1,280 രൂപ കുറഞ്ഞ് സ്വർണം, ആഭരണം ഇന്ന് വാങ്ങുന്നത് ബുദ്ധിയാണോ..? ഇടിവിന്‍റെ കാരണം അറിഞ്ഞാൽ തീരുമാനം എടുക്കാം

കഴിഞ്ഞ ദിവസമാണ് സംസ്ഥാനത്ത് സ്വർണവില ചരിത്രത്തിലെ ഏറ്റവും ഉയർന്ന വിലയിലെത്തിയത്. ഒരുവേള വില 60,000 രൂപയ്ക്ക് മുകളിലേക്കെത്തുമോ എന്ന ആശങ്കയിലായിരുന്നു ആഭരണപ്രേമികൾ. എന്നാൽ കഴിഞ്ഞ രണ്ട് ദിവസമായി വിലയിൽ വലിയ കുറവാണുണ്ടായിരിക്കുന്നത്.

ഇന്ന് കുറഞ്ഞത് 800 രൂപ

പവന് 54,640 രൂപ എന്ന നിരക്കിലായിരുന്നു ബുധനാഴ്ച സംസ്ഥാനത്ത് സ്വർണവ്യാപാരം നടന്നത്. ഗ്രാമിന് 6830 രൂപ. എന്നാൽ 24 മണിക്കൂർ പിന്നിടുമ്പോൾ 800 രൂപയുടെ കുറവാണ് സ്വർണവിലയിലുണ്ടായത്. അതോടെ പവന്‍റെ വില 53,840 രൂപ എന്ന നിരക്കിലേക്കെത്തി. വരും ദിവസങ്ങളിലും വിലയിൽ കുറവുണ്ടാകുമെന്ന പ്രതീക്ഷയിലാണ് ആഭരണപ്രേമികൾ.

രണ്ട് ദിവസം കൊണ്ട് കുറഞ്ഞത് 1280 രൂപ

മെയ് 20-ആം തീയ്യതിയാണ് സംസ്ഥാനത്ത് സ്വർണവില ചരിത്രത്തിലെ ഏറ്റവും ഉയർന്ന നിലയിലെത്തിയത്. പവന് 55,120 രൂപയായിരുന്നു അന്നത്തെ വില. എന്നാൽ 21-ആം തീയ്യതി വില താഴേക്കിറങ്ങി. 54640 രൂപ നിരക്കിലാണ് ചൊവ്വാഴ്ച സംസ്ഥാനത്ത് സ്വർണവ്യാപാരം നടന്നത്. ബുധനാഴ്ച വില മാറ്റമില്ലാതെ തുടർന്നു. ഇന്ന് 800 രൂപ കൂടി കുറഞ്ഞതോടെ കഴിഞ്ഞ മൂന്ന് ദിവസത്തിനിടെ 1280 രൂപയാണ് ഒരു പവൻ സ്വർണത്തിന് കുറഞ്ഞത്.

മെയ് ഒന്നാം തിയ്യതിയാണ് ഈ മാസത്തെ താഴ്ന്ന വില രേഖപ്പെടുത്തിയത്. ഒരു പവൻ സ്വർണ്ണത്തിന് 52,440 രൂപയും, ഗ്രാമിന് 6,555 രൂപയുമായിരുന്നു അന്നത്തെ നിരക്കുകൾ.

ആഭരണം വാങ്ങാൻ എത്ര നൽകണം..?

സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാള്‍മാര്‍ക്കിങ് നിരക്കുകള്‍എന്നിവയെല്ലാം ചേര്‍ത്ത് വലിയൊരു തുക നൽകേണ്ടി വരും. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടിയാൽ ഇന്നത്തെ വിലയിൽ 1 പവൻ സ്വർണാഭരണം വാങ്ങുമ്പോൾ ഏകദേശം 58,000 രൂപ നൽകേണ്ടി വരും.

വില കുറയാൻ കാരണം

യുഎസ് ഫെഡ് ഇന്നലെ പുറത്തു വിട്ട മിനുട്സിൽ, പണപ്പെരുപ്പം കുറയുകയില്ല എന്ന സൂചനകളുണ്ട്. ഇത് ആഗോള തലത്തിലെ സ്വർണ്ണവില ഇടിയാൻ കാരണമായി. ഇക്കാരണത്താലാണ് ആഭ്യന്തര തലത്തിലും പ്രധാനമായി വില കുറഞ്ഞത്.

അന്താരാഷ്ട്ര തലത്തിൽ സ്വർണ്ണ വ്യാപാരം, താഴ്ച്ചയിലാണ് വ്യാപാരം നടത്തുന്നത്. ട്രോയ് ഔൺസിന് 9.65 ഡോളർ (0.40%) താഴ്ന്ന് 2372.46 ഡോളർ എന്നതാണ് നിലവാരം. ഇക്കഴിഞ്ഞ തിങ്കളാഴ്ച്ച, മെയ് 20ാം തിയ്യതിയാണ് ആഗോള തലത്തിൽ സ്വർണ്ണവില സർവ്വകാല ഉയരത്തിലെത്തിയത്. ട്രോയ് ഔൺസിന് 2449.89 ഡോളർ എന്നതായിരുന്നു വിലനിലവാരം.

അഡ്വാൻസ് ബുക്കിം​ഗ്

സ്വർണം വാങ്ങുന്നവർ അഡ്വാൻസ് ബുക്കിം​ഗ് ഉപയോ​ഗപ്പെടുത്തുന്നത് നല്ലതാണ്. ഇന്നത്തെ കുറഞ്ഞ വിലയിൽ സ്വർണം ബുക്ക് ചെയ്യാനും ആവശ്യ വില ഉയർന്നാൽ കുറഞ്ഞ വിലയിൽ വാങ്ങാനും അഡ്വാൻസ് ബുക്കിം​ഗ് ഉപകരിക്കും.

വില വർധനവിന്‍റെ ചരിത്രം

കഴിഞ്ഞ 2 പതിറ്റാണ്ടിനിടെ 50,000 രൂപയുടെ വർധനവാണ് സ്വർണ വിലയിലുണ്ടായത്. 2005 ഓക്ടോബർ മാസത്തെ പവന്‍റെ വില 5,040 രൂപയായിരുന്നു. മൂന്ന് വർഷങ്ങൾക്ക് ശേഷം 2008 ഒക്ടോബർ മാസം സ്വർണ വില 10,000 കടന്നു. 2010-ൽ വില 15,000 രൂപയും 2011 ഓഗസ്റ്റ് മാസത്തിൽ വില 20,000 രൂപയും കടന്നു.

പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്‍റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്‍റെ വില അരലക്ഷം രൂപയും കടന്നു.