പലിശ 7.90% വരെ; അമൃത് കലാശ്, സർവോത്തം, വീകെയർ; എസ്ബിഐയിൽ സ്ഥിര നിക്ഷേപമിടാൻ 3 പദ്ധതികൾ

രാജ്യത്തെ ഏറ്റവും വലിയ ബാങ്കായതിനാൽ പലരും സുരക്ഷ പരി​ഗണിച്ച് എസ്ബിഐയെ സ്ഥിര നിക്ഷേപത്തിന് പരി​ഗണിക്കാറുണ്ട്. അധിക സുരക്ഷയ്ക്ക് പ്രധാന്യം നൽകുന്ന മുതിർന്ന പൗരന്മാരുടെ താൽപര്യവും പൊതുമേഖലാ ബാങ്കുകളാണ്. ഇതിന്റെ ഭാ​ഗമായി വ്യക്തിഗത നിക്ഷേപകരുടെ ആവശ്യങ്ങൾക്കായി എസ്ബിഐ വിവിധ പ്രത്യേക സ്ഥിര നിക്ഷേപ പദ്ധതികൾ ആരംഭിച്ചിട്ടുണ്ട്. എസ്ബിഐ വി കെയർ, എസ്ബിഐ അമൃത് കലാശ്, എസ്ബിഐ സർവോത്തം എന്നിവയാണ് എസ്ബിഐ പ്രത്യേക സ്ഥിര നിക്ഷേപ പദ്ധതികൾ. 

ജൂൺ 30തിന് കാലാവധി എത്തുമായിരുന്ന എസ്ബിഐ അമൃത് കലാശ് പദ്ധതി ആ​ഗസ്റ്റ് 15 വരെയും എസ്ബിഐ വീകെയർ പദ്ധതി സെപ്റ്റംബർ 30 വെരെയും നീട്ടിയിട്ടുണ്ട്. ഓരോ സ്കീമുകളുടെയും സവിശേഷതകൾ വ്യത്യസ്തമാണെന്നത് പോലെ നിക്ഷേപിക്കുന്ന സ്കീമിനെ ആശ്രയിച്ച് പലിശ നിരക്കുകളും വ്യത്യാസപ്പെടും. ഓരോ പദ്ധതികളും വിശദമായി പരിശോധിച്ച് പലിശ നിരക്കുകളും മറ്റു പ്രത്യേകതകളും അറിയാം.

എസ്ബിഐ അമൃത് കലാശ്

എസ്ബിഐ റെ​ഗുലർ നിക്ഷേപകർക്കും മുതിർന്ന പൗരന്മാർക്കും ഉയർന്ന പലിശ നിരക്ക് വാഗ്ദാനം ചെയ്യുന്ന സ്ഥിര നിക്ഷേപമാണ് എസ്ബിഐ അമൃത് കലാശ്. 400 ദിവസമാണ് പ്രത്യേക സ്ഥിര നിക്ഷേപത്തിന്റെ കാലാവധി. മുതിർന്ന പൗരന്മാർക്ക് 7.6 ശതമാനം പലിശയും മറ്റുള്ളവർക്ക് 7.1 ശതമാനം പലിശയുമാണ് എസ്ബിഐ അമൃത് കലാശ് പദ്ധതി നൽകുന്നത്.

2023 ആ​ഗസ്റ്റ് 15 വരെ നിക്ഷേപകർക്ക് അമൃത് കലാശ് പ​ദ്ധതിയിൽ നിക്ഷേപിക്കാം. ഓൺലൈനിലോ എസ്ബിഐ യോനോ ആപ്പ് വഴിയോ ബ്രാഞ്ച് സന്ദർശിച്ചോ തുറക്കാം.

എസ്ബിഐ സർവോത്തം

എസ്ബിഐ ഈയിടെ ആരംഭിച്ച നോൺ കോളബിൽ സ്ഥിര നിക്ഷേപ സ്കീമാണ് എസ്ബിഐ സർവോത്തം ടേം ഡെപ്പോസിറ്റ്. സാധാരണ സ്ഥിര നിക്ഷേപങ്ങളെ അപേക്ഷിച്ച് സർവോത്തം പദ്ധതിയിൽ നിക്ഷേപകർക്ക് ഉയർന്ന പലിശനിരക്ക് ലഭിക്കും. എസ്ബിഐ സർവോത്തം ടേം ഡിപ്പോസിറ്റ് സ്കീം പ്രകാരം കാലാവധിക്ക് മുൻപ് നിക്ഷേപം പിൻവലിക്കാൻ അനുവദനീയമല്ല.

1 വർഷത്തേക്കും 2 കാലാവധിയും ഉള്ളതാണ് സർവോത്തം സ്ഥിര നിക്ഷേപങ്ങൾ. 15 ലക്ഷത്തിന് മുകളില്‍ 2 കോടി വരെയുള്ള നിക്ഷേപങ്ങളും 2 കോടിക്ക് മുകളിൽ 5 കോടി വരെയുള്ള ബൾക്ക് നിക്ഷേപങ്ങളുമാണ് സർവോത്തം നിക്ഷേപ പദ്ധതിക്ക് കീഴിൽ വരുന്നത്.

വ്യത്യസ്ത പലിശ നിരക്കാണ് ഇവയ്ക്ക് ലഭിക്കുന്നത്. 15 ലക്ഷം രൂപ മുതൽ 2 കോടി വരെയുള്ള നിക്ഷേപത്തിന് കീഴിൽ 2 വർഷത്തേക്ക് മുതിർന്ന പൗരന്മാരായ നിക്ഷേപകര്‍ക്ക് 7.9 ശതമാനം പലിശ ലഭിക്കും. സാധാരണ നിക്ഷേപകര്‍ക്ക് 7.4 ശതമാനം പലിശ ലഭിക്കും. സര്‍വോത്തം പദ്ധതിക്ക് 15 ലക്ഷം- 2 കോടിക്കിടയിലുള്ള നിക്ഷേപത്തിന് 1 വര്‍ഷ കാലയളവിൽ മുതിര്‍ന്ന പൗരന്മാര്‍ക്ക് 7.60 ശതമാനം പലിശ ലഭിക്കും. സാധാരണ നിക്ഷേപകര്‍ക്ക് 7.1 ശതമാനമാണ് പലിശ.

എസ്ബിഐ വീകെയർ സ്ഥിര നിക്ഷേപം

മുതിര്‍ന്ന പൗരന്മാര്‍ക്ക് പ്രത്യേക പലിശ നിരക്ക് നല്‍കുന്ന പ​ദ്ധതിയാണ് എസ്ബിഐ വീകെയര്‍ സ്ഥിര നിക്ഷേപം. 5 വര്‍ഷം മുതല്‍ 10 വര്‍ഷത്തേക്ക് മുതിര്‍ന്ന പൗരന്മാര്‍ക്കാണ് വീകെയര്‍ പദ്ധതി പ്രകാരം അധിക പലിശ നല്‍കുന്നത്. മുതിര്‍ന്ന പൗരന്മാര്‍ക്ക് സാധാരണ ലഭിക്കുന്ന 0.50 ശതമാനം അധിക നിരക്കിനൊപ്പം വീകെയര്‍ പദ്ധതി 0.50 ശതമാനം പലിശ കൂടി നല്‍കും.

അതായത്, 5 മുതല്‍ 10 വര്‍ഷത്തേക്ക് റെഗുലര്‍ നിക്ഷേപകരേക്കാള്‍ 1 ശതമാനം പലിശ അധികമായി ലഭിക്കും. ഇതു പ്രകാരം 7.50 ശതമാനാണ് മുതിര്‍ന്ന പൗരന്മാര്‍ക്ക് 5-10 വര്‍ഷത്തേക്ക് ലഭിക്കുന്നത്. സെപ്റ്റംബർ 30 വരെ പദ്ധതിയിൽ നിക്ഷേപിക്കാം.