തട്ടിപ്പ് പലവിധം; ആധാർ പകർപ്പ് ഉപയോ​ഗിച്ച് മറ്റൊരാൾക്ക് ബാങ്ക് അക്കൗണ്ട് ആരംഭിക്കാനാകുമോ? പണി കിട്ടുമോ?

ആധാറിന്ന് പ്രധാനപ്പെട്ട വ്യക്തി​ഗത തിരിച്ചറിയാൽ രേഖയായി മാറിയിട്ടുണ്ട്. എൽപിജി കണക്ഷൻ, ആദായനികുതി റിട്ടേൺ (ഐടിആർ) ഫയൽ ചെയ്യൽ, ബാങ്ക് അക്കൗണ്ട് തുറക്കൽ, പെർമനന്റ് അക്കൗണ്ട് നമ്പർ (പാൻ) അപേക്ഷ തുടങ്ങി പ്രധാനപ്പെട്ട എല്ലാ കാര്യങ്ങൾക്കും ആധാർ നിർബന്ധമാണ്. യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ അനുവദിക്കുന്ന 12 അക്ക വ്യക്തിഗത തിരിച്ചറിയല്‍ നമ്പറാണ് ആധാര്‍. സര്‍ക്കാര്‍ ആവശ്യങ്ങള്‍ക്ക് തിരിച്ചറിയല്‍ രേഖയായും മേല്‍വിലാസം തെളിയിക്കുന്നതിനുമായി ആധാര്‍ വ്യാപാകമായി ഉപയോഗിക്കുന്നുണ്ട്.

ഉപയോ​ഗം കൂടിയതോടെ തട്ടിപ്പും പെരുകുകയാണ്. ആധാർ കാർഡിന്റെ കോപ്പി പലയിടത്തും രേഖയായി സമർപ്പിക്കുന്ന ഘട്ടത്തിൽ ഇത് ഉപയോ​ഗിച്ച് പല വിധ തട്ടിപ്പുകളും ഇന്ന് നടക്കുന്നുണ്ട്. മറ്റൊരാളുടെ ആധാർ ഉപയോ​ഗിച്ച് ബാങ്ക് അക്കൗണ്ട് ആരംഭിക്കാൻ സാധിക്കുമോ എന്നതാണ് പ്രധാന ചോദ്യം. ഇത്തരത്തിൽ അക്കൗണ്ട് ആരംഭിച്ചാൽ ആർക്കാണ് ഇതിന്റെ ഉത്തരവാദിത്വം? യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യയുടെ ഔദ്യോ​ഗിക വെബ്സൈറ്റിൽ ആധാർ ഉടമകളുടെ ചോദ്യങ്ങൾക്കുള്ള ഉത്തരമുണ്ട്. വിശദമായി നോക്കാം.

ഉത്തരവാദിത്വം ആർക്ക്

കള്ളപണം വെളുപ്പിക്കൽ നിരോധന നിയമ പ്രകാരം ഒരു ബാങ്ക് അക്കൗണ്ട് തുറക്കുന്നതിന് ഔദ്യോഗികമായി സാധുതയുള്ള രേഖകളിൽ ഒന്നാണ് ആധാർ. അതേസമയം അക്കൗണ്ട് തുറക്കുന്ന ഘട്ടത്തിൽ മറ്റ് ഇക്കാര്യങ്ങളിലും ബാങ്ക് ജാ​ഗ്രത പാലിക്കേണ്ടതുമുണ്ട്.

ഒരു തട്ടിപ്പുകാരൻ ആധാർ ഉപയോഗിച്ച് ബാങ്ക് അക്കൗണ്ട് തുറക്കാൻ ശ്രമിക്കുകയും ബാങ്ക് കൃത്യമായ മുൻകരുതലുകളൊന്നും എടുക്കാതിരിക്കുകയും ചെയ്താൽ ശേഷമുണ്ടാകുന്ന പ്രവർത്തനങ്ങളുടെ ഉത്തരവാദിത്വം ആധാർ ഉടമയ്ക്ക് ഉണ്ടാകില്ലെന്ന് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ ഔദ്യോഗിക വെബ്‌സൈറ്റിൽ പറയുന്നു. ഇത്തരം ദുരുപയോഗം മൂലം ഒരു ആധാർ ഉടമയ്ക്കും ഇതുവരെ സാമ്പത്തിക നഷ്ടം ഉണ്ടായിട്ടില്ലെന്നും വെബ്സൈറ്റ് വിശദമാക്കുന്നു.

എളുപ്പം തട്ടിപ്പ് നടക്കുമോ

ആധാർ കാർഡിന്റെ പകർപ്പ് മറ്റൊരാളുടെ കയ്യിലെത്തിയാൽ നിങ്ങളുടെ പേരിൽ ഒരു ബാങ്ക് അക്കൗണ്ട് തുറക്കുകനാകുമോ എന്നതാണ് പലരെയും ആശങ്കപ്പെടുത്തുന്ന ചോദ്യം. ഫിസിക്കൽ ആധാർ കാർഡോ ഫോട്ടോകോപ്പിയോ മാത്രം സമർപ്പിച്ചാൽ ഒരു ബാങ്ക് അക്കൗണ്ട് തുറക്കാൻ കഴിയില്ല.

പി‌എം‌എൽ നിയമങ്ങളും ആർ‌ബി‌ഐ സർക്കുലേഷനുകളും അനുസരിച്ച് ഒരു ബാങ്ക് അക്കൗണ്ട് തുറക്കുന്നതിനോ, കെ‌വൈ‌സിക്കോ ആധാർ സ്വീകരിക്കുന്നതിന് മുൻപ് ബാങ്ക് ബയോമെട്രിക് അല്ലെങ്കിൽ ഒടിപി വഴി വാലിഡേഷനുും മറ്റ് സൂക്ഷ്മ പരിശോധനകളും നടത്തേണ്ടതുണ്ട്. അതിനാൽ ബയോമെട്രിക്/ഒടിപി വലിഡേഷൻ ഇല്ലാതെ ആർക്കും അക്കൗണ്ട് ആരംഭിക്കാൻ സാധിക്കില്ലെന്ന് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ വ്യക്തമാക്കുന്നു.

ഉത്തരവാദിത്വം ബാങ്കിന്

ബയോമെട്രിക്, ഒടിപി വാലിഡേഷനോ മറ്റ് പരിശോധനകളോ കൂടാതെ ആധാർ സ്വീകരിച്ച് ഒരു ബാങ്ക് അക്കൗണ്ട് ആരംഭിക്കുകയും ഇതുവഴി ആധാർ ഉടമയ്ക്കുണ്ടാകുന്ന നഷ്ടത്തിന്റെ ഉത്തരവാദിത്വം ബാങ്കിന്റെ മുകളിലാണ്. അത്തരമൊരു സാഹചര്യത്തിൽ ബാങ്കിന്റെ തെറ്റിന് ആധാർ കാർഡ് ഉടമ ഉത്തരവാദിയായിരിക്കില്ല.

മറ്റൊരാളുടെ വോട്ടർ കാർഡ്/റേഷൻ കാർഡ് ഹാജരാക്കി തട്ടിപ്പുകാർ ബാങ്ക് അക്കൗണ്ട് തുറക്കുകയാണെങ്കിലും സമാനമായി ബാങ്കാണ് ഉത്തരവാദിയാവുകയെന്ന് യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ വ്യക്തമാക്കി. അതിനാൽ തട്ടിപ്പുകാർ നിങ്ങളുടെ ആധാർ കാർഡിന്റെ പകർപ്പ്  കൈവശം വയ്ക്കുകയും ബാങ്ക് അക്കൗണ്ട് തുറക്കാൻ ശ്രമിക്കുകയും ചെയ്താൽ പോലും ആധാർ ഉടമ സുരക്ഷിതരാണ്.