സ്ഥിര നിക്ഷേപങ്ങളുടെ പലിശ നിരക്ക് ​ഗണ്യമായി ഉയർന്നു. ബാങ്കുകൾ പലിശ ഉയർത്തുന്നതിൽ പിശുക്ക് കാട്ടിയെങ്കിലും 8-9 ശതമാനം നിരക്കിലേക്ക് സ്ഥിര നിക്ഷേപ പലിശ നിരക്കെത്തി. കേന്ദ്ര സർക്കാറിന് നിയന്ത്രണാധികാരമുള്ള ലഘു സമ്പാദ്യ പദ്ധതികളുടെ പലിശ നിരക്കും സമാന കാലയളവിൽ വർധിച്ചിട്ടുണ്ട്.

പരസ്പരം ഏറ്റുമുട്ടുന്ന തരത്തിലാണ് ഇന്ന് ബാങ്ക്- പോസ്റ്റ് ഓഫീസ് നിക്ഷേപങ്ങളുടെ പലിശ നിരക്ക്. അഞ്ച് വർഷത്തെ നിക്ഷേപത്തിന് പോസ്റ്റ് ഓഫീസിൽ നിന്നോണാ ബാങ്കിൽ നിന്നാണോ ഉയർന്ന പലിശ ലഭിക്കുന്നത് എന്ന് നോക്കാം. 

 

ടാക്സ് സേവിം​ഗ് സ്ഥിര നിക്ഷേപം

ടാക്സ് സേവിം​ഗ്സ് സ്ഥിര നിക്ഷേപങ്ങൾ ബാങ്കിലായാലും പോസ്റ്റ് ഓഫീസിലായാലും 5 വർഷം ലോക്ക്-ഇൻ പിരിയഡുണ്ട്. ഈ സ്ഥിരനിക്ഷേപങ്ങളിൽ 1.5 ലക്ഷം രൂപ വരെയാണ് നിക്ഷേപിക്കാൻ സാധിക്കുക. സാധാരണ സ്ഥിര നിക്ഷേപങ്ങൾക്ക് സമാനമായി പലിശ ത്രൈമാസത്തിലൊരിക്കലാണ് കോമ്പൗണ്ട് ചെയ്യുന്നത്. പേരിലെ ടാക്സ് സേവിം​ഗ് എന്നത് സൂചിപ്പിക്കുന്നത് പോലെ നിക്ഷേപിക്കുന്ന തുകയ്ക്ക് 1961ലെ ആദായനികുതി നിയമത്തിലെ സെക്ഷൻ 80 സി പ്രകാരം 1.5 ലക്ഷം രൂപയുടെ നികുതി ഇളവ് ലഭിക്കും.

സാധാരണ സ്ഥിര നിക്ഷേപങ്ങളിൽ നിന്ന് വ്യത്യസ്തമായി ടാക്സ് സേവിം​ഗ്സ് സ്ഥിര നിക്ഷേപങ്ങൾക്ക് 5 വർഷ കാലാവധിയിൽ നേരത്തെ പിൻവലിക്കാൻ സാധിക്കില്ല. അതേസമയം, സാധാരണ സ്ഥിര നിക്ഷേപങ്ങൾക്കും 5 വർഷ കാലാവധിയിൽ ഇതേ പലിശ നിരക്കാണ് ഈടാക്കുന്നത്.

ടാക്സ് സേവിം​ഗ് സ്ഥിര നിക്ഷേപം

ബാങ്കുകൾ തോറും ടാക്സ് സേവിം​ഗ് സ്ഥിര നിക്ഷേപങ്ങളുടെ പലിശ നിരക്കുകൾ വ്യത്യാസപ്പെടും. സ്റ്റേറ്റ് ബാങ്ക് ഓഫ് ഇന്ത്യയിൽ റെ​ഗുലർ നിക്ഷേപകർക്ക് ടാക്സ് സേവിം​ഗ് സ്ഥിര നിക്ഷേപത്തിന് 6.50 ശതമാനം പലിശ ലഭിക്കും. എച്ച്ഡിഎഫ്സി ബാങ്ക്, ഐസിഐസിഐ ബാങ്ക് എന്നിവയിലെ ടാക്സ് സേവിം​ഗ് സ്ഥിര നിക്ഷേപങ്ങൾക്ക് 7 ശതമാനം പലിശ ലഭിക്കും. ഡിസിബി ബാങ്ക് 7.75 ശതമാനം പലിശയും ഇൻഡസ്ഇൻഡ് ബാങ്ക് ടാക്സ് സേവിം​ഗ് സ്ഥിര നിക്ഷേപങ്ങൾക്ക് 7.25 ശതമാനം പലിശയും നൽകുന്നുണ്ട്.

പോസ്റ്റ് ഓഫീസ്

പോസ്റ്റ് ഓഫീസിലെ 5 വർഷ കാലാവധിയുള്ള ടൈം ഡെപ്പോസിറ്റുകൾ ടാക്സ് സേവിം​ഗ് സ്ഥിര നിക്ഷേപങ്ങളുടെ ആനുകൂല്യം നൽകുന്നുണ്ട്. 5 വർഷത്തെ പോസ്റ്റ് ഓഫീസ് ടൈം ഡെപ്പോസിറ്റിൽ നിക്ഷേപിക്കുന്നവർക്ക് ആദായനികുതി നിയമം സെക്ഷൻ 80സി പ്രകാരം 1.5 ലക്ഷം രൂപ വരെ നികുതിയിളവ് ക്ലെയിം ചെയ്യാൻ സാധിക്കും.

ജൂലായ്- സെപ്റ്റംബർ പാദത്തിൽ പോസ്റ്റ് ഓഫീസ് ടൈം ഡെപ്പോസിറ്റുകളുടെ പലിശ നിരക്ക് 7.5 ശതമാനമാണ്. 1,000 രൂപയുടെ നിക്ഷേപത്തിൽ നിക്ഷേപം ആരംഭിക്കാം. 100 രൂപയുടെ ഗുണിതങ്ങളായി നിക്ഷേപം ഉയർത്താം. നിക്ഷേപത്തിന് ഉയർന്ന പരിധിയില്ല. നിക്ഷേപത്തിന്മേൽ വായ്പയെടുക്കാം.

പലിശ നിരക്ക് ഓരോ പാദത്തിലും സർക്കാർ പരിഷ്കരിക്കും. എന്നാൽ ഒരിക്കൽ നിക്ഷേപിച്ചാൽ കാലാവധിയിലുടനീളം പലിശ നിരക്ക് അതേപടി തുടരും.

ഉയർന്ന ടാക്സ് സ്ലാബിലുള്ളവർക്ക് ​ഗുണം ലഭിക്കില്ല

സ്ഥിര നിക്ഷേപത്തിൽ നിന്നുള്ള പലിശയ്ക്ക് നികുതി നൽകണം. ഉയർന്ന ടാക്സ് സ്ലാബിലുള്ളവർക്ക് ഇത് ​ഗുണത്തേക്കാളേറെ ദോഷം ചെയ്യും. ശമ്പളക്കാരാണെങ്കിൽ നികുതി ഇളവ് ലഭിക്കാൻ സ്ഥിര നിക്ഷേപങ്ങളുടെ ആവശ്യമില്ല. നികുതി രഹിത റിട്ടേണുകൾക്കായി പിപിഎഫ്, വിപിഎഫ്, എൻപിഎസ് എന്നിവയും സെക്ഷൻ 80സി ആനുകൂല്യങ്ങൾ നൽകുന്നുണ്ട്.