കുതിച്ചുയർന്ന് സ്വർണം, പവന്‍റെ വില വീണ്ടും 54,000 കടന്നു, ഇപ്പോൾ ആഭരണം വാങ്ങാതിരിക്കുന്നതാണ് നല്ലത്

മലയാളികൾക്ക് സ്വർണം അണിയാതെ ഒരു ആഘോഷവുമില്ല. കല്യാണം ആണെങ്കിൽ പിന്നെ പറയുകയും വേണ്ട. എന്നാൽ കഴിഞ്ഞ കുറേ നാളുകളായി സ്വർണവില ഏറിയും കുറഞ്ഞും മുന്നോട്ട് കുതിക്കുകയാണ്. അരലക്ഷം രൂപയ്ക്ക് മുകളിലാണ് ഇപ്പോൾ പവന്‍റെ വില. വരും നാളുകളിലും സ്വർണവില മുകളിലേക്ക് ഉയർന്നാൽ അത് പുതിയ റെക്കോർഡുകൾ സൃഷ്ടിക്കും എന്ന കാര്യത്തിൽ ഒരു സംശയവും വേണ്ട.

കഴിഞ്ഞ നാല് വർഷത്തിനുള്ളിൽ 30,000 രൂപയോളം രൂപയാണ് പവന്‍റെ വിലയിൽ ഉണ്ടായ വർധനവ്. 2019-ലാണ് സ്വർണവില 25,000 രൂപ കടക്കുന്നത്. ഒരു വർഷം കൊണ്ട് പവന്‍റെ വില 30,000 രൂപയ്ക്ക് മുകളിലെത്തി. 2022-ൽ വില 40,000 രൂപയും 2023-ൽ 45,000 രൂപയും കടന്നു. 2024 മാർച്ച് 29-ന് പവന്‍റെ വില 50,000 രൂപയെന്ന നിർണായക വിലയും കടന്ന് മുന്നോട്ട് പോയി.

വീണ്ടും 54,000 കടന്നു

പവന് 53,600 രൂപ എന്ന നിരക്കിലായിരുന്നു സംസ്ഥാനത്ത് വെള്ളിയാഴ്ത സ്വർണവ്യാപാരം നടന്നത്. എന്നാൽ 24 മണിക്കൂർ പിന്നിടുമ്പോൾ പവന്‍റെ വിലയിൽ വലിയ വർധനവാണ് ഉണ്ടായത്. പവന് 520 രൂപയാണ് കൂടിയത്. അതോടെ വില 54,120 രൂപയിലേക്ക് കുതിച്ചു. 6640 രൂപയാണ് ഗ്രാമിന്‍റെ വില.

ജൂലൈ മാസം സ്വർണത്തിന് രേഖപ്പെടുത്തിയ ഏറ്റവും ഉയർന്ന വിലയാണ് ഇന്നത്തേത്. ഒരു മാസത്തിന് ശേഷമാണ് പവന്‍റെ വില 54,000 രൂപയ്ക്ക് മുകളിലേക്കെത്തുന്നത് എന്ന പ്രത്യേകതയുമുണ്ട്.

ആഭരണം വാങ്ങാൻ എത്ര നൽകണം..?

സ്വർണാഭരണം വാങ്ങുമ്പോൾ പവന്‍റെ വില മാത്രം നൽകിയാൽ പോര. അതിനൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 59,000 രൂപ നൽകേണ്ടി വരും.

ആഗോള സ്വർണവില

ആഗോള വിപണിയില്‍ 24 മണിക്കൂറിനിടെ സ്വര്‍ണം ഔണ്‍സിന് 1.49% വില വര്‍ധിച്ചു. അതായത് ഔണ്‍സിന് 35.05 ഡോളര്‍ വര്‍ധിച്ച് 2,391.59 ഡോളറിലെത്തി.

ആഗോള വിപണികളിലെ വിലമാറ്റങ്ങള്‍ ഡോളറിലായതിനാല്‍ തന്നെ നേരിയ മാറ്റങ്ങള്‍ പോലും പ്രാദേശിക വിപണികളില്‍ വലിയ ചലനങ്ങള്‍ സൃഷ്ടിക്കും. ഡോളര്‍- രൂപ വിനിമയ നിരക്കും ഇവിടെ വളരെ പ്രധാനമാണ്. ഡോളറിനെതിരേ രൂപ വന്‍ തിരിച്ചടി നേരിടുന്ന സമയമാണിത്. ആഗോള വിപണിയില്‍ എണ്ണവില കുതിപ്പു തുടങ്ങിയതോടെ പണപ്പെരുപ്പ ആശങ്ക വര്‍ധിക്കുന്നതും സ്വര്‍ണവില കൂടാന്‍ കാരണമായി.

അഡ്വാന്‍സ് ബുക്കിംഗ് ഗുണം ചെയ്യും

സ്വർണവില കൂടുതൽ ഉയരങ്ങളിലേക്ക് പോകാനുള്ള സാധ്യതയുള്ളത് കൊണ്ടു തന്നെ വലിയ അളവിൽ സ്വർണം വാങ്ങാൻ ആഗ്രഹിക്കുന്നവർ അഡ്വാന്‍സ് ബുക്കിംഗ് നടത്തുന്നതാണ് നല്ലത്. സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്‍റെ പ്രത്യേകത.

റെക്കോർഡ് വില കഴിഞ്ഞ മാസം

സംസ്ഥാനത്തിന്‍റെ ചരിത്രത്തിൽ സ്വർണത്തിന് ഏറ്റവും ഉയർന്ന വില രേഖപ്പെടുത്തിയ മാസം മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില.

സ്വര്‍ണത്തിന്റെ ദീര്‍ഘകാ ഭാവിയില്‍ നിക്ഷേപകര്‍ ഇപ്പോഴും വലിയ പ്രതീക്ഷയാണ് കല്‍പ്പിക്കുന്നത്. ഇന്ത്യ, ചൈനയടക്കമുള്ള രാജ്യങ്ങള്‍ സ്വര്‍ണം വാങ്ങിക്കൂട്ടുന്നതും വിപണി വിലയെ സ്വാധീനിക്കുന്നു.