ഹ്രസ്വകാലത്തേക്ക് പലിശ 7.50% വരെ; 1 വർഷത്തേക്ക് ഒരു ലക്ഷം രൂപ എഫ്ഡിയിട്ടാൽ എത്രത്തോളം വളരും?

ഹ്രസ്വകാല സ്ഥിര നിക്ഷേപം ഏറ്റവും ഉപകാരപ്പെടുന്നത് ഉടൻ വാരാനിരിക്കുന്ന സാമ്പത്തിക ആവശ്യങ്ങൾക്ക് ധനസമാഹരണം നടത്തുന്നവർക്കാണ്. കയ്യിലുള്ള തുക ചുരുങ്ങിയ കാലയളവിൽ നിക്ഷേപിക്കാൻ പറ്റിയൊരിടമായി ബാങ്ക് സ്ഥിര നിക്ഷേപത്തെ കാണാം.

വാരിനിരിക്കുന്ന വിവാഹ ചെലവുകൾക്ക് കരുതിയിരിക്കുന്ന തുക, വീട് നിർമാണത്തിന് സ്വരൂപിച്ച തുക തുടങ്ങി 1 വർഷത്തിനപ്പുറം ആവശ്യമായ തുക ചാഞ്ചാട്ടമില്ലാതെ വളർത്തിയെടുക്കാൻ ബാങ്കാണ് മികച്ച ഓപ്ഷൻ. 1 വർഷത്തേക്കുള്ള സ്ഥിര നിക്ഷേപത്തിന് മികച്ച പലിശ നൽകുന്ന ബാങ്കുകളെയും ഒരു ലക്ഷം രൂപ ബാങ്കിൽ എഫ്ഡിയിട്ടാൽ എത്ര രൂപ ലഭിക്കുമെന്നും പരിശോധിക്കാം.

ഇന്‍ഡസ്ഇന്‍ഡ് ബാങ്ക്

7 ദിവസം മുതല്‍ 10 വര്‍ഷത്തേക്കുള്ള സ്ഥിര നിക്ഷേപത്തിന് ഇന്‍ഡസ്ഇന്‍ഡ് ബാങ്കില്‍ 3.50 ശതമാനം മുതല്‍ 7.50 ശതമാനം വരെയാണ് ലഭിക്കുന്ന പലിശ നിരക്ക്. ഇന്‍ഡസ് ഇന്‍ഡ് ബാങ്ക് ഒരു വര്‍ഷത്തെ സ്ഥിര നിക്ഷേപത്തിന് 7.50 ശതമാനം പലിശ നല്‍കുന്നുണ്ട്. ഒരു വര്‍ഷം മുതല്‍ 2 വര്‍ഷത്തേക്ക് 7.50 ശതമാനം പലിശ ലഭിക്കും.

1 ലക്ഷം രൂപ നിക്ഷേപിക്കുന്ന വ്യക്തിക്ക് 7.50 ശതമാനം പലിശ നിരക്കില്‍ ഒരു വര്‍ഷത്തിന് ശേഷം 1,07,714 രൂപ നേടാം. മുതിര്‍ന്ന പൗരന്മാര്‍ക്ക് ഒരു വര്‍ഷത്തേക്ക് 8.25 ശതമാനമാണ് പലിശ നിരക്ക്. 1 ലക്ഷം നിക്ഷേപിച്ചാല്‍ 1,08,456 രൂപ ലഭിക്കും.

ആര്‍ബിഎല്‍ ബാങ്ക്

ആര്‍ബിഎല്‍ ബാങ്കില്‍ 7 ദിവസം മുതല്‍ 10 വര്‍ഷത്തേക്ക് 3.50 ശതമാനത്തിനും 8 ശതമാനത്തിനും ഇയില്‍ പലിശ ലഭിക്കും. ആര്‍ബിഎല്‍ ബാങ്കില്‍ ഒരു വര്‍ഷ കാലാവധിയില്‍ സ്ഥിര നിക്ഷേപത്തിന് 7.50 ശതമാനം പലിശ ലഭിക്കും. 1 ലക്ഷം രൂപ നിക്ഷേപിച്ചാല്‍ 7,500 രൂപ പലിശ അടക്കം കാലാവധിയില്‍ 1,07,500 രൂപ ലഭിക്കും.

മുതിര്‍ന്ന പൗരന്മാര്‍ക്ക് ഈ കാലയളവില്‍ 8 ശതമാനം പലിശ ലഭിക്കും. ഒരു ലക്ഷം രൂപ നിക്ഷേപിച്ചാല്‍ 108,000 രൂപ ലഭിക്കും. ഉയര്‍ന്ന നിരക്കായ 8 ശതമാനം ലഭിക്കുന്നത് 18 മാസം മുതല്‍ 24 മാസ കാലയളവിലാണ്.

ബന്‍ഡന്‍ ബാങ്ക്

സ്ഥിര നിക്ഷേപത്തിന് 3 ശതമാനം മുതല്‍ 7.85 ശതമാനം വരെ പലിശയാണ് ബന്‍ഡന്‍ ബാങ്ക് നല്‍കുന്നത്. ഒരു വര്‍ഷത്തേക്കുള്ള സ്ഥിര നിക്ഷേപത്തിന് ബന്‍ഡന്‍ ബാങ്ക് 7.25 ശതമാനം പലിശ നല്‍കും. 1 ലക്ഷം രൂപ നിക്ഷേപിച്ചാല്‍ കാലാവധിയില്‍ 1,07,397 രൂപ ലഭിക്കും. മുതിര്‍ന്ന പൗരന്മാര്‍ക്ക് 7.75 ശതമാനം പലിശ ലഭിക്കും. ഉയര്‍ന്ന നിരക്കായ 7.85 ശതമാനം പലിശ ലഭിക്കുന്നത് 500 ദിവസത്തെ സ്ഥിര നിക്ഷേപത്തിനാണ്.

യെസ് ബാങ്ക്

7 ദിവസത്തിനും 10 വര്‍ഷത്തിനും ഇടയിലുള്ള കാലാവധിയില്‍ 3.25 ശതമാനം മുതല്‍ 7.75 ശതമാനം വ രെയാണ് യെസ് ബാങ്ക് റെഗുലര്‍ നിക്ഷേപകര്‍ക്ക് നല്‍കരുന്ന പരമാവധി നിരക്ക്. യെസ് ബാങ്കില്‍ 7.25 ശതമാനമാണ് ഒരു വര്‍ഷത്തെ സ്ഥിര നിക്ഷേപത്തിനുള്ള പലിശ നിരക്ക്. 1 ലക്ഷം രൂപ നിക്ഷേപിച്ചാല്‍ കാലാവധിയില്‍ 1,07,397 രൂപ ലഭിക്കും. മുതിര്‍ന്ന പൗരന്മാര്‍ക്ക് 7.75 ശതമാനം പലിശ ലഭിക്കും.

ഉയര്‍ന്ന നിരക്കായ 7.75 ശതമാനം ലഭിക്കുന്നത് 18 മാസം മുതല്‍ 24 മാസത്തില്‍ താഴെയുള്ള കാലയളവിലാണ്.

ഡിസിബി ബാങ്ക്

7 ദിവസത്തിനും 10 വര്‍ഷത്തിനും ഇടയില്‍ 3.75 ശതമാനം മുതല്‍ 7.90 ശതമാനം വരെ പലിശ ഡിസിബി ബാങ്ക് നല്‍കും. 7.15 ശതമാനം പലിശയാണ് ഒരു വര്‍ഷത്തെ സ്ഥിര നിക്ഷേപത്തിനായി ഡിസിബി ബാങ്ക് നല്‍കുന്നത്.

1 ലക്ഷത്തിന്റെ നിക്ഷേപത്തിന് പലിശ സഹിതം 1,07,291 രൂപ കാലാവധിയില്‍ ലഭിക്കും. മുതിര്‍ന്ന പൗരന്മാര്‍ക്ക് 7.65 ശതമാനം പലിശ ലഭിക്കും. 25 മാസം മുതല്‍ 38 മാസത്തേക്കാണ് ഉയര്‍ന്ന നിരക്കായ 7.90 ശതമാനം പലിശ ലഭിക്കുന്നത്.