ഓരോ ചെലവാക്കലിലും ക്യാഷ്ബാക്ക് നേടാം; മികച്ച ക്യാഷ്ബാക്കുള്ള 2 ക്രെഡിറ്റ് കാർഡുകൾ; നോക്കുന്നോ

പലിശയില്ലാതെ നിശ്ചിതകാലം പണം ഉപയോ​ഗിക്കാമെന്നതിനൊപ്പം റിവാർഡുകളാണ് ക്രെഡിറ്റ് കാർഡുകളുടെ മുഖ്യ ആകർഷണം. സൗജന്യ വിമാന ടിക്കറ്റ്, സൗജന്യമായി ലക്ഷ്വറി ഹോട്ടലിൽ താമസം എന്നിവ ലഭ്യമാക്കുന്ന ക്രെഡിറ്റ് കാർഡുകളുണ്ട്. ഇവയ്ക്ക് വലിയ ചെലവാക്കലുകൾ ആവശ്യമാണ്. സാധാരണ വരുമാനക്കാര്‍ക്ക് ക്രെ‍ഡിറ്റ് കാർഡിൽ നിന്ന് മികച്ച റിവാർഡ് നേടാൻ ക്യാഷ്ബാക്ക് ക്രെഡിറ്റ് കാര്‍ഡുകള്‍ ഉപയോഗിക്കാം.

ക്യാഷ്ബാക്ക് ക്രെഡിറ്റ് കാര്‍ഡ് ഉപയോഗിച്ച് ചെലവാക്കുമ്പോള്‍ ഓരോ തവണയും ചെലവാക്കിയ തുകയുടെ നിശ്ചിത ശതമാനം ക്യാഷ്ബാക്ക് ലഭിക്കും. ഉപയോഗിക്കുന്ന കാര്‍ഡും ഇടപാടും അനുസരിച്ച് ക്യാഷ്ബാക്കുകള്‍ 1 ശതമാനം മുതല്‍ 10 ശതമാന വരെയാണ്. ഇത്തരത്തില്‍ ലഭിക്കുന്ന തുക ബാങ്ക് അക്കൗണ്ടിലേക്കോ ഡിജിറ്റല്‍ വാലറ്റിലെക്കോ ക്രെഡിറ്റ് ചെയ്യപ്പെടും. പുതുതായി ക്രെഡിറ്റ് കാര്‍ഡ് ഉപയോഗിക്കുന്നവര്‍ക്ക് ഉപകാരപ്രദമായ മാര്‍ഗമാണിത്. ഇതോടൊപ്പം അധികം ചെലവാക്കാത്ത ഉപഭോക്താക്കള്‍ക്കും ഇവ ഉപയോഗപ്രദമാണ്.

ക്യാഷ്ബാക്ക് റിവാർഡ്

ക്യാഷ്ബാക്ക് കാർഡുകളുടെ റിവാർഡ് എവിടെ ചെലവാക്കുന്നു എന്നത് അനുസരിച്ച് വ്യത്യാസപ്പെടും. വാടക അടയ്ക്കുന്നതിനും ഇന്ധന ചെലവിനും മിക്ക ക്രെഡിറ്റ് കാർഡുകളും ക്യാഷ്ബാക്ക് നൽകുന്നില്ല. എന്നാൽ സോമാറ്റോ, സ്വി​ഗ്​​ഗി, ആമസോൺ, ഫ്ലിപ്കാർട്ട്, നൈക്ക തുടങ്ങിയ ഇ-കൊമേഴ്‌സ് പ്ലാറ്റ്‌ഫോമുകളിൽ നിന്ന് ഷോപ്പിംഗ് നടത്തുമ്പോൾ 2-5% വരെ ഉയർന്ന ക്യാഷ്ബാക്ക് നൽകാറുണ്ട്. കോ-ബ്രാൻഡഡ് കാർഡുകളാണെങ്കിൽ 7.5-10% വരെ ഉയർന്ന ക്യാഷ്ബാക്ക് ലഭിക്കും.

2 ക്രെഡിറ്റ് കാർഡുകൾ

ഈ ​ഗുണങ്ങൾ കേട്ട് ഒരു ക്യാഷ്ബാക്ക് ക്രെഡിറ്റ് കാർഡിന് അപേക്ഷിക്കാമെന്ന് കരുതിയാൽ ഏറ്റവും മികച്ച ക്യാഷ്ബാക്ക് കാർഡ് ഏതാണ് എന്നതാകും ചിന്ത. ഐസിഐസിഐ ആമസോൺ പേ ക്രെഡിറ്റ് കാർഡും എസ്ബിഐ ക്യാഷ്ബാക്ക് ക്രെഡിറ്റ് കാർഡുമാണ് ക്യാഷ്ബാക്കിൽ മുന്നിൽ നിൽക്കുന്ന കാർഡുകൾ. രണ്ടും ഓൺലൈൻ ഷോപ്പിംഗിൽ 2-5 ശതമാനം വരെ ഉയർന്ന റിവാർഡ് നിരക്ക് നൽകുന്ന കാർഡുകളാണ്. ഐസിഐസിഐ ആമസോൺ പേബാക്ക് കാർഡ് അൺലിമിറ്റഡ് ക്യാഷ്ബാക്കും നൽകുന്നുണ്ട്.

ഐസിഐസിഐ ആമസോൺ പേ കാർഡ്

ഐസിഐസിഐ ആമസോൺ പേ കാർഡ് കോ-ബ്രാൻഡഡ് ക്രെഡിറ്റ് കാർഡ് വിഭാ​ഗത്തിലുള്ളതാണ്. അതിനാൽ ആമസോൺ വഴി നടത്തുന്ന ചെലവാക്കലുകളിൽ കൂടുതൽ ലാഭകരമായ റിവാർഡുകൾ ലഭിക്കും. പ്രൈം അംഗങ്ങൾ ആമസോൺ ഷോപ്പിം​ഗ് സൈറ്റ് വഴി നടത്തുന്ന ചെലവാക്കലുകൾക്കും ഫ്ലൈറ്റ്, ഹോട്ടൽ ബുക്കിംഗുകൾക്കും 5% ക്യാഷ്ബാക്ക് ലഭിക്കും. നോൺ-പ്രൈം ഉപഭോക്കാക്കളാണെങ്കിൽ 3 ശതമാനമാണ് ക്യാഷ്ബാക്ക്.

ആമസോൺ പേ വഴി യൂട്ടിലിറ്റി ബിൽ, മൊബൈൽ റീചാർജ്, ഇൻഷുറൻസ് തുടങ്ങിയ ചെലവുകൾക്ക് 2 ശതമാനം ക്യാഷ്ബാക്ക് നേടാം. ആമസോൺ പേ വാലറ്റ് വഴി ആമസോൺ പാർട്ണർ വ്യാപാരികളായ സ്വി​ഗ്​ഗി, യൂബർ, ബുക്ക്മൈഷോ ചെലവാക്കലുകൾക്കും 2 ശതമാനം ക്യാഷ്ബാക്ക് ലഭിക്കും. ആമസോണിന് പുറത്ത് നടത്തുന്ന ഓൺലൈൻ/ ഓഫ്‍ലൈൻ ഇടപാടുകൾക്ക് 1 ശതമാനം ക്യാഷ്ബാക്കും ലഭിക്കും. ക്യാഷ്ബാക്കുകൾ ആമസോൺ പേ ബാലൻസിൽ ക്രെ‍ഡിറ്റ് ചെയ്യും.

എസ്ബിഐ ക്യാഷ്ബാക്ക് ക്രെ‍ഡിറ്റ് കാർഡ്

ഒരു കോ- ബ്രാൻഡഡ് ക്രെഡിറ്റ് കാർഡിന്റെ പരിമിതികൾക്കപ്പുറമുള്ളൊരു ക്യാഷ്ബാക്ക് കാർഡ് തിരയുന്നെങ്കിൽ എസ്ബിഐ ക്യാഷ്ബാക്ക് ക്രെഡിറ്റ് കാർഡ് തിരഞ്ഞെടുക്കാം. എല്ലാ ഓൺലൈൻ ഷോപ്പിംഗ് പ്ലാറ്റ്‌ഫോമുകളിലും 5 ശതമാനം ക്യാഷ്ബാക്ക് എസ്ബിഐ ക്യാഷ്ബാക്ക് ക്രെ‍ഡിറ്റ് കാർഡ് നൽകുന്നുണ്ട്. വാടക, വാലറ്റ് ലോഡ്, ഇഎംഐ, ആഭരണങ്ങൾ, വിദ്യാഭ്യാസ ഫീസ്, യൂട്ടിലിറ്റി ബില്ലുകൾ, ഇൻഷുറൻസ് പേയ്‌മെന്റ്, ഗിഫ്റ്റ് കാർഡുകൾ/വൗച്ചറുകൾ, ട്രെയിൻ ടിക്കറ്റുകൾ എന്നിവയ്ക്ക് ക്യാഷ്ബാക്ക് ലഭിക്കില്ല.

എസ്ബിഐ ക്യാഷ്ബാക്ക് ക്രെഡിറ്റ് കാർഡിൽ ഒരു മാസത്തിൽ പരമാവധി 5,000 രൂപയുടെ ക്യാഷ്ബാക്ക് മാത്രമാണ് ലഭിക്കുകയുള്ളൂ. ഈ പരിധി കടയ്ക്കാൻ പരമാവധി 1 ലക്ഷം രൂപ ചെലവഴിക്കേണ്ടി വരും. മറ്റുള്ള ക്യാഷ്ബാക്ക് കാർഡുകളായ എയർടെൽ ആക്സിസ് ബാങ്ക് ക്രെഡിറ്റ് കാർഡ്, ആക്സിസ് എയ്സ് ക്രെഡിറ്റ് കാർഡ് എന്നിവ 300-500 രൂപ പ്രതിമാസ പരിധിയാണ് നൽകുന്നത്.

വാർഷിക ഫീസ്

എസ്ബിഐ ക്യാഷ്ബാക്ക് കാർഡിന് ജോയിനിം​ഗ്, വാർഷിക ഫീസ് ആയി 1,180 രൂപ ആവശ്യമാണ്. 2 ലക്ഷം രൂപയിൽ കൂടുതൽ വാർഷത്തിൽ ചെലവാക്കിയാൽ ഫീസ് ഒഴിവാകും. ഐസിഐസിഐ ആമസോൺ പേ കാർഡ് ആജീവനാന്ത സൗജന്യ കാർഡാണ്. ക്യാഷ്‌ബാക്ക് കാർഡുകളിൽ നിന്ന് ലാഭസാധ്യത കുറവായതിനാൽ സൗജന്യ കാർഡുകൾ ഉപയോ​ഗിക്കുന്നതാണ് ഉചിതമെന്നാണ് വി​​ദ​ഗ്ധാഭിപ്രായം.