പോസ്റ്റ് ഓഫീസും എസ്ബിഐയും 4 ബാങ്കുകളും; സേവിം​ഗ്സ് അക്കൗണ്ടിന് എവിടെയാണ് നേട്ടം

അത്യാവശ്യങ്ങള്‍ക്കായി കരുതുന്ന ഫണ്ട് സൂക്ഷിക്കാന്‍ എല്ലാവരും തിരഞ്ഞെടുക്കുന്നത് സേവിംഗ്‌സ് അക്കൗണ്ടുകളാണ്. ബാങ്കിം​ഗ് ഇടപാടുകൾ മൊബൈൽ വഴി എളുപ്പത്തിൽ ചെയ്യാൻ സാധിക്കുന്ന കാലത്ത് സേവിം​ഗ്സ് അക്കൗണ്ടില്ലാത്തവർ വളരെ ചുരുക്കമാകും. മികച്ച പലിശ നിരക്ക് നൽകുന്ന ബാങ്കുകളിൽ സേവിംഗ്‌സ് അക്കൗണ്ട് ആരംഭിക്കുന്നതാണ് നേട്ടം.

സേവിം​ഗ്സ് അക്കൗണ്ടുകളിൽ മിനിമം ബാലൻസും അക്കൗണ്ട് തുറക്കുന്ന സമയത്ത് പരി​ഗണിക്കേണ്ടതുണ്ട്. എസ്ബിഐ, എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, ആക്സിസ് ബാങ്ക്, ഐഡിഎഫ്സി ഫസ്റ്റ് ബാങ്ക്, പോസ്റ്റ് ഓഫീസ് സേവിം​ഗ്സ് അക്കൗണ്ട് എന്നിവയുടെ പലിശ നിരക്കും മിനിമം ബാലൻസുമാണ് ചുവടെ വിശദീകരിക്കുന്നത്.

എസ്ബിഐ സേവിംഗ്‌സ് അക്കൗണ്ട്

1 ലക്ഷം വരെ ബാലന്‍സുള്ള സേവിംഗ്‌സ് അക്കൗണ്ടിന് 2.70 ശതമാനം പലിശയാണ് സ്റ്റേറ്റ് ബാങ്ക് ഓഫ് ഇന്ത്യ അനുവദിക്കുന്നത്. 1 ലക്ഷത്തിന് മുകളിലുള്ള അക്കൗണ്ടുകള്‍ക്കും ഇതേ പലിശ ലഭിക്കും. 2020 മേയ്് 31നാണ് ബാങ്ക് ഈ നിരക്കുകള്‍ പ്രഖ്യാപിച്ചത്.

2020 മാര്‍ച്ച് മുതല്‍ മിനിമം ബാലന്‍സ് ചാര്‍ജുകള്‍ എസ്ബിഐ പിന്‍വലിച്ചിരുന്നു. ഇത് അക്കൗണ്ട് ഉടമകൾക്ക് ആശ്വാസമാണ്. നേരത്തെ 5 രൂപ മുതൽ 15 രൂപ വരെ മിനിമം ബാലൻസ് കുറഞ്ഞാൽ എസ്ബിഐ പിഴ ഈടാക്കിയിരുന്നു.

എച്ച്ഡിഎഫ്‌സി ബാങ്ക് സേവിംഗ്‌സ് അക്കൗണ്ട്

2022 ഏപ്രില്‍ 6നാണ് എച്ച്ഡിഎഫ്‌സി ബാങ്ക് സേവിം​ഗ്സ് അക്കൗണ്ടുകളുടെ പലിശ നിരക്ക് വര്‍ധിപ്പിച്ചത്. 50 ലക്ഷത്തില്‍ താഴെ ബാലന്‍സുള്ള അക്കൗണ്ടുകള്‍ക്ക് 3 ശതമാനമാണ് പലിശ നിരക്ക്. 50 ലക്ഷത്തില്‍ കൂടുതല്‍ ബാലന്‍സുള്ള അക്കൗണ്ടുകള്‍ക്ക് 3.5 ശതമാനം പലിശ ലഭിക്കും. പാദങ്ങളിലാണ് സേവിംഗ്‌സ് ബാങ്ക് അക്കൗണ്ടില്‍ പലിശ കണക്കാക്കുക.

അര്‍ബന്‍ ഏരിയയില്‍ 10,000 രൂപയാണ് എച്ച്ഡിഎഫ്‌സി ബാങ്ക് ആവശ്യപ്പെടുന്ന മിനിമം ബാലന്‍സ്. സെമി അര്‍ബന്‍ ഏരിയയില്‍ 5,000 രൂപയും റൂറല്‍ ബ്രാഞ്ചുകളില്‍ 2,500 രൂപയുമാണ് ആവശ്യം. ബാലൻസില്ലാത്ത പക്ഷം 600 രൂപ മുതല്‍ 450 രൂപ വരെ പിഴ ലഭിക്കും.

ഐസിഐസിഐ ബാങ്ക് സേവിംഗ്‌സ് അക്കൗണ്ട്

2020 ജൂണ്‍ നാലിനാണ് ഐസിഐസിഐ ബാങ്ക് പലിശ നിരക്ക് പുതുക്കി നിശ്ചയിക്കുന്നത്. പ്രതിദിന ക്ലോസിംഗ് ബാലന്‍സിന്റെ അടിസ്ഥാനത്തില്‍ പലിശ കണക്കാക്കി പാദങ്ങളിലാണ് പലിശ അനുവദിക്കുന്നത്. ദിവസത്തില്‍ സേവിംഗ്‌സ് ബാങ്ക് അക്കൗണ്ട് ബാലന്‍സ് 50 ലക്ഷത്തില്‍ താഴെയാണെങ്കില്‍ 3 ശതമാനവും 50 ലക്ഷത്തില്‍ കൂടുതലാണെങ്കില്‍ 3.50 ശതമാനവും ലഭിക്കും.

ഐസിഐസിഐ ബാങ്കില്‍ മെട്രോ, അര്‍ബന്‍ ബ്രാഞ്ചുകളില്‍ 10,000 രൂപ മിനിമം ബാലന്‍സ് വേണം. സെമി അര്‍ബന്‍ മേഖലയില്‍ 5,000 രൂപ, റൂറല്‍ മേഖലയില്ഡ 2000 രൂപ ഗ്രാമീണ്‍ മേഖലയില്‍ 1,000 രൂപ എന്നിങ്ങനെയാണ് മിനിമം ബാലന്‍സ് ആവശ്യം.

ആക്‌സിസ് ബാങ്ക് സേവിംഗ്‌സ് അക്കൗണ്ട്

3 ശതമാനം മുതല്‍ 3.5 ശതമാനം വരെയാണ് ആക്‌സിസ് ബാങ്ക് സേവിംഗ്‌സ് അക്കൗണ്ുകള്‍ക്ക് നല്‍കുന്ന പലിശ നിരക്ക്. 2022 ജൂണ്‍ 1നാണ് പലിശ നിരക്ക് പുതുക്കിയത്. പ്രതിദിന ബാലന്‍സിനെ അടിസ്ഥാനമാക്കി പലിശ കണക്കാക്കി മൂന്ന് മാസത്തിലൊരിക്കലാണ അുവദിക്കുന്നത്.

50 ലക്ഷത്തില്‍ താഴെ ബാലന്‍സുള്ള അക്കൗണ്ടുകള്‍ക്കാണ് 3 ശതമാനം പലിശ. 50 ലക്ഷത്തിന് മുകളില്‍ 3.5 ശതമാനം പലിശ ലഭിക്കും. സെമി അര്‍ബന്‍, അര്‍ബന്‍, മെട്രോ നഗരങ്ങളില്‍ 15,000 രൂപ മുതല്‍ 25000 രൂപ വരെയാണ് മിനിമം ബാലൻസ്.

ഐഡിഎഫ്‌സി ഫസ്റ്റ് ബാങ്ക്

2022 ജൂണ്‍ 1നാണ് ഐഡിഎഫ്‌സി ഫസ്റ്റ് ബാങ്ക് പലിശ നിരക്ക് പുതുക്കിയത്. 10 ലക്ഷം വരെ ബാലന്‍സുള്ള അക്കൗണ്ടുകള്‍ക്ക് 4 ശതമാനമാണ് പലിശ. 10 ലക്ഷത്തിനും 10 കോടിക്കും ഇടയില്‍ 6 ശതമാനം പലിശ ബാങ്ക് നല്‍കുന്നുണ്ട്. 10,000 രൂപയാണ് ഐഡിഎഫ്‌സി ഫസ്റ്റ് ബാങ്കില്‍ ആവശ്യമുള്ള മിനിമം ബാലന്‍സ്. 2015 ലാണ് ഈ സ്വകാര്യ ബാങ്ക് ആരംഭിക്കുന്നത്.

പോസ്റ്റ് ഓഫീസ് സേവിംഗ്‌സ് അക്കൗണ്ട്

2022 ജൂലായ് സെപ്റ്റംബര്‍ പാദത്തിലെ നിരക്ക് പ്രകാരം പോസ്റ്റ് ഓഫീസ് സേവിംഗ്‌സ് അക്കൗണ്ടുകള്‍ക്ക് 4 ശതമാനമാണ് പലിശ നിരക്ക്. സാമ്പത്തിക വര്‍ഷത്തിലാണ് പലിശ ക്രെഡിറ്റ് ചെയ്യുന്നത്.500 രൂപയാണ് പോസ്റ്റ് ഓഫീസ് സേവിംഗ്‌സ് അക്കൗണ്ടിന്റെ മിനിമം ബാലന്‍സ്. വ്യക്തിഗത അക്കൗണ്ടും സംയുക്ത അക്കൗണ്ടും അനുവദിക്കുന്നുണ്ട്.