കൂടിയത് അത്രയും കുറഞ്ഞില്ല, സ്വർണവില 53,000-ത്തിന് മുകളിൽ തന്നെ, വിലയിലെ ചാഞ്ചാട്ടം വരും ദിവസങ്ങളിലും തുടരും

സ്വർണവിലയിലെ ചാഞ്ചാട്ടം തുടരുകയാണ്. കൂടിയും കുറഞ്ഞും പവന്‍റെ വില 53,000 രൂപയ്ക്ക് മുകളിൽ തന്നെ തുടരുന്നു. വരും ദിവസങ്ങളിൽ വില കുറയാൻ തയ്യാറായാൽ അത് വലിയ അളവിൽ ആഭരണം വാങ്ങുന്നവർക്ക് വലിയ ആശ്വാസമാകും. അതേസമയം വില മുകളിലേക്ക് ഉയർന്നാൽ കീശ കീറുമെന്ന് പ്രത്യേകം പറയേണ്ടതില്ലല്ലോ.

കൂടിയത് അത്രയും കുറഞ്ഞില്ല

480 രൂപയുടെ വർധനയോടെ പവന് 53,200 രൂപ എന്നതായിരുന്നു സംസ്ഥാനത്ത് ശനിയാഴ്ച സ്വർണവില. ഗ്രാമിന് 6650 രൂപ. ഞാറാഴ്ച ഇതേ വിലയിൽ തന്നെ സ്വർണവ്യാപാരം തുടർന്നു. എന്നാൽ തിങ്കളാഴ്ച ചെറിയ ആശ്വാസം നൽകി സ്വർണവില കുറഞ്ഞിട്ടുണ്ട്. പവന് 160 രൂപയും, ഗ്രാമിന് 20 രൂപയുമാണ് വില കുറഞ്ഞത്. അതോടെ ഇന്ന് ഒരു പവൻ സ്വർണ്ണത്തിന് 53,040 രൂപയും, ഗ്രാമിന് 6,630 രൂപയുമാണ് വില.

ഒരു പവൻ വാങ്ങാൻ 60,000 രൂപ നൽകണം

സ്വർണാഭരണം വാങ്ങുമ്പോൾ പവന്‍റെ വില മാത്രം നൽകിയാൽ പോര. അതിനൊപ്പം പണിക്കൂലി, നികുതി, ഹാള്മാര്ക്കിങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 60,000 രൂപ നൽകണ്ടി വരും.

ഈ മാസത്തെ ഉയർന്ന വില ജൂൺ 7-ന്

ജൂൺ ഏഴാം തിയ്യതിയാണ് ഈ മാസത്തെ ഉയർന്ന നിരക്കിലേക്ക് സ്വർണ്ണ വില എത്തിയത്. ഒരു പവൻ സ്വർണ്ണത്തിന് 54,080 രൂപയും, ഗ്രാമിന് 6,760 രൂപയുമായിരുന്നു അന്നത്തെ വില നിലവാരം. അതേസമയം ജൂൺ മാസത്തെ കുറഞ്ഞ വില രേഖപ്പെടുത്തിയത് 8,9,10 ദിവസങ്ങളിലാണ്. ഒരു പവൻ സ്വർണ്ണത്തിന് 52,560 രൂപയും, ഗ്രാമിന് 6,570 രൂപയുമായിരുന്നു വില.

സംസ്ഥാനത്തിന് ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസം മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില.

ആഗോള സ്വർണ്ണവില

അന്താരാഷ്ട്ര തലത്തിൽ, തിങ്കളാഴ്ച്ച രാവിലെ ചെറിയ നഷ്ടത്തിലാണ് സ്വർണ്ണ വ്യാപാരം നടക്കുന്നത്. ട്രോയ് ഔൺസിന് 4.83 ഡോളർ (0.21%) താഴ്ന്ന് 2,324.03 ഡോളർ എന്നതാണ് നിരക്ക്.

ചൈനീസ് കേന്ദ്ര ബാങ്കായ പീപ്പിൾ‌സ് ബാങ്ക് ഓഫ് ചൈന കഴിഞ്ഞ മെയിൽ സ്വർണ്ണം വാങ്ങുന്നത് താൽക്കാലികമായി നിർത്തി വെച്ചെന്ന വാർത്ത പുറത്തു വന്നിരുന്നു. ഇതേ തുടർന്ന് കഴിഞ്ഞ വാരത്തിൽ സ്വർണ്ണ വിലയിൽ കനത്ത ഇടിവ് നേരിട്ടിരുന്നു.

അഡ്വാന്‍സ് ബുക്കിംഗ് നല്ലതാണ്

കഴിഞ്ഞ കുറേ നാളുകളായി സ്വർണവിലയിൽ വലിയ ചാഞ്ചാട്ടമുണ്ട്. അതുകൊണ്ടു തന്നെ വലിയ രീതിയിൽ സ്വർണം വാങ്ങാൻ ആഗ്രഹിക്കുന്നവർ അഡ്വാന്‍സ് ബുക്കിംഗ് നടത്തുന്നതാണ് നല്ലത്. സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്‍റെ പ്രത്യേകത.

4 വർഷം കൊണ്ട് കൂടിയത് 25,000 രൂപ

പവന്റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്റെ വില അരലക്ഷം രൂപയും കടന്നു.