മികച്ച പലിശയ്ക്കുള്ള തിരച്ചലിലാണോ? ഹ്രസ്വകാലത്തേക്ക് 5 ലക്ഷം രൂപ വരെ നിക്ഷേപിക്കാൻ 6 ബാങ്കുകളിതാ

2022 മേയ് മുതൽ നിക്ഷേപ പലിശ നിരക്കുകൾ ഉയരുന്നുണ്ടെങ്കിലും റിപ്പോ നിരക്കിന് ആനുപാതികമായി പലിശ നിരക്കുകൾ സ്ഥിര നിക്ഷേപത്തിന് ലഭിച്ചിട്ടില്ല. പ്രമുഖ പൊതുമേഖലാ ബാങ്കുകളും സ്വകാര്യ ബാങ്കുകളും നിക്ഷേപകർക്ക് ഉയർന്ന പലിശ നൽകുന്നതിൽ വീഴ്ച തുടരുകയാണ്.

അതോടൊപ്പം ബാങ്കുകൾ പലിശ നിരക്കുകൾ കുറയ്ക്കാനും ആരംഭിച്ചിട്ടുണ്ട്. ഇതേ സാഹചര്യത്തിൽ നിലവിൽ മുതിർന്ന പൗരൻമാരായ നിക്ഷേപകർക്ക് 9 ശതമാനത്തിന് മുകളിൽ ഉയർന്ന സ്ഥിര നിക്ഷേപ പലിശ നിരക്കുകൾ നൽകുന്ന ബാങ്കുകളുമുണ്ട്. ഹ്രസ്വകാല നിക്ഷേപത്തിന് ഉചിതമായ ഈ ബാങ്കുകളെ പരിചയപ്പെടാം.

യൂണിറ്റി സ്മോൾ ഫിനാൻസ് ബാങ്ക്

യൂണിറ്റി സ്മോൾ ഫിനാൻസ് ബാങ്ക് റെ​ഗുലർ നിക്ഷേപകർക്ക് 9 ശതമാനം വരെ പലിശ സ്ഥിര നിക്ഷേപത്തിന് നൽകുന്നുണ്ട്. മുതിർന്ന പൗരന്മാർക്ക് 9.50 ശതമാനം വരെ പലിശ ലഭിക്കും. 1001 ദിവസത്തേക്കുള്ള സ്ഥിര നിക്ഷേപത്തിനാണ് ബാങ്ക് ഏറ്റവും ഉയർന്ന പലിശ നിരക്ക് നൽകുന്നത്. മുതിർന്ന പൗരന്മാർക്ക് 181 മുതൽ 201 ദിവസം വരെയുള്ള കാലയളവിലും 501 ദിവസ കാലയളവിലും ബാങ്ക് 9.25 ശതമാനം പലിശ നൽകുന്നുണ്ട്.

ഫിൻകെയർ സ്മോൾ ഫിനാൻസ് ബാങ്ക്

ഫിൻകെയർ സ്മോൾ ഫിനാൻസ് ബാങ്കിലെ ഉയർന്ന പലിശ 9.11 ശതമാനം ആണ്. റെ​ഗുലർ നിക്ഷേപകർക്ക് 3 ശതമാനം മുതൽ 8.51 ശതമാനം വരെയും മുതിർന്ന പൗരന്മാർക്ക് 3.60 ശതമാനം മുതൽ 9.11 ശതമാനം വരെയും പലിശ ലഭിക്കും. 1000 ദിവസത്തേക്കാണ് മുതിർന്ന പൗരന്മാർക്ക് ഉയർന്ന നിരക്കായ 9.11 ശതമാനം പലിശ നൽകുന്നത്.

ജന സ്മോൾ ഫിനാൻസ് ബാങ്ക്

ജന സ്മോൾ ഫിനാൻസ് ബാങ്കിൽ മുതിർന്ന പൗരന്മാർക്ക് 4.25 ശതമാനം മുതൽ 9 ശതമാനം വരെ പലിശ ലഭിക്കും. 366 മുതൽ 499 ദിവസം വരെയുള്ളയും 501 ദിവസം മുതൽ രണ്ട് വർഷം, 500 ദിവസം എന്നിങ്ങനെ 3 കാലാവധികളിൽ 9 ശതമാനം പലിശ ലഭിക്കും.

സൂര്യോദയ് സ്മോൾ ഫിനാൻസ് ബാങ്ക്

9.60 ശതമാനം വരെയാണ് സൂര്യോദയ് സ്‌മോൾ ഫിനാൻസ് ബാങ്ക് സ്ഥിര നിക്ഷേപങ്ങൾക്ക് നൽകുന്ന പലിശ നിരക്ക്. അഞ്ച് വർഷ കാലാവധിയുള്ള സ്ഥിര നിക്ഷേപങ്ങൾക്ക് മുതിർന്ന പൗരന്മാർക്ക് ഈ പലിശ ലഭിക്കും. 4.50 ശതമാനം മുതൽ 9.60 ശതമാനം വരെയാണ് പലിശ നിരക്ക്. 999 ദിവസത്തെ കാലാവധിക്ക് 9.50 ശതമാനവും ഒരു വർഷം മുതൽ രണ്ട് വർഷം വരെയുള്ള കാലയളവിന് ഒമ്പത് ശതമാനവും പലിശ നൽകുന്നു.

ഇക്വിറ്റാസ് സ്മോൾ ഫിനാൻസ് ബാങ്ക്

888 ദിവസ കാലാവധിയുള്ള സ്ഥിര നിക്ഷേപങ്ങൾക്ക് ഇക്വിറ്റാസ് സ്മോൾ ഫിനാൻസ് ബാങ്ക് 9 ശതമാനം പലിശ നൽകും. റെ​ഗുലർ നിക്ഷേപകർക്ക് 8.5 ശതമാനം വരെ പലിശ നിരക്ക് ലഭിക്കും. പുതുക്കിയ പലിശ നിരക്കുകൾ 2023 ഏപ്രിൽ 11 മുതൽ പ്രാബല്യത്തിൽ വന്നു.

ഇസാഫ് സ്മോൾ ഫിനാൻസ് ബാങ്ക്

ഇസാഫ് സ്മോൾ ഫിനാൻസ് ബാങ്ക് മുതിർന്ന പൗരന്മാർക്ക് രണ്ട് വർഷം മുതൽ മൂന്ന് വർഷത്തിൽ താഴെ വരെയുള്ള കാലയളവിൽ 9 ശതമാനം പലിശ നിരക്ക് നൽകുന്നുണ്ട്. അതേസമയം സാധാരണ പൗരന്മാർക്ക് 8.50 ശതമാനം പലിശ നിരക്കിൽ ഇസാഫ് ബാങ്കിൽ സ്ഥിര നിക്ഷേപമിടാം.

5 ലക്ഷം രൂപ വരെ നിക്ഷേപിക്കാം

സ്മോൾ ഫിനാൻസ് ബാങ്കുകൾ സുരക്ഷിതമാണോ എന്നാണ് പലരെയും അലട്ടുന്ന ചോദ്യം. റിസർവ് ബാങ്ക് ഓഫ് ഇന്ത്യയുടെ അം​ഗീകാരമുള്ള ഷെഡ്യൂൾഡ് കോമേഷ്യൽ ബാങ്കുകളാണ് സ്മോൾ ഫിനാൻസ് ബാങ്കുകളും. തുടക്കകാരായതിനാൽ ധനസമാഹരണത്തിനായാണ് ബാങ്കുകൾ ഉയർന്ന പലിശ നൽകുന്നത്. റിസർവ് ബാങ്കിന് മേൽനോട്ടമുള്ളതിനാൽ ഡെപ്പോസിറ്റ് ആൻഡ് ഇൻഷൂറൻസ് ക്രെഡിറ്റ് ​ഗ്യാരണ്ടി കോർപ്പറേഷന്റെ 5 ലക്ഷം രൂപ വരെയുള്ള ഇൻഷൂറൻസ് ഈ ബാങ്കുകളിലെ നിക്ഷേപങ്ങൾക്കും ലഭിക്കും.