സ്ഥിര നിക്ഷേപത്തിന് മികച്ച പലിശ 3 വർഷത്തേക്ക്; 9.10% വരെ പലിശ നൽകുന്നത് 5 ബാങ്കുകൾ; നോക്കുന്നോ

റിസർവ് ബാങ്ക് മോണിറ്ററി പോളിസി കമ്മിറ്റി യോ​ഗം തുടർച്ചയായ നാലാം തവണയും പലിശ നിരക്കുകൾ മാറ്റമില്ലാതെ നിലനിർത്തുകയാണ്. റിപ്പോ നിരക്ക് മാറ്റമില്ലാതെ തുടരുന്നത് സ്ഥിര നിക്ഷേപകരുടെ നിക്ഷേപ പലിശ നിരക്കിന് അനുകൂലമായ കാര്യമല്ല. എങ്കിലും പെട്ടന്ന് പലിശ നിരക്കിൽ ഇടിവുണ്ടാകില്ലെന്നാണ് സാമ്പത്തിക വിദ​ഗ്ധരുടെ അനുമാനം.

പലിശ നിരക്ക് വർധനവവും പ്രതീക്ഷിക്കാനാകില്ല. ഈ സാഹചര്യത്തിൽ മികച്ച പലിശ നിരക്ക് ലഭിക്കുന്ന സ്ഥിര നിക്ഷേപങ്ങളെ കണ്ടെത്തുകയാണ് നിക്ഷേപകർ ചെയ്യേണ്ടത്. സമീപ ഭാവിയിൽ പലിശ നിരക്കുയർത്തിയ 5 സ്മോൾ ഫിനാൻസ് ബാങ്കുകളുടെ പലിശ നിരക്ക് അവലോകനം ചെയ്താൽ 2 മുതൽ 3 വർഷത്തേക്കാണ് മികച്ച പലിശ നൽകുന്നതെന്ന് കാണാം.

സൂര്യോദയ് സ്‌മോൾ ഫിനാൻസ് ബാങ്ക്

ഓഗസ്റ്റ് 7 നാണ് സൂര്യോദയ് സ്‌മോൾ ഫിനാൻസ് ബാങ്ക് അവസാനമായി സ്ഥിര നിക്ഷേപങ്ങളുടെ പലിശ നിരക്ക് ഉയർത്തിയത്. മുതിർന്ന പൗരന്മാർക്ക് 9.10 ശതമാനം വരെ സൂര്യോദയ് സ്‌മോൾ ഫിനാൻസ് ബാങ്ക് പലിശ നൽകുന്നു. റെ​ഗുലർ നിക്ഷേപകർക്ക് 8.60 ശതമാനം പലിശ ലഭിക്കും, 2 വർഷം മുതൽ 3 വർഷം വരെയുള്ള കാലയളവിലേക്കാണ് ഈ പലിശ നിരക്ക് ലഭിക്കുന്നത്.

ഇക്വിറ്റാസ് സ്‌മോൾ ഫിനാൻസ് ബാങ്ക്

ഇക്വിറ്റാസ് സ്‌മോൾ ഫിനാൻസ് ബാങ്കിൽ 7 ദിവസം മുതൽ 10 വർഷത്തേക്ക് മുതിർന്ന പൗരന്മാർക്ക് 4 ശതമാനം മുതൽ 9 ശതമാനം വരെ പലിശ ലഭിക്കും. റെ​ഗുലർ നിക്ഷേപകർക്ക് 444 ദിവസത്തേക്കുള്ള സ്ഥിര നിക്ഷേപത്തിന് ഇക്വിറ്റാസ് സ്‌മോൾ ഫിനാൻസ് ബാങ്ക് 8.50 ശതമാനവും 888 ദിവസത്തേക്ക് 8.25 ശതമാനവും പലിശ നൽകും. മുതിർന്ന പൗരന്മാർക്ക് 444 ദിവസത്തേക്ക് 9 ശതമാനം പലിശ ലഭിക്കും.

ഓഗസ്റ്റ് 21 മുതൽ ഈ നിരക്കുകൾ പ്രാബല്യത്തിലുണ്ട്.

ഫിൻകെയർ സ്മോൾ ഫിനാൻസ് ബാങ്ക്

ഫിൻകെയർ സ്മോൾ ഫിനാൻസ് ബാങ്കും 9 ശതമാനത്തിന് മുകളിൽ പലിശ നിരക്ക് നൽകുന്നുണ്ട്. സെപ്റ്റംബർ 21 നാണ് ബാങ്ക് നിക്ഷേപ പലിശ നിരക്കുയർത്തിയത്. 750 ദിവസ കാലാവധിയിൽ റെ​ഗുലർ നിക്ഷേപകർക്ക് 8.51 ശതമാനം പലിശ ലഭിക്കും. മുതിർന്ന പൗരന്മാർക്കിത് 9.11 ശതമാനമാണ്.

എയു സ്മോൾ ഫിനാൻസ് ബാങ്ക്

ഓഗസ്റ്റ് 16 നാണ് എയു സ്മോൾ ഫിനാൻസ് ബാങ്ക് അവസാനമായി നിക്ഷേപ പലിശ നിരക്ക് ഉയർത്തിയത്. റെ​ഗുലർ നിക്ഷേപകർക്ക് 24 മാസം 1 ദിവസം മുതൽ 36 മാസം വരെയുള്ള കാലയളവിലേക്ക് 8 ശതമാനം പലിശ ലഭിക്കും. മുതിർന്ന പൗരന്മാർക്ക് അതേ കാലയളവിൽ 8.50 ശതമാനം പലിശ ലഭിക്കും.

ഉത്കർഷ് സ്മോൾ ഫിനാൻസ് ബാങ്ക്

റെ​ഗുലർ നിക്ഷേപകർക്ക് ഉത്കർഷ് സ്മോൾ ഫിനാൻസ് ബാങ്കിൽ ലഭിക്കുന്ന ഏറ്റവും ഉയർന്ന പലിശ നിരക്ക് 8.50 ശതമാനം ആണ്. മുതിർന്ന പൗരന്മാർക്ക് 9.10 ശതമാനം പലിശയും ലഭിക്കും. 2 വർഷം മുതൽ 3 വർഷം വരെ കാലാവധിയുള്ള നിക്ഷേപങ്ങൾക്കാണ് ഈ ഉയർന്ന നിരക്ക് ലഭിക്കുന്നത്. അതേസമയം നിക്ഷേപം നേരത്തെ പിൻവലിച്ചാൽ 1 ശതമാനം പിഴ പലിശ ലഭിക്കും. 7 ദിവസത്തിനുള്ളിൽ നിക്ഷേപം അവസാനിപ്പിക്കുന്നതിന് പിഴ ബാധകമല്ല.

നിക്ഷേപം സുരക്ഷിതം

നിക്ഷേപ സമാഹരണത്തിനായാണ് സ്മോൾ ഫിനാൻസ് ബാങ്കുകൾ ഉയർന്ന പലിശ നൽകുന്നത്. നിക്ഷേപങ്ങൾക്ക് റിസർവ് ബാങ്ക് സബ്സിഡിയറിയായ ഡെപ്പോസിറ്റ് ഇൻഷൂറൻസ് ആൻഡ് ക്രെഡിറ്റ് ​ഗ്യാരണ്ടി കോർപ്പറേഷന്റെ പരിരക്ഷ ലഭിക്കും. നിക്ഷേപവും പലിശയും സഹിതം 5 ലക്ഷം രൂപ വരെയുള്ള തുകയ്ക്കാണ് പരിരക്ഷ ലഭിക്കുന്നത്. അതിനാൽ നിക്ഷേപത്തിന്റെ സുരക്ഷ സംബന്ധിച്ച് ആശങ്ക വേണ്ട.