30 ലക്ഷം രൂപയ്ക്ക് മുകളിൽ ഭവന വായ്പയെടുക്കുമ്പോൾ എന്ത് ചെലവ് വരും; 5 ബാങ്കുകളിലെ നിരക്കറിയാം

ഭവന വായ്പയിലേക്ക് കടക്കുന്നൊരാള്‍ ആദ്യം ചെയ്യേണ്ടത് വായ്പ പലിശ നിരക്കുകള്‍ താരതമ്യം ചെയ്യുക എന്നതാണ്. ബാങ്കുകള്‍ നിരക്ക് ഉയര്‍ത്തുന്ന സമയത്ത് മികച്ച പലിശ കണ്ടെത്താന്‍ ബാങ്കുകള്‍ക്കിടയില്‍ ഈ താരതമ്യം അനിവാര്യമാണ്. രാജ്യത്തെ മുന്‍നിര ബാങ്കുകള്‍ 50 ലക്ഷം രൂപയ്ക്ക് മുകളില്‍ വായ്പയെടുക്കുമ്പോള്‍ എത്ര ശതമാനം നിരക്കിലാണ് പലിശ ഈടാക്കുന്നതെന്ന് നോക്കാം.

ഭവന വായ്പയ്ക്ക് മുൻപ് ശ്രദ്ധിക്കാം

വായ്പയ്ക്ക് മുൻപ് ശ്രദ്ധിക്കേണ്ട പ്രധാന കാര്യമാണ് ഡൗൺപേയ്മെന്റ്. വായ്പ നൽകുന്ന ബാങ്കുകൾ വസ്തുവിൻ്റെ മൂല്യത്തിൻ്റെ ഒരു ഭാഗം മാത്രമേ വായ്പ നൽകുന്നുള്ളൂ. അതിനാൽ ബാക്കി തുക ഡൗൺപെയ്മെന്റായി കരുതണം. വസ്തുവിൻ്റെ വിലയും അപേക്ഷകൻ്റെ യോഗ്യതയും അനുസരിച്ച് ലോൺ ടു വാല്യു അനുപാതം 75 ശതമാനം മുതൽ 90 ശതമാനം വരെയാകാം.

ഭവന വായ്പ തിരിച്ചടവിന് തടസമുണ്ടാകാത്ത തരത്തിൽ പ്രതിമാസ ചെലവുകൾ ക്രമീകരിക്കുന്ന ബജറ്റ് തയ്യാറാക്കേണ്ടതുണ്ട്. ലേറ്റ് ഫീസും ഉയർന്ന പലിശനിരക്കും ഒഴിവാക്കാൻ ഇത് സഹായിക്കും. ചെലവുകളിൽ ജാഗ്രത പാലിക്കുകയും അത്യാവശ്യമല്ലാത്ത വാങ്ങലുകൾ മാറ്റിവയ്ക്കുന്നതും ഭവന വായ്പ വേഗത്തിൽ അടയ്ക്കാനും ദീർഘകാലാടിസ്ഥാനത്തിൽ പണം ലാഭിക്കാനും സഹായിക്കും.

ഐസിഐസിഐ ബാങ്ക്

35ലക്ഷത്തിനും 75 ലക്ഷത്തിനും ഇടയില്‍ ഭവന വായ്പയെടുക്കുമ്പോള്‍ ഐസിഐസിഐ ബാങ്ക് ശമ്പളക്കാര്‍ക്ക് 9.50- 9.8 ശതമാനം നിരക്കില്‍ പലിശ ഈടാക്കും. സ്വയം തൊഴിലാണെങ്കില്‍ നിരക്ക് 9.65- 9.95 ശതമാനത്തിലേക്ക് എത്തും. വായ്പ തുക 75 ലക്ഷത്തിന് മുകളിലേക്ക് പോകുമ്പോള്‍ പലിശ നേരിയ തോതില്‍ ഉയരും. 9.60 ശതമാനം മുതല്‍ 9.9 ശതമാനം വരെയാണ് ശമ്പളക്കാര്‍ക്കുള്ള പലിശ നിരക്ക്. സ്വയം തൊഴിലാണെങ്കില്‍ 9.75 മുതല്‍ 10.05 ശതമാനം വരെ പലിശ ഈടാക്കും.

എച്ച്ഡിഎഫ്‌സി ബാങ്ക്

സാധാരണ ഭവന വായ്പകള്‍ക്ക് 8.9 ശതമാനം മുതല്‍ 9.60 ശതമാനംവരെയാണ് എച്ച്ഡിഎഫ്‌സി ബാങ്ക്് ഈടാക്കുന്ന പലിശ നിരക്ക്. അതേസമയം പ്രത്യേക ഭവന വായ്പ നിരക്കുകള്‍ 8.55 ശതമാനം മുതല്‍ 9.10 ശതമാനം വരെയാണ്.

എസ്ബിഐ

എസ്ബിഐയിലെ ഭവന വായ്പ പലിശ നിരക്ക് വായ്പയെടുക്കുന്നയാളുടെ ക്രെഡിറ്റ് സ്‌കോറിനെ അടിസ്ഥാനമാക്കിയാണ്. ഉയര്‍ന്ന ക്രെഡിറ്റ് സ്‌കോറുള്ളവര്‍ക്ക് 9.15 ശതമാനം മുതല്‍ 9.55 ശതമാനം വരെ പലിശയില്‍ എസ്ബിഐയില്‍ നിന്ന് ഭവന വായ്പ ലഭിക്കും. 700-749 നും ഇടിയില്‍ ക്രെഡിറ്റ് സ്‌കോറുള്ളവര്‍ക്ക് 9.35 ശതമാനം മുതല്‍ 9.75 ശതമാനം വരെ പലിശയില്‍ ഭവന വായ്പ ലഭിക്കും.

650 നും 699 നും ഇടയില്‍ ക്രെഡിറ്റ് സ്‌കോറുള്ള അപേക്ഷകര്‍ക്ക് 9.45- 9.85 ശതമാനം വരെ പലിശയില്‍ വായ്പ ലഭിക്കും. ഇതിനേക്കാളും കുറഞ്ഞ ക്രെഡിറ്റ് സ്‌കോറുള്ളവര്‍ ഉയര്‍ന്ന നിരക്ക് വായ്പയ്ക്ക് നല്‍കേണ്ടി വരും. 9.65- 10.05 ശതമാനമാണ് എസ്ബിഐ ഈടാക്കുന്ന നിരക്ക്.

പഞ്ചാബ് നാഷണല്‍ ബാങ്ക്

800 മുകളില്‍ ക്രെഡിറ്റ് സ്‌കോറുള്ളവര്‍ക്ക് 30 ലക്ഷം രൂപയ്ക്ക് മുകളിലുള്ള ഭവന വായ്പ 8.40 ശതമാനം പലിശ നിരക്കില്‍ പഞ്ചാബ് നാഷണല്‍ ബാങ്കില്‍ നിന്ന് ലഭിക്കും. ക്രെഡിറ്റ് സ്‌കോര്‍ 750 ലുള്ളവര്‍ക്ക് വായപ തുക പരിഗണിക്കാതെ 9.45 ശതമാനമാണ് പലിശ നിരക്ക്. കുറഞ്ഞ ക്രെഡിറ്റ് സ്‌കോറുകാര്‍ 9.90 ശതമാനം മുതല്‍ 11 ശതമാനം വരെ പലിശ നല്‍കേണ്ടി വരും.

ബാങ്ക് ഓഫ് ബറോഡ

പൊതുമേഖലാ ബാങ്കായ ബാങ്ക് ഓഫ് ബറോഡ 8.40 ശതമാനം മുതല്‍ 10.6 ശതമാനം വരെയാണ് ഭവന വായ്പയ്ക്ക് ഈടാക്കുന്ന പലിശനിരക്ക്.