എസ്ബിഐ, എച്ച്ഡിഎഫ്‌സി ബാങ്ക്, ഐസിഐസിഐ, പിഎന്‍ബി, കാനറ; മുന്‍നിര ബാങ്കുകളില്‍ മികച്ച പലിശ നിരക്ക് എവിടെ

യാതൊരു റിസ്‌കുമില്ലാതെ പണം കൂടുതല്‍ സുരക്ഷിതമായിരിക്കാനും മികച്ച ആദായം ലഭിക്കുകയും ചെയ്യാന്‍ സ്ഥിര നിക്ഷേപമാണ് വലിയൊരു വിഭാഗം തിരഞ്ഞെടുക്കുന്നത്. നിലവില്‍ റിപ്പോ നിരക്ക് വര്‍ധനവിന്റെ ഫലമായി മികച്ച പലിശ നിരക്കും ബാങ്ക് സ്ഥിര നിക്ഷേപങ്ങള്‍ക്ക് ലഭിക്കുന്നുണ്ട്. ഇതിനാല്‍ തന്നെ റിസ്‌കെടുക്കാന്‍ താല്‍പര്യമില്ലാത്തവര്‍ കൂടുതലായി സ്ഥിര നിക്ഷേപത്തെ ആശ്രയിക്കുന്നുണ്ട്.

സ്ഥിര നിക്ഷേപത്തിലെ പോരായ്മ നികുതിയാണ്. പലിശ വരുമാനത്തിന് നികുതി സ്ലാബ് അനുസരിച്ച് നികുതി നല്‍കേണ്ടതായി വരും. നിക്ഷേപം ആവശ്യമാനുസരണം പിന്‍വലിക്കാമെങ്കിലും കാലാവധിക്ക് മുന്‍പ് പിന്‍വലിക്കുമ്പോള്‍ പിഴ നല്‍കേണ്ടതായി വരുന്നുണ്ട്. സ്ഥിര നിക്ഷേപത്തില്‍ എടുത്തു പറയേണ്ടത് മുതിര്‍ന്ന പൗരന്മാര്‍ക്കുള്ള പ്രത്യേക പരിഗണനയാണ്. സാധരാണ നിക്ഷേപത്തേക്കാള്‍ അധിക നിരക്ക് മുതിര്‍ന്ന പൗരന്മാര്‍ക്ക് ലഭിക്കും.

സ്ഥിര നിക്ഷേപമിടാന്‍ ഏറ്റവും സുരക്ഷിതമായ ബാങ്ക് നോക്കുന്നവര്‍ക്ക് രാജ്യത്തെ മുന്‍നിര ബാങ്കുകളെ തിരഞ്ഞെടുക്കാം. ആദ്യ 5 സ്ഥാനത്ത് വരുന്ന ബാങ്കുകളുടെ സ്ഥിര നിക്ഷേപ പലിശ നിരക്കും 5 ലക്ഷം രൂപ നിക്ഷേപിച്ചാലുള്ള ആദായവും നോക്കാം.

എസ്ബിഐ പലിശ നിരക്ക്

2 കോടിക്ക് താഴെ കാലാവധിയുള്ള നിക്ഷേപങ്ങള്‍ക്ക് എസ്ബിഐ നല്‍കുന്ന പലിശ നിരക്ക് 3 ശതമാനം മുതല്‍ 7 ശതമാനം വരെയാണ്. 2 വര്‍ഷം മുതല്‍ 3 വര്‍ഷത്തില്‍ താഴെയുള്ള കാലാവധിയില്‍ ഉയര്‍ന്ന പലിശ നല്‍കും. മുതിര്‍ന്ന പൗരന്മാര്‍ക്ക് 5 വര്‍ഷം- 10 വര്‍ഷത്തേക്കാണ് ഉയര്‍ന്ന നിരക്കായ 7.50 ശതമാനം ലഭിക്കുക. പ്രത്യേക സ്ഥിര നിക്ഷേപമായ അമൃത് കലാശ് 400 ദിവസത്തക്ക് 7.10 ശതമാനവും മുതിര്‍ന്ന പൗരന്മാര്‍ക്ക് 7.60 ശതമാനം പലിശയും നല്‍കും.

ഉയര്‍ന്ന പലിശ ലഭിക്കുന്ന 400 ദിവസത്തേക്ക് 5 ലക്ഷം രൂപ നിക്ഷേപിച്ചാല്‍ സാധാരണ നിക്ഷേപകന് കാലാവധിയില്‍ 5,40,088 രൂപ ലഭിക്കും. മുതിര്‍ന്ന പൗരന്മാര്‍ക്ക് 5,43,002 രൂപയാണ് ലഭിക്കുന്നത്. 

എച്ച്ഡിഎഫ്‌സി ബാങ്ക്

എച്ച്ഡിഎഫ്‌സി ബാങ്കില്‍ സ്ഥിര നിക്ഷേപത്തിന് ലഭിക്കുന്ന പലിശ നിരക്ക് 3 ശതമാനം മുതല്‍ 7.10 ശതമാനമാണ്. സാധാരണ നിക്ഷേപകര്‍ക്ക് 15 മാസം മുതല്‍ 18 മാസത്തില്‍ കുറവ് കാലയളവിലേക്കാണ് ഉയര്‍ന്ന പലിശയായ 7.10 ശതമാനം ലഭിക്കുന്നത്. മുതിര്‍ന്ന പൗരന്മാര്‍ക്ക് 5 വര്‍ഷം 1 ദിവസം മുതല്‍ 10 വര്‍ഷത്തേക്ക് 7.75 ശതമാനം പലിശ ലഭിക്കും.

15 മാസം - 18 മാസ കാലയളവില്‍ 5 ലക്ഷം രൂപ നിക്ഷേപിക്കുമ്പോള്‍ കാലാവധിയില്‍ 45,999 രൂപയാണ് പലിശയായി ലഭിക്കുന്നത്. 5,45,999 രൂപ മൊത്തമായി ലഭിക്കും. 5 വര്‍ഷം 1 ദിവസ്‌ത്തേക്ക് നിക്ഷേപിക്കുന്ന മുതിര്‍ന്ന പൗരന് 2,38,693 രൂപ പലിശയായി ലഭിക്കും. 7,38,693 രൂപയാണ് കാലാവധിയിലെ തുക.

ഐസിഐസിഐ ബാങ്ക്

എച്ച്ഡിഎഫ്‌സി ബാങ്കിന് സമാനമായി പലിശ നിരക്കാണ് ഐസിഐസിഐ ബാങ്കിലും. 2 കോടിക്ക് താഴെ കാലാവധിയുള്ള നിക്ഷേപങ്ങള്‍ക്ക് 3 ശതമാനം മുതല്‍ 7.10 ശതമാനം വരെ പലിശ ലഭിക്കും. സാധാരണനിക്ഷേപകര്‍ക്കും മുതിര്‍ന്ന പൗരന്മാര്‍ക്കും ഏറ്റവും ഉയര്‍ന്ന നിരക്ക് നല്‍കുന്നത് 15 മാസം മുതല്‍ 2 വര്‍ഷത്തില്‍ കുറവുള്ള കാലയളവിലാണ്. മുതിര്‍ന്ന പൗരന്മാര്‍ക്ക് 7.60 ശതമാനം പലിശ ലഭിക്കും.

പഞ്ചാബ് നാഷണല്‍ ബാങ്ക്

3.50 ശതമാനം മുതല്‍ 7.25 ശതമാനമാണ് പഞ്ചാബ് നാഷണല്‍ ബാങ്ക് നല്‍കുന്ന പലിശ നിരക്ക്. ഏറ്റവും ഉയര്‍ന്ന നിരക്കായ 7.25 ശതമാനം 666 ദിവസത്തെ നിക്ഷേപത്തിനാണ്. മുതിര്‍ന്ന പൗരന്മാര്‍ക്ക് 7.75 ശതമാനം പലിശ ലഭിക്കും. 80 വയസിന് മുകളില്‍ പ്രായമുള്ള സൂപ്പര്‍ സീനിയര്‍ സിറ്റിസണ്‍സിന് 8.05 ശതമാനം പലിശയും ലഭിക്കും.

666 ദിവസത്തേക്ക് 5 ലക്ഷം നിക്ഷേപിച്ചാല്‍ സാധാരണ നിക്ഷേപകന് കാലാവധിയില്‍ 5,70,043 രൂപ ലഭിക്കും. മുതിര്‍ന്ന പൗരനായ നിക്ഷേപകന് 5,75,171 രൂപ ലഭിക്കും. സൂപ്പര്‍ സീനിയര്‍ സിറ്റിസണ്‍സിന് 5,78,266 രൂപയും ലഭിക്കും.

കാനറ ബാങ്ക്

4 ശതമാനം മുതല്‍ 7.25 ശതമാനം വരെ പലിശ ലഭിക്കുന്ന നിക്ഷേപമാണ് കാനറ ബാങ്കിന്റേത്. ഏറ്റവും ഉയര്‍ന്ന പലിശയായ 7.25 ശതമാനം ലഭിക്കുന്നത് 444 ദിവസത്തേക്കാണ്. മുതിര്‍ന്ന പൗരന്മാര്‍ക്ക് 7.75 ശതമാനം പലിശ ലഭിക്കും.