കേന്ദ്ര സർക്കാർ പെൻഷൻ പദ്ധതിയിൽ ചേരാൻ ഒരു മാസം കൂടി അവസരം; മുടങ്ങാത്ത പെൻഷൻ വിട്ടുകളയണോ

ശരീരം അനുവദിക്കുന്നത് വരെ തൊഴിലെടുക്കുക എന്നതാണ് അസംഘടിത മേഖലയിലെ ശീലം. എന്നാൽ 60 വയസാണ് പൊതുവിൽ മിക്ക ജോലികൾക്കുമുള്ള വിരമിക്കൽ പ്രായമായി കണക്കാക്കുന്നത്. വിരമിച്ച ശേഷമുള്ള ജീവനോപാധിയായി മിക്കവരും ആശ്രയിക്കുന്നത് പെൻഷനുകളെയാണ്. നിരവധിയായ പെൻഷൻ പദ്ധതികൾ ഇന്നുണ്ട്. നിശ്ചിത തുക മാസ പെൻഷൻ ഉറപ്പു നൽകുന്നവയും ഇല്ലാത്തവയുമായി പെൻഷൻ പദ്ധതികൾ കാണാം.

മാസത്തിൽ 5,000 രൂപ വരെ ​ഗ്യാരണ്ടീഡ് പെൻഷൻ നൽകുന്ന പദ്ധതിയാണ് കേന്ദ്രസർക്കാറിന്റെ അടൽ പെൻഷൻ യോജന. ​ഗുണഭോക്താവിനൊപ്പം കേന്ദ്ര സർക്കാറും വിഹിതം അടച്ചാണ് 60 വയസിന് ശേഷം മാസത്തിൽ പെൻഷൻ ലഭിക്കുക. പുതിയ നിർദ്ദേശ പ്രകാരം നിശ്ചിത വരുമാനക്കാർക്ക് അടൽ പെൻഷൻ യോജനയിൽ ചേരാൻ ഇനി ഒരു മാസം മാത്രമാണ് സമയപരിധി. 

യോ​ഗ്യത; 18 വയസ് പൂർത്തിയായവർക്കും 40 വയസ് കടക്കാത്തവർക്കും പദ്ധതിയിൽ ചേരാം. ഒരാള്‍ക്ക് ഒരു പെൻഷൻ അക്കൗണ്ട് സാധിക്കുകയുള്ളൂ

മാസ അടവ്; തിരഞ്ഞെടുക്കുന്ന പെൻഷൻ, ചേരുന്നയാളുടെ പ്രായം എന്നിവ പരി​ഗണിച്ചാണ് മാസ വിഹിതം കണക്കാക്കുക. 1,000, 2,000, 3,000, 4,000, 5,000 എന്നിങ്ങനെയാണ് അടൽ പെൻഷൻ യോജനയിൽ നിന്ന് ലഭിക്കുന്ന മാസ പെൻഷൻ. 42 രൂപ മുതൽ 1,318 രൂപ വരെ വ്യത്യസ്ത മാസ അടവുകളുണ്ട്.

18 വയസില്‍ ചേരുന്നയാള്‍ മാസം 1,000 രൂപ പെൻഷൻ തിരഞ്ഞെടുത്താൽ 42 രൂപയാണ് 20 വർഷം അടയ്ക്കേണ്ടത്. 39-ാം വയസില്‍ ചേരുന്നയാള്‍ക്ക് മാസം 5,000 രൂപ പെൻഷൻ ലഭിക്കണമെങ്കിൽ 1,318 രൂപ മാസം അടയ്ക്കണം. 

എങ്ങനെ ചേരാം; പദ്ധതിയിൽ ചേരാന്‍ സേവിംഗ്‌സ് അക്കൗണ്ട് ആവശ്യമാണ്. ബാങ്കിൽ നിന്ന് പദ്ധതിയിൽ ചേരാൻ സാധിക്കും.സേവിംഗ്‌സ് അക്കൗണ്ടില്‍ നിന്ന് ഓട്ടോ ഡെബിറ്റ് വഴിയാണ് മാസത്തില്‍ വിഹിതം അടവ് നടക്കുക. ആദ്യ അടവ് അടച്ച ദിവസമാണ് മാസ അടവിനുള്ള തീയതിയായി കണക്കാകുക. 20വർഷം ചുരുങ്ങിയത് വിഹിതം അടയ്ക്കണം

പിഴ; മാസത്തില്‍ പെൻഷൻ വിഹിതം അടയ്ക്കാൻ സാധിച്ചില്ലെങ്കിൽ പിഴ ഈടാക്കും. 1 രൂപ മുതല്‍ 10 രൂപ വരെയാണ് പിഴ. വിഹിതം അടയ്ക്കാതിരുന്നാല്‍ 6 മാസത്തേക്ക് അടൽ പെൻഷൻ യോജന അക്കൗണ്ട് മരവിപ്പിക്കും. 12 മാസത്തിന് ശേഷം അക്കൗണ്ട് അവസാനിപ്പിക്കും. 

പെൻഷൻ തുകയുടെ മൂല്യം

30 വയസുള്ളൊരാള്‍ പദ്ധതിയില്‍ ചേര്‍ന്നു കഴിഞ്ഞാല്‍ അടുത്ത 30 വര്‍ഷത്തിന് ശേഷമാണ് പെന്‍ഷന്‍ ലഭിക്കുക. പണപ്പെരുപ്പം ഉയരുന്നതിന് അനുസരിച്ച് 30 വര്‍ഷത്തിന് ശേഷം 5000 രൂപയുടെ വാങ്ങല്‍ ശേഷി കുറയും. 7 ശതമാനം പണപ്പെരുപ്പ നിരക്ക് കണക്കാക്കിയാല്‍ 30 വയസുള്ളൊരാള്‍ 60ാം വയസില്‍ 5000 രൂപ പെന്‍ഷന്‍ വാങ്ങുമ്പോള്‍ അത് ഇന്നത്തെ 656.83 രൂപയ്ക്ക് തുല്യമായിരിക്കും.

31 വര്‍ഷത്തിന് ശേഷം 613.86 രൂപയായും 34 വര്‍ഷത്തിന് ശേഷം 501 രൂപയായും മൂല്യം കുറയും. 75ാം വയസില്‍ പെന്‍ഷന്‍ വാങ്ങുമ്പോള്‍ 500 രൂപയ്ക്ക് 238 രൂപയുടെ മൂല്യമാണ് ഉണ്ടാവുന്നത്. 

ഒരു മാസത്തിനുള്ളിൽ

കേന്ദ്രസര്‍ക്കാറിന്റെ പുതിയ തീരുമാനം പ്രകാരം ആദായ നികുതി അടയ്ക്കുന്നവര്‍ക്ക് ഒക്ടോബര്‍ 1 ന് ശേഷം അടല്‍ പെന്‍ഷന്‍ യോജനയില്‍ ചേരാന്‍ സാധിക്കില്ല. 60 വയസ് കഴിഞ്ഞവര്‍ക്ക് മാസം 1,000 മുതല്‍ 5000 രൂപ വരെ പെന്‍ഷന്‍ നല്‍കുന്ന പദ്ധതിയാണ് അടല്‍ പെന്‍ഷന്‍ യോജന. 2022 ഓ​ഗസ്റ്റ് പത്തിന് പുറത്തിറക്കിയ നോട്ടിഫിക്കേഷനിലാണ് ഇക്കാര്യം വ്യക്തമാക്കിയിട്ടുള്ളത്. ഇതിനാൽ പദ്ധതിയിൽ ചേരാനാ​ഗ്രഹിക്കുന്നവർ സെപ്റ്റംബർ മാസത്തിനുള്ളിൽ എൻറോൾ ചെയ്യണം.