5 ലക്ഷം രൂപ വരെ സുരക്ഷിതമായി നിക്ഷേപിക്കാം; 2 വര്‍ഷത്തേക്ക് 7.85% പലിശ കിട്ടും; സ്ഥിര നിക്ഷേപം നോക്കുന്നോ

പ്രായമാകുന്തോറും നിക്ഷേപത്തിൽ റിസ്കെടുക്കുന്നത് പൊതുവെ കുറഞ്ഞു വരും. മുതിർന്ന പൗരന്മാർ നിക്ഷേപത്തെ കൂടുതലായി ആശ്രയിക്കുന്നതും ബാങ്കുകൾ മുതിർന്ന പൗരന്മാർക്ക് അധിക നിരക്ക് നൽകുന്നതിനും കാരണം ഇതു തന്നെ. മുതിർന്ന പൗരന്മാർക്ക് രാജ്യത്തെ മുൻനിര ബാങ്കുകളേക്കാൾ പലിശ നൽകുന്നൊരു സ്വകാര്യ ബാങ്കാണ് ആക്സിസ് ബാങ്ക്. ബാങ്കിന്റെ പലിശ നിരക്കും. 5 ലക്ഷം രൂപ വിവിധ കാലയളവിൽ നിക്ഷേപിച്ചാൽ എത്ര രൂപ പലിശ ലഭിക്കുമെന്നും നോക്കാം.

മികച്ച പലിശ

ആ​ഗസ്റ്റ് 1 മുതൽ നിലവിൽ വന്ന ആക്സിസ് ബാങ്കിന്റെ പുതുക്കിയ നിരക്ക് പ്രകാരം മുതിര്‍ന്ന പൗരന്മാര്‍ക്ക് ഏറ്റവും മികച്ച പലിശ ലഭിക്കുന്നത് 13 മാസം മുതല്‍ 2 വര്‍ഷത്തില്‍ താഴെ വരെയുള്ള കാലാവധിയിലാണ്. 7.85 ശതമാനം പലിശയാണ് ഈ കാലാവധിയില്‍ മുതിര്‍ന്ന പൗരന്മാര്‍ക്ക് ലഭിക്കുന്നത്. 7.10 ശതമാനം പലിശയാണ് റെഗുലര്‍ നിക്ഷേപകര്‍ക്ക് ഈകാലയളവില്‍ നല്‍കുന്നത്.

മറ്റു പലിശ നിരക്കുകൾ

മുതിര്‍ന്ന പൗരന്മാര്‍ക്ക് ബാങ്ക് 7 ദിവസം മുതല്‍ 10 വര്‍ഷത്തേക്കുള്ള കാലാവധിയില്‍ 3.50 ശതമാനം മുതല്‍ 7.85 ശതമാനം വരെ പലിശ നല്‍കും. 7-45 ദിവസത്തേക്കാണ് 3.50 ശതമാനം പലിശ. 46- 60 ദിവസത്തേക്ക് 4 ശതമാനവും 61 ദിവസം മുതല്‍ 3 മാസത്തില്‍ താഴെയുള്ള കാലാവധിയില്‍ 4.50 ശതമാനവും പലിശ നേടാം.

6 മാസം മുതല്‍ 9 മാസത്തില്‍ താഴെയുള്ള കാലയളവില്‍ 4.75 ശതമാനവും 9 മാസം മുതല്‍ 1 വര്‍ഷത്തില്‍ താഴെ 6.25 ശതമാനവും പലിശ നേടാം. 1 വര്‍ഷത്തിന് മുകളില്‍ 10 വര്‍ഷം വരെ മുതിര്‍ന്ന പൗരന്മാര്‍ക്ക് 7 ശതമാനത്തിന് മുകളില്‍ പലിശ ആക്‌സിസ് ബാങ്ക് നല്‍കുന്നുണ്ട്.

1 വര്‍ഷം- 1 വര്‍ഷം നാല് ദിവസത്തേക്ക 7.50 ശതമാനവും തുടര്‍ന്ന് 13 മാസത്തേക്ക് 7.55 ശതമാനം പലിശയും ലഭിക്കും. 2 വര്‍ഷം മുതല്‍ 30 വര്‍ഷത്തില്‍ താഴെ 7.80 ശതമാനം പലിശ നേടാം. 30 മാസം മുതല്‍ 10 വര്‍ഷത്തേക്ക് 7.75 ശതമാനം പലിശയും മുതിര്‍ന്ന പൗരന്മാര്‍ക്ക് ലഭിക്കും. റെഗുലര്‍ നിക്ഷേകര്‍ക്ക് 3.50 ശതമാനം മുതല്‍ 7.10 ശതമാനം പലിശയാണ് ബാങ്ക് നല്‍കുന്നത്.

എഫ്ഡി കാൽക്കുലേറ്റർ

ആക്‌സിസ് ബാങ്കില്‍ 5 ലക്ഷം രൂപ നിക്ഷേപിക്കുന്ന മുതിര്‍ന്ന പൗരന്മാര്‍ക്ക് 1 വര്‍ഷം 11 മാസം വരെയുള്ള കാലയളവില്‍ 7.85 ശതമാനം പലിശ ലഭിക്കും. ഓഗസ്റ്റ് 1 ന് 5 ലക്ഷം രൂപ നിക്ഷേപിക്കുന്ന വ്യക്തിക്ക് 2025 ജൂലായ് 1 ന് കാലാവധിയെത്തുമ്പോള്‍ 5,80,382 രൂപ നേടാനാകും. റെഗുലര്‍ നിക്ഷേപകനാണെങ്കില്‍ 5 ലക്ഷം രൂപയില്‍ നിന്ന് 5,72,243 രൂപയായി വളരും.

2 വര്‍ഷത്തേക്കാണെങ്കില്‍ 7.80 ശതമാനമാണ് പലിശ. 5 ലക്ഷം രൂപ നിക്ഷേപിച്ചാല്‍ 5,83,536 രൂപയായി വളരും. 5 വര്‍ഷത്തേക്ക് നിക്ഷേപിച്ചാൽ മുതിർന്ന പൗരന്മാർക്ക് 7.75 ശതമാനം വരെ പലിശ ലഭിക്കും. 5 ലക്ഷം വളര്‍ന്ന 7,33,921 രൂപയാകും.

ശ്രദ്ധിക്കേണ്ട കാര്യങ്ങൾ

ബാങ്കിന്റെ മൊബൈല്‍ ആപ്പ് വഴിയോ നെറ്റ് ബാങ്കിംഗ് വഴിയോ സ്ഥിര നിക്ഷേപമിടുമ്പോള്‍ 5,000 രൂപയാണ് ആവശ്യം. ബാങ്ക് ബ്രാഞ്ച് വഴി നിക്ഷേപിക്കുമ്പോള്‍ കുറഞ്ഞത് 10,000 രൂപ വേണം. കാലാവധിക്ക് മുന്‍പ് ആദ്യമായി നിക്ഷേപം പിന്‍വലിക്കുമ്പോള്‍ നിക്ഷേപിച്ച തുകയുടെ 25 ശതമാനം വരെ പിന്‍വലിക്കുന്നതിന് ആക്‌സിസ് ബാങ്ക് പിഴ ഈടാക്കില്ല. തുടര്‍ന്ന നിക്ഷേപം നേരത്തെ പിന്‍വലിക്കുകയാണെങ്കില്‍ 1 ശതമാനം പിഴ ഈടാക്കും.