നിരക്കുയർത്തി ഈ മുൻനിര ബാങ്ക്; മുതിർന്ന പൗരന്മാർക്ക് നേട്ടം; സ്ഥിര നിക്ഷേപത്തിന് 8.01% വരെ പലിശ നേടാം

റിസർവ് ബാങ്ക് ഓഫ് ഇന്ത്യയുടെ ഏപ്രിലിലെ പണനയ അവലോകന യോ​ഗ തീരുമാനങ്ങൾ വ്യാഴാഴ്ച പുറത്ത് വരാനിരിക്കുകയാണ്. 25 അടിസ്ഥാന നിരക്ക് വർധനവാണ് പൊതുവിൽ പ്രതീക്ഷിക്കുന്നത്. ഈ നിരക്ക് വർധനവോടെ നിക്ഷേപ പലിശ നിരക്കിലും വായ്പ പലിശ നിരക്കിലും വർധനവ് പ്രതീക്ഷിക്കുന്നുണ്ട്.

എന്നാൽ പലിശ നിരക്ക് പ്രഖ്യാപനം വരുന്നതിന് മുൻപ് നിക്ഷേപ പലിശ നിരക്കുയർത്തിയിരിക്കുകയാണ് മുൻനിര സ്വകാര്യ ബാങ്കായ ആക്സിസ് ബാങ്ക്. പുതുക്കിയ നിരക്ക് പ്രകാരം മുതിർന്ന പൗരന്മാർക്ക് 8.01 ശതമാനം വരെ പലിശ ലഭിക്കും.

ആക്സിസ് ബാങ്ക് സ്ഥിര നിക്ഷേപം

ആക്‌സിസ് ബാങ്ക് ഏപ്രിൽ നാലിനാണ് 2 കോടിയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്ക് ഉയർത്തിയത്. 7 ദിവസം മുതൽ 10 വർഷം വരെ കാലാവധിയുള്ള നിക്ഷേപങ്ങൾക്ക് 3.50 ശതമാനം മുതൽ 7 ശതമാനം വരെ പലിശ ലഭിക്കും. മുതിർന്ന പൗരന്മാർക്ക് 6 ശതമാനം മുതൽ 7.75 ശതാനം വരെയും പലിശ ലഭിക്കും. പുതുക്കിയ പലിശ നിരക്കിൽ ഏറ്റവും കൂടുതൽ നേട്ടം ലഭിക്കുന്നത് മുതിർന്ന പൗരന്മാർക്കാണ്.

പലിശ നിരക്ക്

7 ദിവസം മുതൽ 45 ദിവസം വരെ കാലാവധിയുള്ള സ്ഥിര നിക്ഷേപത്തിന് 3.50 ശതമാനമാണ് പലിശ നിരക്ക്. 46 ദിവസം മുതൽ 60 ദിവസം വരെ കാലാവധിയുള്ള നിക്ഷേപങ്ങൾക്ക് ആക്സിസ് ബാങ്ക് 4 ശതമാനം പലിശ നൽകും. 61 ദിവസം മുതൽ മൂന്ന് മാസം വരെയുള്ള നിക്ഷേപങ്ങൾക്ക് 4.50 ശതമാനവും മൂന്ന് മാസം മുതൽ 6 മാസം വരെയുള്ള 4.75 ശതമാനം പലിശയും ലഭിക്കും.

1 വർഷം മുതൽ 1 വർഷം 24 ദിവസം വരെ കാലാവധിയുള്ള നിക്ഷേപങ്ങൾക്ക് 6.75 ശതമാനം പലിശ ലഭിക്കും. 1 വർഷം 25 ദിവസം മുതൽ 13 മാസം വരെ കാലാവധിയുള്ള നിക്ഷേപങ്ങൾക്ക് ആക്സിസ് ബാങ്ക് 7.10 പലിശ നൽകുന്നുണ്ട്. 13 മാസം മുതൽ 2 വർഷം വരെയുള്ള നിക്ഷേപങ്ങൾക്ക് 7.15 ശതമാനം പലിശ ലഭിക്കും.

2 വർഷം മുതൽ 30 മാസം വരെയുള്ള നിക്ഷേപങ്ങൾക്ക് 7.26 ശതമാനം പലിശയാണ് ലഭിക്കുക. 30 മാസം മുതൽ 10 വർഷം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് 7 ശതമാനം ആണ്. 

മുതിർന്ന പൗരന്മാർക്ക്

1 വർഷം മുതൽ 1 വർഷം 24 ദിവസം കാലാവധിയുള്ള സ്തിര നിക്ഷേപങ്ങൾക്ക് 7.50 ശതമാനം പലിശ മുതിര്‍ന്ന പൗരന്മാര്‍ക്ക് ലഭിക്കും. 1 വർഷം 25 ദിവസം മുതൽ 13 മാസം വരെ കാലാവധിയുള്ള നിക്ഷേപങ്ങൾക്ക് 7.85 ശതമാനം പലിശ ലഭിക്കും.

13 മാസം മുതൽ 2 വർഷം വരെയുള്ള നിക്ഷേപങ്ങൾക്ക് 7.90 ശതമാനം പലിശ ലഭിക്കും. 2 വര്‍ഷം 30 മാസത്തേക്കാണ് മുതിർന്ന പൗരന്മാർക്ക് ഉയർന്ന പലിശയായ 8.01 ശതമാനം പലിശ ലഭിക്കുന്നത്. 3 വര്‍ഷം മുതല്‍ 10 വര്‍ഷത്തേക്ക് 7.75 ശതമാനം പലിശ നേടാം. 

സേവിം​ഗ്സ് അക്കൗണ്ട് നിരക്കിലും മാറ്റം

ആക്‌സിസ് ബാങ്ക് ശമ്പള, സേവിംഗ്‌സ് അക്കൗണ്ടുകൾക്കുള്ള നിരക്കുകൾ പുതുക്കിയിട്ടുണ്ട്. മിനിമം ബാലൻസ് മാനദണ്ഡങ്ങൾ പരിഷ്കരിച്ചും പിഴ ഉയർത്തുകയും ചെയ്തു. സൗജന്യ പണമിടപാട് പരിധി, ഡിഡി ഇഷ്യൂവൻസ് ഫീസ് എന്നിവയും ഉയർത്തി. പുതിയ നിരക്കുൾ ഏപ്രിൽ 1 മുതൽ നിലവിൽ വന്നു.

പ്രസ്റ്റീജ് സേവിംഗ്‌സ് അക്കൗണ്ടുകൾക്ക് നേരത്തെ ത്രൈമാസത്തിൽ ശരാശരി മിനിമം ബാലൻസായി 75,000 രൂപയിയിരുന്നു വേണ്ടിയിരുന്നത്. ഇനി മുതൽ പ്രസ്റ്റീജ് അക്കൗണ്ട് ഉടമകൾ ശരാശരി പ്രതിമാസ ബാലൻസ് 75,000 രൂപയായി നിലനിർത്തണം. ശരാശരി ആവറേജ് മിനിമം ബാലൻസ് സൂക്ഷിക്കാത്ത അക്കൗണ്ടുകൾക്ക് ഈടാക്കുന്ന പിഴയിലും വർധനവുണ്ട്. വ്യത്യസ്ത അക്കൗണ്ടുകൾക്ക് 50 രൂപ മുതൽ 600 രൂപ വരെ ഈടാക്കും.