നിങ്ങളുടെ കൈവശമുള്ളതാണോ മികച്ച ആധാർ? 4 തരം ആധാർ ഫോർമാറ്റുകളും അവയുടെ പ്രത്യേകതകളും അറിയാം

ഇന്ത്യയിലെ ഏറ്റവും സുപ്രധാന തിരിച്ചറിയൽ രേഖകളിലൊന്നാണ് ആധാർ. ഔദ്യോ​ഗിക ആവശ്യങ്ങൾക്കെല്ലാം ആധാർ ഒരു ഘടകമാണ്. യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യയാണ് (യുഐഡിഎഐ) ആധാർ വികസിപ്പിച്ചത്. ആധാറിൽ തെളിഞ്ഞു കാണുന്ന 12 അക്ക നമ്പർ ഏറ്റവും പ്രധാനപ്പെട്ടതാണ്. നിങ്ങൾ ഏത് ഫോർമാറ്റിലുള്ള ആധാർ സൂക്ഷിച്ചാലും ഈ നമ്പർ ഒരുപോലെ ആയിരിക്കും. അതിനാൽ യുഐഡിഎഐ നൽകുന്ന എല്ലാത്തരം ആധാർ ഫോർമാറ്റും തിരിച്ചറിയൽ രേഖയായി സമർപ്പിക്കാം.

ആധാർ ഒന്നിലധികം ഫോർമാറ്റിൽ ലഭ്യമാണ്. ഈ ഫോർമാറ്റുകൾ ഏതെല്ലാമാണെന്നും, അവയുടെ പ്രത്യേകതകളെ കുറിച്ചും വിശദമായി അറിഞ്ഞിരിക്കാം;

ആധാർ ലെറ്റർ

പേപ്പർ ബേസ്ഡ് ലാമിനേറ്റഡ് ഫോർമാറ്റിലുള്ളതാണ് ആധാർ ലെറ്റർ. അതിൽ ഇഷ്യൂ ചെയ്ത തീയതിയും പ്രിന്റ് ചെയ്ത തീയതിയും അടങ്ങിയ ഒരു സുരക്ഷിത QR കോഡ് ഉണ്ടായിരിക്കും. ഒറിജിനൽ ആധാർ ലെറ്റർ നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്താൽ 50 രൂപ മുടക്കി നിങ്ങൾക്ക് ഒരു പുതിയ ആധാർ ലെറ്റർ ഓൺലൈനായി ഓർഡർ ചെയ്യാം. ഇത് സ്പീഡ് പോസ്റ്റ് വഴി നിങ്ങൾക്ക് ലഭിക്കും.

ഡിജിറ്റൽ ഫോർമാറ്റിലുള്ള ആധാറിനെയാണ് ഇ-ആധാർ എന്ന് വിളിക്കുന്നത്. ഇത്തരം ആധാർ പാസ്‌വേഡ് ഉപയോ​ഗിച്ച് സുരക്ഷിതമായി ഉപയോ​ഗിക്കാം. മാത്രമല്ല ഓഫ്‌ലൈൻ സ്ഥിരീകരണത്തിനായി ഇതിൽ ഒരു ക്യുആർ കോഡും ഉണ്ടായിരിക്കും. നിങ്ങൾക്ക് ആധാറുമായി രജിസ്റ്റർ ചെയ്ത മൊബൈൽ നമ്പർ ഉപയോഗിച്ച് ഔദ്യോഗിക യുഐഡിഎഐ വെബ്‌സൈറ്റിൽ നിന്ന് ഇ-ആധാർ അല്ലെങ്കിൽ മാസ്‌ക്ഡ് ഇ-ആധാർ വേഗത്തിൽ ലഭിക്കും. ഇ-ആധാർ സൗജന്യമായി ഡൗൺലോഡ് ചെയ്യാം. ഒരു സാധാരണ ഫിസിക്കൽ ആധാർ പോലെ തന്നെ ഇ-ആധാറും നിയമപ്രകാരം സാധുവാണ്.

എംആധാർ

യുഐഡിഎഐ വികസിപ്പിച്ചെടുത്ത ഒരു മൊബൈൽ ആപ്ലിക്കേഷനാണിത്. ആധാർ നമ്പർ, ഡെമോഗ്രാഫിക് ഡാറ്റ, ഒരു ഫോട്ടോ എന്നിവയുൾപ്പെടെ എല്ലാ വിവരങ്ങളും ഈ ആപ്പിലൂടെ നിങ്ങൾക്ക് ലഭിക്കും. ഓഫ്‌ലൈൻ പരിശോധനയ്ക്കായി ഒരു സുരക്ഷിത ക്യുആർ കോഡും ഇതിൽ ലഭ്യമാണ്. എംആധാറും സൗജന്യമായി ഡൗൺലോഡ് ചെയ്യാം. ഇ-കെവൈസി പങ്കിടുന്നതിനുള്ള ക്യുആർ കോഡുള്ള ഡിജിറ്റൽ പ്രൊഫൈൽ, ബയോമെട്രിക് ലോക്കിംഗ് തുടങ്ങി നിരവധി സവിശേഷതകളും എംആധാറിനുണ്ട്.

ആധാർ പിവിസി കാർഡ്

യുഐഡിഎഐ വാ​ഗ്ദാനം ചെയ്യുന്ന ഒരു ഫിസിക്കൽ രൂപത്തിലുള്ള പതിപ്പാണ് പിവിസി ആധാർ. സുരക്ഷിതമായി രീതിയിൽ രൂപ കൽപ്പന ചെയ്ത പിവിസി കാർഡ് ഒരു എടിഎം കാർഡ് പോലെ മികച്ചതാണ്. ഡിജിറ്റലായി ഒപ്പിട്ട ആധാർ സുരക്ഷിത ക്യുആർ കോഡ്, ഒരു ഫോട്ടോഗ്രാഫ്, ജനസംഖ്യാ വിവരങ്ങൾ എന്നിവ ഇതിൽ ഉൾപ്പെടുന്നു. ആധാർ പിവിസി കാർഡുകൾ സ്പീഡ് പോസ്റ്റ് വഴി നിങ്ങളുടെ വിലാസത്തിലേക്ക് അയയ്ക്കുന്നു. ഈ കാർഡിന് അപേക്ഷിക്കുമ്പോൾ നിങ്ങൾ 50 രൂപ പേയ്മെൻ്റ് നടത്തേണ്ടി വരും.

പ്രധാനമായും ഈ 4 ഫോർമാറ്റുകളിലാണ് ആധാർ ലഭ്യമാകുന്നത്. ഇവ നാലും നിങ്ങൾക്ക് തിരിച്ചറിയൽ രേഖയായി ഉപയോ​ഗിക്കാവുന്നതാണ്.