പലിശ നിരക്ക് പുതിയ തലത്തില്‍; സ്ഥിര നിക്ഷേപമിടാന്‍ പോസ്റ്റ് ഓഫീസോ എസ്ബിഐയോ; മികച്ചത്‌ ഏത്

റിപ്പോ നിരക്ക് വർധനവിന് പിന്നാലെ ബാങ്കുകൾ നിക്ഷേപ പലിശ നിരക്ക് ഉയർത്തുന്നുണ്ട്. 2022 മേയ് മുതൽ 2023 ഫെബ്രുവരി വരെ 2.50 ശതമാനം വർധനവാണ് റിസർവ് ബാങ്ക് ഓഫ് ഇന്ത്യ റിപ്പോ നിരക്കിൽ വരുത്തിയത്. മേയ് മാസത്തിന് മുൻപ് 5 ശതമാനമായിരുന്ന സ്ഥിര നിക്ഷേപ പലിശ നിരക്ക് 7 ശതമാനത്തിലേക്ക് ഉയർന്നു.

ഫെബ്രുവരിയിൽ വരുത്തിയ അവസാന റിപ്പോ നിരക്ക് വർധനവിന് പിന്നാലെ വിവിധ ബാങ്കുകൾ പലിശ നിരക്കുയർത്തി തുടങ്ങിയിട്ടുണ്ട്. സ്റ്റേറ്റ് ബാങ്ക് ഓഫ് ഇന്ത്യ, എച്ച്ഡിഎഫ്സി ബാങ്ക് എന്നിവ കഴിഞ്ഞ വാരം പലിശ നിരക്കുയർത്തിയിട്ടുണ്ട്. സ്ഥിര നിക്ഷേപത്തിന് സുരക്ഷിതത്വം പരി​ഗണിക്കുമ്പോൾ നിക്ഷേപിക്കാൻ പറ്റിയൊരിടം കൂടിയുണ്ട്. പോസ്റ്റ് ഓഫീസ് നൽകുന്ന ടെെം ഡെപ്പോസിറ്റുകൾ ബാങ്ക് സ്ഥിര നിക്ഷേപങ്ങൾക്ക് സമാനമാണ്.

പോസ്റ്റ് ഓഫീസുകൾ ഒരു വർഷം മുതൽ അഞ്ച് വർഷം വരെ കാലാവധിയുള്ള സ്ഥിര നിക്ഷേപങ്ങളാണ് സ്വീകരിക്കുന്നത്. ബാങ്ക് സ്ഥിര നിക്ഷേപങ്ങളെ പോലെ നിക്ഷേപകർ പോസ്റ്റ് ഓഫീസ് ടേം ഡെപ്പോസിറ്റിന്റെ കാലാവധിയിലൂടെ ഉറപ്പുള്ള വരുമാനം നേടാൻ സാധിക്കും.

ത്രൈമാസത്തിൽ പലിശ നിരക്ക് പുനഃപരിശോധിക്കുന്നവയാണ് പോസ്റ്റ് ഓഫീസ് നിക്ഷേപങ്ങൾ. ജനുവരി- മാർച്ച് പാദത്തിലെ പലിശ നിരക്ക് ജനുവരി 1 മുതൽ പ്രാബല്യത്തിൽ വന്നു. സ്ഥിര നിക്ഷേപമിടുന്നൊരാൾക്ക് പോസ്റ്റ് ഓഫീസ് ടൈം ഡെപ്പോസിറ്റുകളാണോ ബാങ്ക് നിക്ഷേപമാണോ കൂടുതൽ പലിശ നൽകുന്നതെന്ന് നോക്കാം. 

പോസ്റ്റ് ഓഫീസ് ടേം ഡെപ്പോസിറ്റ് പലിശ നിരക്കുകൾ

1 വർഷം മുതൽ 5 വർഷത്തേക്കാണ് പോസ്റ്റ് ഓഫീസ് ടൈം ഡെപ്പോസിറ്റുകൾ സ്വീകരിക്കുന്നത്. സാധാരണ നിക്ഷേപകർക്കും മുതിർന്ന പൗരന്മാർക്കും ഒരേ പലിശ നിരക്കാണ് ലഭിക്കുന്നത്.

1 വർഷ ടൈം ഡെപ്പോസിറ്റ്- 6.6 ശതമാനം

2 വർഷ ടൈം ഡെപ്പോസിറ്റ്- 6.8 ശതമാനം

3 വർഷ ടൈം ഡെപ്പോസിറ്റ്- 6.9 ശതമാനം

5 വർഷ ടൈം ഡെപ്പോസിറ്റ്- 7.0 ശതമാനം 

എസ്ബിഐ പലിശ നിരക്ക്

എസ്ബിഐയിൽ 7 ദിവസം മുതൽ 10 വർഷത്തേക്കാണ് സ്ഥിര നിക്ഷേപം സ്വീകരിക്കുന്നത്. സാധാരണ ഉപഭോക്താക്കൾക്ക് 3 ശതമാനം മുതൽ 7.1 ശതമാനം വരെയാണ് പലിശ നൽകുന്നത്. നിക്ഷേപങ്ങളിൽ മുതിർന്ന പൗരന്മാർക്ക് 0.50 ശതമാനത്തിന്റെ അധിക നിരക്ക് ലഭിക്കും.

5 വർഷത്തിന് മുകളിലുള്ള സ്ഥിര നിക്ഷേപങ്ങൾക്ക് എസ്ബിഐ വീകെയർ പദ്ധതിയുടെ ഭാ​ഗമായി മുതിർന്ന പൗരന്മാർക്ക് 0.50 ശതമാനം പലിശ അധികമായി ലഭിക്കും. ആകെ 1 ശതമാനം അധിക പലിശ നേടാം. 

7 ദിവസം മുതൽ 45 ദിവസം വരെ - 3 ശതമാനം

46 ദിവസം മുതൽ 179 ദിവസം വരെ - 4.5%

180 ദിവസം മുതൽ 210 ദിവസം വരെ - 5.25%

211 ദിവസം മുതൽ 1 വർഷത്തിൽ താഴെ വരെ - 5.75%

1 വർഷം മുതൽ 2 വർഷം വരെ - 6.8%

400 ദിവസം (അമൃത് കലശ്)- 7.10%

2 വർഷം മുതൽ 3 വർഷം വരെ - 7.00%

3 വർഷം മുതൽ 5 വർഷം വരെ - 6.5%

5 വർഷം മുതൽ 10 വർഷം വരെ - 6.5% 

താരതമ്യം

പലിശ നിരക്ക് പുതുക്കിയതോടെ എസ്ബിഐയിൽ 1 വർഷം മുതൽ 3 വർഷം വരെയുള്ള നിക്ഷേപങ്ങൾക്ക് പോസ്റ്റ് ഓഫീസിനേക്കാൾ പലിശ സാധാരണ നിക്ഷേപകർക്ക് ലഭിക്കും. മുതിർന്ന പൗരന്മാർക്ക് എസ്ബിഐ തന്നെയാണ് ഈ കാലയളവിൽ ലാഭം. എന്നാൽ എസ്ബിഐയിൽ 3 വർഷം മുതൽ 10 വർഷത്തേക്ക് സാധാരണ നിക്ഷേപകർക്ക് ലഭിക്കുന്ന പലിശ 6.50 ശതമാനം മാത്രമാണ്.

പോസ്റ്റ് ഓഫീസിൽ 6.9 ശതമാനം, 7 ശതമാനം എന്നിങ്ങനെയാണ് പലിശ നിരക്ക്. ഇതിനാൽ ഇക്കാലയളവിൽ പോസ്റ്റ് ഓഫീസ് ലാഭകരമായി കാണാം. മുതിർന്ന പൗരന്മാണെങ്കിൽ എസ്ബിഐയിൽ 10 വർഷത്തേക്ക് 7.50 ശതമാനം പലിശ ലഭിക്കും.