വെറും മിസ്ഡ് കോളിലൂടെയും, എസ്എംഎസിലൂടെയും പിഎഫ് ബാലൻസ് പരിശോധിക്കാം: ഈ 4 മാർ​ഗങ്ങൾ അറിയാം

പിഎഫ് അക്കൗണ്ടുള്ളവർക്കും, പിഎഫ് അക്കൗണ്ട് തുടങ്ങാനിരിക്കുന്നവരും പിഎഫ് ബാലൻസ് എങ്ങനെ പരിശോധിക്കണമെന്ന് അറിഞ്ഞിരിക്കണം. നിങ്ങളുടെ പിഎഫിൽ എത്ര രൂപയുണ്ടെന്ന് അറിയുന്നത് പ്രധാനമാണ്. മാത്രമല്ല അപ്രതീക്ഷിത സാമ്പത്തിക ആവശ്യങ്ങൾക്കു വേണ്ടി നിങ്ങൾക്ക് പിഎഫ് പിൻവലിക്കാനും സാധിക്കും. സാധാരണയായി ഇപിഎഫ്ഒ പോർട്ടൽ വഴിയാണ് ബാലൻസ് പരിശോധിക്കുന്നത്. എന്നാൽ പിഎഫ് ബാലൻസ് പരിശോധിക്കാൻ മറ്റു ചില മാർ​ഗങ്ങളുമുണ്ട്. ഓരോന്നും അറിയാം;

ഇപിഎഫ്ഒ പോർട്ടൽ വഴി പിഎഫ് ബാലൻസ് പരിശോധിക്കാം

• ആദ്യം ഇപിഎഫ്ഒ പോർട്ടലിൽ ലോ​ഗിൻ ചെയ്യുക. അതിനായി നിങ്ങളുടെ യൂണിവേഴ്സൽ അക്കൗണ്ട് നമ്പറും (UAN) പാസ്‌വേഡും നൽകി ലോ​ഗിൻ ചെയ്യാം.
• അതിനു ശേഷം "പാസ്ബുക്ക്" എന്ന ഓപ്ഷനിൽ ക്ലിക്ക് ചെയ്യാം.
• ഇതിൽ ക്ലിക്ക് ചെയ്ത് നിങ്ങളുടെ യുഎഎൻ, പാസ്‌വേഡ്, ക്യാപ്ച എന്നിവ നൽകിയാൽ ബാലൻസ് കാണാൻ സാധിക്കും.

ഇതാണ് സാധാരണയായി എല്ലാവരും ഉപയോ​ഗിക്കുന്ന മാർ​ഗം. എന്നാൽ ഇത് ഉമാംങ് ആപ്പ് വഴിയും പരിശോധിക്കാം. എങ്ങനെയെന്ന് നോക്കാം;

ഉമാംങ് ആപ്പ് വഴി പിഎഫ് ബാലൻസ് പരിശോധിക്കാം

ഇപിഎഫ്ഒയുമായി ബന്ധപ്പെട്ട സേവനങ്ങൾ വാഗ്ദാനം ചെയ്യുന്ന ഒരു സർക്കാർ പോർട്ടലാണ് UMANG മൊബൈൽ ആപ്പ്. ആപ്ലിക്കേഷൻ ഡൗൺലോഡ് ചെയ്ത് നിങ്ങളുടെ യുഎഎൻ ലിങ്ക് ചെയ്തിട്ടുള്ള മൊബൈൽ നമ്പർ ഉപയോഗിച്ച് രജിസ്റ്റർ ചെയ്യാം. ഉമാംങ് ആപ്പിൽ ലോഗിൻ ചെയ്താൽ ഇപിഎഫ്ഒ ഐക്കണിൽ ക്ലിക്ക് ചെയ്‌ത് "പാസ്‌ബുക്ക് കാണുക" എന്ന ഓപ്ഷൻ തിരഞ്ഞെടുക്കുക. ഇതിൽ ബാലൻസ് കാണിക്കും. ഒപ്പം ക്ലെയിമുകൾ ആരംഭിക്കാനും, ക്ലെയിമിന്റെ സ്റ്റാറ്റസ് നിരീക്ഷിക്കാനും, മറ്റ് ഇപിഎഫ്ഒ സേവനങ്ങൾ ലഭ്യമാക്കാനും സാധിക്കും.

എസ്എംഎസ് വഴി ബാലൻസ് പരിശോധിക്കാം

എസ്എംഎസ് സേവനത്തിലൂടെയും ജീവനക്കാർക്ക് പിഎഫ് ബാലൻസ് പരിശോധിക്കാം. എങ്ങനെ പരിശോധിക്കാമെന്ന് നോക്കാം;

• ആദ്യം നിങ്ങളുടെ രജിസ്റ്റർ ചെയ്ത ഫോൺ നമ്പറിൽ നിന്ന് 7738299899 എന്ന നമ്പറിലേക്ക് "EPFOHO UAN ENG" എന്ന് എസ്എംഎസ് അയയ്ക്കണം.
• ഈ എസ്എംഎസിന് മറുപടിയായി ബാലൻസ് വിവരവും ഏറ്റവും പുതിയ സംഭാവനയും ഉൾപ്പെടും.
• ഇന്റർനെറ്റ് ഇല്ലെങ്കിൽ ഈ ഓപ്ഷൻ സൗകര്യപ്രദമാണ്.

പുതിയ മാറ്റങ്ങളുമായി ഇപിഎഫ്ഒ: യുഎഎൻ എളുപ്പത്തിൽ വീട്ടിലിരുന്ന് കൊണ്ട് ജനറേറ്റ് ചെയ്യാം, കൂടുതൽ അറിയാം

മിസ്ഡ് കോൾ വഴിയും ബാലൻസ് അറിയാം

എസ്എംഎസ് പോലെ തന്നെ മിസ്ഡ് കോൾ വഴിയും പിഎഫ് ബാലൻസ് അറിയാം. രജിസ്റ്റർ ചെയ്ത നിങ്ങളുടെ ഇപിഎഫ്ഒ മൊബൈൽ നമ്പറിൽ നിന്ന് 9966044425 എന്ന നമ്പറിലേക്ക് മിസ്ഡ് കോൾ ചെയ്താൽ അവരുടെ പിഎഫ് ബാലൻസ് വിവരങ്ങൾ അടങ്ങിയ ഒരു എസ്എംഎസ് ലഭിക്കും. ഇത് സൗജന്യമായ സേവനമാണ്.

ഇടക്കിടെ പിഎഫ് പരിശോധിക്കാം

പിഎഫിലേക്ക് കൃത്യമായി സംഭാവനകൾ എത്തുന്നുണ്ടെന്ന് ഉറപ്പാക്കാനാണ് പിഎഫ് ബാലൻസ് ഇടയ്ക്കിടെ പരിശോധിക്കുന്നത്. നിങ്ങളുടെ ബാലൻസ് പതിവായി പരിശോധിക്കുന്നതിലൂടെ അക്കൗണ്ട് മറ്റാരും ഉപയോ​ഗിക്കുന്നില്ലെന്നും, തട്ടിപ്പുകൾ നടക്കുന്നില്ലെന്നും തിരിച്ചറിയാൻ സാധിക്കും. പിഎഫ് നിങ്ങളുടെ ഏറ്റവും മികച്ച റിട്ടയർമെൻ്റ് നിക്ഷേപം കൂടിയാണ്.