ബെംഗളൂരുവില്‍ സൂര്യപ്രകാശത്തിന് വരെ വാടക! പ്രതികരണവുമായി നിരവധി പേര്‍

ബെംഗളൂരുവിലെ അമിത വീട്ടുവാടക, മലയാളികളുള്‍പ്പടെ അന്യസംസ്ഥാനക്കാരെ വലയ്ക്കുന്നു. ഇക്കാര്യം അനു എന്ന യുവതി സോഷ്യല്‍ മീഡിയയില്‍ ചൂണ്ടിക്കാട്ടി. വൈറലായ പോസ്റ്റിന് അടിയില്‍ നിരവധി പേരാണ് കമന്റുമായെത്തിയത്.

ഒരു ഫ്‌ലാറ്റ് അന്വേഷിച്ച അനുവിനോടുള്ള വീട്ടുടമയുടെ മറുപടി പ്രതിമാസം 80,000 രൂപ വാടക നല്‍കണമെന്നായിരുന്നു. സൂര്യപ്രകാശം നേരിട്ടെത്തുന്നു എന്നതായിരുന്നു അധിക നിരക്കിന്‌
കാരണം. വായുവിനും വെളിച്ചത്തിനും വരെ വാടക നല്‍കേണ്ട ഗതികേടിലാണ് തങ്ങളെന്ന് അവര്‍ പോസ്റ്റില്‍ ചൂണ്ടിക്കാട്ടി.

സൂര്യപ്രകാശം ലഭിക്കുന്ന മുറിക്കുള്ള വാടക
ബെംഗളൂരുവിന്റെ വാടക ഓരോ തവണയും തന്നെ അത്ഭുതപ്പെടുത്തുന്നതായി
അനു പറയുന്നു.  മുറിയില്‍ നല്ല സൂര്യപ്രകാശമുണ്ടെന്നും അതിനാല്‍ 80,000 രൂപ വാടക ആവശ്യപ്പെട്ടതായും അവര്‍ വിശദീകരിച്ചു.

പ്രകൃതി കനിഞ്ഞുനല്‍കുന്ന സൂര്യപ്രകാശത്തിന് പോലും തുക ഈടാക്കുന്ന പ്രവണത ഞെട്ടിക്കുന്നതാണ്.

സോഷ്യല്‍ മീഡിയ പ്രതികരണം
നിരവധി കമന്റുകളാണ് പോസ്റ്റിന് ലഭിച്ചത്. വലിയ തുക വാടക നല്‍കുന്നതിലും നല്ലത്, വീട് വാങ്ങി ഇഎംഐ അടയ്ക്കുകയാണെന്ന് ഒരാള്‍ ഉപദേശിച്ചു. സൂര്യപ്രകാശം ഇപ്പോള്‍ ഒരു പ്രീമിയം സൗകര്യമാണെന്ന് ഒരാള്‍ കുറിച്ചപ്പോള്‍ ഇതിപ്പോള്‍ മുംബൈയേക്കാള്‍ കഷ്ടമായെന്ന് മറ്റൊരാള്‍ ചൂണ്ടിക്കാട്ടി.

വീട്ടുവാടക ബെംഗളൂരുവിലെ മലയാളികള്‍ക്ക്‌ ഒരു തലവേദനയാണ്. ഐടി വളര്‍ച്ചയും മെട്രോ പോലുള്ള ആധുനിക സൗകര്യങ്ങളുമാണ് നഗരത്തിലെ വാടക വര്‍ദ്ധിപ്പിച്ചത്. സാധാരണ 20,000-25000 വരെ ഈടാക്കിയിരുന്ന ഒരു ഫ്‌ലാറ്റിന് ഇപ്പോള്‍ 40,000-45000 വരെയാണ് വാടക.

കുടുംബങ്ങള്‍ തങ്ങളുടെ സമ്പാദ്യത്തിന്റെ വലിയ ഭാഗം താമസത്തിനായി
ചെലവഴിക്കുന്നു. സര്യപ്രകാശം, വെന്റിലേഷന്‍ തുടങ്ങിയ അടിസ്ഥാന സൗകര്യങ്ങള്‍ പോലും ഇന്ന് പ്രീമിയം സൗകര്യങ്ങളാണ്.

ശമ്പളത്തേക്കാള്‍ അതിവേഗം ബഹുദൂരമാണ് വാടകയെന്ന് ഇത് സംബന്ധിച്ച റിപ്പോര്‍ട്ട് ചൂണ്ടിക്കാട്ടി.