പുതിയ നികുതി വ്യവസ്ഥയിലെ ഇളവുകൾ ഈ സ്കീമുകൾക്ക് ഭീഷണിയാവുമോ? കാരണം ഇതാണ്...

2025 ലെ കേന്ദ്ര ബജറ്റ് ആദായ നികുതിയിൽ ആകർഷകമായ മാറ്റങ്ങളാണ് കൊണ്ടു വന്നത്. ഇതു പ്രകാരം 12 ലക്ഷം വരെ വരുമാനമുള്ള വ്യക്തികൾക്ക് ആദായനികുതി അടക്കേണ്ടതില്ല. ഇത് മധ്യ വർ​ഗ വിഭാ​ഗത്തിനും ഏറെ ആശ്വാസകരമായ വാർത്തയായിരുന്നു. ആശ്വാസം നൽകുന്നതിനൊപ്പം കൂടുതൽ നികുതി ദായകരെ പുതിയ നികുതി വ്യവസ്ഥയിലേക്ക് മാറാനുള്ള പ്രോത്സാഹനവും ഈ പ്രഖ്യാപനം നൽകി.

കാരണം, 12 ലക്ഷം വരെ നികുതി ഇല്ലാത്തത് പുതിയ നികുതി വ്യവസ്ഥക്കു കീഴിലാണ്. കൂടുതൽ ആളുകളും പുതിയ നികുതി നികുതി വ്യവസ്ഥയിലേക്ക് മാറുന്നതിലൂടെ പഴയ നികുതി വ്യവസ്ഥ അനാഥമാവും. നിരവധി ഇളവുകളാണ് പുതിയ നികുതി വ്യവസ്ഥ വാ​ഗ്ദാനം ചെയ്യുന്നത്. എന്നിരുന്നാലും ഈ മാറ്റത്തിലൂടെ പുതിയ നികുതി വ്യവസ്ഥ തിരഞ്ഞെടുക്കുന്ന നികുതിദായകർക്ക് മറ്റു ചില വിഭാഗങ്ങൾക്ക് കീഴിലുള്ള കിഴിവുകളിൽ നിന്നുള്ള പ്രയോജനം ലഭിക്കില്ല.

പബ്ലിക് പ്രൊവിഡന്റ് ഫണ്ട്, ഇക്വിറ്റി ലിങ്ക്ഡ് സേവിംഗ്സ് സ്കീം, നാഷണൽ സേവിംഗ്സ് സർട്ടിഫിക്കറ്റ്, സുകന്യ സമൃദ്ധി യോജന , ലൈഫ് ഇൻഷുറൻസ് പ്രീമിയങ്ങൾ എന്നിവയെല്ലാം പഴയ നികുതി വ്യവസ്ഥക്കു കീഴിലുള്ളവയാണ്.

സെക്ഷൻ 80C : പബ്ലിക് പ്രൊവിഡന്റ് ഫണ്ട് ( PPF ), ഇക്വിറ്റി ലിങ്ക്ഡ് സേവിംഗ്സ് സ്കീം ( ELSS ), നാഷണൽ സേവിംഗ്സ് സർട്ടിഫിക്കറ്റ് (NSC), സുകന്യ സമൃദ്ധി യോജന , ലൈഫ് ഇൻഷുറൻസ് പ്രീമിയങ്ങൾ എന്നിവയിലെ നിക്ഷേപങ്ങൾക്ക് ഇനി നികുതി ഇളവ് ലഭിക്കില്ല.

സെക്ഷൻ 80D : 25,000 രൂപയുടെ മെഡിക്കൽ ഇൻഷുറൻസ് പ്രീമിയം കിഴിവുകൾ ലഭിക്കില്ല

സെക്ഷൻ 80CCC : പെൻഷൻ ഫണ്ടുകളിലേക്കുള്ള സംഭാവനകൾക്ക് നികുതി ഇളവ് ലഭിക്കില്ല.

പുതിയ നികുതി വ്യവസ്ഥയിൽ ഭവന വായ്പകളുടെ പലിശ, എച്ച്.ആർ.എ ഇളവുകളും ലഭ്യമാകില്ല.

പഴയ നികുതി വ്യവസ്ഥയിലെ നിക്ഷേപങ്ങൾ എന്തു ചെയ്യും?

പഴയ നികുതി വ്യവസ്ഥയിൽ സർക്കാർ യാതൊരു മാറ്റവും വരുത്തിയിട്ടില്ല. പി.പി.എഫ്, എൻ.എസ്.ഇ, ഇ.എൽ.എസ്.എസ്, എസ്.സി.എസ്.എസ്, സുകന്യ സമൃദ്ധി യോജന തുടങ്ങിയ ചെറുകിട സമ്പാദ്യ പദ്ധതികളെല്ലാം പഴയ വ്യവസ്ഥയിൽ ഉൾപ്പെടുന്നു. ഈ പദ്ധതികളെല്ലാം സെക്ഷൻ 80C യുടെ പരിധിയിൽ വരുന്നതിനാൽ 1.5 ലക്ഷം രൂപയുടെ മൊത്തം കിഴിവ് ആനുകൂല്യം ലഭിക്കുന്നു.

2020ലാണ് പുതിയ നികുതി വ്യവസ്ഥ ആരംഭിച്ചത്. എന്നാൽ അതിനു ശേഷം പഴയ നികുതി വ്യവസ്ഥയ്ക്ക് കീഴിലുള്ള വ്യക്തികൾക്ക് സർക്കാർ വലിയ നികുതി ഇളവുകളൊന്നും നൽകിയിട്ടില്ല. എന്നാൽ അപ്പുറത്ത് പുതിയ നികുതി വ്യവസ്ഥയിലേക്ക് മാറിയവർക്ക് സർക്കാർ പ്രോത്സാഹനം നൽകുന്നു. പുതിയ വ്യവസ്ഥയുടെ ഇളവുകൾ പഴയ വ്യവസ്ഥയിലെ നിക്ഷേപങ്ങൾക്ക് മങ്ങൽ ഏൽപ്പിക്കുമോ? മാത്രമല്ല മുകളിൽ പറഞ്ഞ ചെറുകിട നിക്ഷേപങ്ങൾ നിലവിലെ സാഹചര്യത്തിൽ അപകടമാണോ?

നിക്ഷേപവും നികുതി ലാഭിക്കലും തമ്മിൽ ബന്ധിപ്പിക്കേണ്ടതുണ്ടോ?

പഴയ വ്യവസ്ഥയിൽ നികുതി ആനുകൂല്യങ്ങൾ ഇല്ലെങ്കിലും നിക്ഷേപങ്ങൾ തിരഞ്ഞെടുക്കുന്നത് നികുതി ആനുകൂല്യങ്ങളെ മാത്രം അടിസ്ഥാനമാക്കിയാവരുതെന്ന് നികുതി വിദഗ്ദ്ധർ വ്യക്തമാക്കുന്നു. കാരണം പി.പി.എഫ്, സുകന്യ സമൃദ്ധി യോജന തുടങ്ങിയ പദ്ധതികൾ ഇപ്പോഴും സുരക്ഷിതവും മികച്ച വരുമാനം നൽകുന്നതുമാണ്. എന്നാൽ അവയുടെ നീണ്ട ലോക്ക്-ഇൻ കാലയളവുകൾ പലപ്പോഴും നിക്ഷേപകരെ അസ്വസ്തരാക്കുന്നു.

എല്ലാവരും നികുതി ഇളവുകൾ മാത്രം നോക്കി നിക്ഷേപങ്ങൾ തിരഞ്ഞെടുക്കുന്നവരല്ല. ഭാവി നേട്ടത്തെ കുറിച്ചും പണത്തിന്റെ വളർച്ചയെ കുറിച്ചും അറിഞ്ഞ് നിക്ഷേപിക്കുന്നവരാണ് കൂടുതലും. പുതിയ നികുതി വ്യവസ്ഥ നികുതിയുമായി ബന്ധപ്പെട്ട കാര്യങ്ങൾ ലളിതമാക്കുന്നുണ്ടെങ്കിലും പഴയ നികുതി വ്യവസ്ഥയിലെ ജനപ്രിയ നിക്ഷേപങ്ങളിൽ നിക്ഷേപിച്ചിരുന്ന നികുതിദായകർ ആശങ്കയിലാണ്.