10000 രൂപയുടെ നിക്ഷേപം 50 ലക്ഷമാകും, കൂട്ടുപലിശയുടെ ശക്തി ചെറുതല്ല, നേട്ടം ഇരട്ടിയാണ്,നിക്ഷേപങ്ങൾ ഇതൊക്കെയാണ്

സാമ്പത്തിക നിക്ഷേപം എന്നതിലൂടെ ഏതൊരാളുടേയും ലക്ഷ്യം സാമ്പത്തികമായ സുരക്ഷിതത്വം നേടുക എന്നതാണ്. അതുകൊണ്ടു തന്നെ നിക്ഷേപത്തിലൂടെ കൂടുതൽ വരുമാനം ലഭിക്കുന്ന നിക്ഷേപ പദ്ധതി തന്നെയാണ് തിരഞ്ഞെടുക്കുകയും ചെയ്യേണ്ടത്. കൂട്ടുപലിശയുടെ ഗുണം ലഭിക്കുന്ന നിക്ഷേപം തിരഞ്ഞെടുക്കുന്നത് പണം വേഗത്തിൽ വളരാൻ സഹായിക്കും.

എന്താണ് കൂട്ടുപലിശ...?

പ്രാരംഭ മൂലധനവും മുൻകാലയളവുകളിലെ വായ്പയുടെ പലിശയും അടിസ്ഥാനമാക്കി കണക്കാക്കുന്ന പലിശ തുകയാണ് കൂട്ടുപലിശ. കൂട്ടു പലിശയെ "പലിശയുടെ പലിശ" എന്നും കണക്കാക്കാം. ഇത് ലളിതമായ പലിശയേക്കാൾ വേഗത്തിൽ വായ്പ തുക വളരാൻ കാരണമാകുന്നു. വായ്പാ കാലാവധി കൂടുന്നതിന് അനുസരിച്ച് കൂട്ടുപലിശ വർദ്ധിക്കും. ദീർഘകാലാടിസ്ഥാനത്തിലുള്ള നിക്ഷേപ വരുമാനം ഗണ്യമായി വർദ്ധിപ്പിക്കാൻ കൂട്ടു പലിശയ്ക്ക് കഴിയും.

ലക്ഷപ്രഭു അല്ല, കോടീശ്വരൻ.! നിങ്ങൾക്കും നേടാം 5 കോടി, നിക്ഷേപം ഇങ്ങനെ ക്രമീകരിക്കൂ,

ഏതൊക്കെ നിക്ഷേപ പദ്ധതികൾ

സ്ഥിര നിക്ഷേപങ്ങൾ, ഇക്വിറ്റി മ്യൂച്വൽ ഫണ്ടുകൾ, പബ്ലിക് പ്രൊവിഡന്‍റ് ഫണ്ട്, ഇക്വിറ്റി-ലിങ്ക്ഡ് സേവിംഗ്സ് സ്കീം (ഇഎൽഎസ്എസ്), നാഷണൽ സേവിംഗ്സ് സ്കീം (എൻഎസ്‌സി), നാഷണൽ പെൻഷൻ സിസ്റ്റം (എൻപിഎസ്) എന്നിവ സംയുക്ത പലിശ വാഗ്ദാനം ചെയ്യുന്ന ജനപ്രിയ നിക്ഷേപ പദ്ധതികളിൽ ചിലതാണ്.

വലിയ തുക നിക്ഷേപിക്കേണ്ടതില്ല

നിക്ഷേപത്തിലൂടെ ഉയർന്ന തുക കണ്ടെത്തുന്നതിന് കൂട്ടുപലിശ വാഗ്ദാനം ചെയ്യുന്ന നിക്ഷേപങ്ങളിൽ വലിയ തുക നിക്ഷേപിക്കേണ്ടതില്ല. ഒരു പക്ഷെ പ്രതിമാസം 5000 രൂപയുടെ നിക്ഷേപം പോലും കൂട്ടുപലിശയിലൂടെ ഒരു കോടി രൂപയായി വളരും.

'കടം' ബാധ്യതയാകില്ല, ഇക്കാര്യങ്ങൾ ശ്രദ്ധിച്ചാൽ

കൂട്ടുപലിശയുടെ വളർച്ച

ഒരു ചെറിയ ഉദാഹരണം പരിശോധിച്ചാൽ കൂട്ടുപലിശയുടെ വളർച്ച ഏത് രീതിയിലാണെന്ന് മനസിലാക്കാം.

ലളിതമായ പലിശയും കൂട്ടുപലിശയും നൽകുന്ന ഒരു സ്കീമിൽ 2 ലക്ഷം രൂപ നിക്ഷേപിക്കുന്നു എന്ന് കരുതുക. ഓരോന്നിനും 10 ശതമാനം വാർഷിക പലിശ ലഭിക്കുകയും 10 വർഷത്തിന് ശേഷം പണം പിൻവലിക്കുകയും ചെയ്താൽ എത്ര രൂപയാകുമെന്ന് നോക്കാം.

ലളിതമായ പലിശ ലഭിക്കുമ്പോൾ

ലളിതമായ പലിശ സ്കീമിൽ, പലിശ ഇനത്തിൽ ലഭിക്കുക 2 ലക്ഷം രൂപയാണ്. അതായത് ആകെ ലഭിക്കുന്ന തുക നാല് ലക്ഷം രൂപ.

നിക്ഷേപിച്ച 2 ലക്ഷം + പലിശ 2 ലക്ഷം = 4 ലക്ഷം രൂപ

കൂട്ടുപലിശ കിട്ടുമ്പോൾ

എന്നാൽ കൂട്ടുപലിശ ലഭിക്കുന്ന നിക്ഷേപ പദ്ധതിയാണെങ്കിൽ പലിശ ഇനത്തിൽ മാത്രം 3.19 ലക്ഷം രൂപ ലഭിക്കും. അതായത് ആകെ 5.19 ലക്ഷം രൂപ കാലാവധി പൂർത്തിയാകുമ്പോൾ ലഭിക്കും.

നിക്ഷേപിച്ച 2 ലക്ഷം + പലിശ 3.19 ലക്ഷം = 5.19 ലക്ഷം

കാലാവധി വർധിക്കുമ്പോൾ കൂടുതൽ പണം

കൂട്ടുപലിശ ലഭിക്കുന്ന പദ്ധതിയുടെ കാലാവധി വർദ്ധിക്കുന്നതിനനുസരിച്ച് ലഭിക്കുന്ന പണത്തിലും വലിയ വർദ്ധനവുണ്ടാകും. വീണ്ടും ഒരു ഉദാഹരണം നോക്കാം.

10 ശതമാനം കൂട്ടുപലിശ വാഗ്ദാനം ചെയ്യുന്ന ഒരു സ്കീമിൽ 10 വർഷത്തേക്ക് പ്രതിമാസം 10,000 രൂപ നിക്ഷേപിക്കുന്നു എന്ന് കരുതുക. പത്ത് വർഷത്തിന് ശേഷം നിക്ഷേപിച്ച തുക 12 ലക്ഷവും പലിശ ഇനത്തിൽ 11.23 ലക്ഷവും ലഭിക്കും. അതായത് ആകെ ലഭിക്കുന്ന തുക 23.23 ലക്ഷം രൂപ ആയിരിക്കും.

എന്നാൽ അതേ നിക്ഷേപം 5 വർഷം കൂടി തുടരുകയാണെങ്കിൽ 6 ലക്ഷം രൂപ അധികമായി നിക്ഷേപിക്കും. അതായത് ആകെ നിക്ഷേപം 18 ലക്ഷം രൂപയാകും. എന്നാൽ പലിശ ഇനത്തിൽ 32.5 ലക്ഷം രൂപ ലഭിക്കും. അതായത് ആകെ ലഭിക്കുന്ന തുക 50.5 ലക്ഷം.

തുക കുറഞ്ഞാലും കാലാവധി കൂട്ടണം

രണ്ട് സുഹൃത്തുക്കളുണ്ട്, ഓരോരുത്തരും 10 ശതമാനം കൂട്ടുപലിശ വാഗ്ദാനം ചെയ്യുന്ന ഒരു സ്കീമിൽ നിക്ഷേപിക്കുന്നു.

ആദ്യത്തെ സുഹൃത്ത് 10 വർഷത്തേക്ക് പ്രതിമാസം 3000 രൂപയും രണ്ടാമൻ അഞ്ച് വർഷത്തേക്ക് പ്രതിമാസം 6,000 രൂപയും നിക്ഷേപിക്കുന്നു. അതായത് രണ്ട് പേരും നിക്ഷേപിക്കുന്ന തുക 3.6 ലക്ഷം രൂപയായിരിക്കും.

3000 രൂപ പ്രതിമാസം നിക്ഷേപമുള്ള സുഹൃത്തിന് കൂട്ടുപലിശ ഇനത്തിൽ 2.44 ലക്ഷം രൂപ ലഭിക്കും. 6.04 ലക്ഷം രൂപ മെച്യൂരിറ്റി തുകയും ലഭിക്കും.

6000 രൂപ പ്രതിമാസ നിക്ഷേപമുള്ള രണ്ടാമത്തെ സുഹൃത്തിന് വെറും 1.03 ലക്ഷം രൂപ കൂട്ടുപലിശ മാത്രമേ ലഭിക്കുകയുള്ളു. മെച്യൂരിറ്റി തുക 4.63 ലക്ഷം രൂപയായിരിക്കും.

അതായത് തുക കുറഞ്ഞാലും കാലാവധി വർദ്ധിക്കുന്നതിനനുസരിച്ച് തുകയിലും വലിയ വർദ്ധനവുണ്ടാകുമെന്ന് സാരം.