പലിശ; സുരക്ഷ; കാലാവധി; സ്ഥിര നിക്ഷേപമിടാന്‍ മികച്ച ബാങ്കിനെ എങ്ങനെ കണ്ടെത്തും

അധികം റിസ്‌കെടുക്കാന്‍ താല്പര്യമില്ലാത്ത നിക്ഷേപകര്‍ പിന്തുടരുന്നൊരു നിക്ഷേപമാണ് സ്ഥിര നിക്ഷേപം. ഇന്ത്യയില്‍ ഭൂരിഭാഗം പേരും സ്ഥിര നിക്ഷേപത്തെ ആശ്രയിക്കുന്നുണ്ട്. പലിശ നിരക്കുയര്‍ന്ന സമയത്ത് മികച്ച മികച്ച ബാങ്ക് നിക്ഷേപങ്ങൾക്ക് ലഭിക്കുന്നതിനാൽ കൂടുതൽ പേർ സ്ഥിര നിക്ഷേപം നടത്തുന്ന സമയമാണിത്.

മികച്ച ബാങ്കുകൾ കണ്ടെത്തി സ്ഥിര നിക്ഷേപമിടുക എന്നതാണ് ഇവിടെ പ്രധാനപ്പെട്ട കാര്യമാണ്. പലരും നിലവില്‍ അക്കൗണ്ടുള്ള ബാങ്കുകളിലോ സമീപത്തുള്ള ബാങ്കുകളോ ആണ് സ്ഥിര നിക്ഷേപത്തിനായി തിരഞ്ഞെടുക്കുന്നത്. എന്നാല്‍ ഇതാണോ യഥാര്‍ഥ വഴി. സ്ഥിര നിക്ഷേപമിടാന്‍ ഒരു ബാങ്ക് തിരഞ്ഞെടുക്കേണ്ടത് എങ്ങനെ എന്ന് നോക്കാം.

പരി​ഗണിക്കേണ്ട കാര്യങ്ങൾ

സ്ഥിര നിക്ഷേപമിടാന്‍ ബാങ്ക് തിരഞ്ഞെടുക്കുമ്പോള്‍ പൊതുമേഖലാ ബാങ്ക്, സ്വകാര്യ ബാങ്ക്, സ്മോൾ ഫിനാൻസ് ബാങ്ക്, സഹകരണ ബാങ്ക് എന്നിങ്ങനെ നിരവധി ഓപ്ഷനുകൾ ലഭിക്കും. ഇതിൽ നിന്ന് ഒന്ന് കണ്ടെത്തുക എന്നത് സാധാരണക്കാരെ സംബന്ധിച്ച് വലിയ ബുദ്ധിമുട്ടുള്ള കാര്യമാണ്. എന്നാൽ സ്ഥിര നിക്ഷേപം പരി​ഗണിക്കുന്നൊരാൾ പലിശ നിരക്ക്, നിക്ഷേപത്തിന്റ സുരക്ഷിതത്വം, വ്യക്തിപരമായ സൗകര്യങ്ങള്‍ എന്നിവയ്ക്ക് പരിഗണന നൽകണം. 

പലിശ നിരക്ക്

റിപ്പോ നിരക്കിന് പിന്നാലെ ബാങ്കുകള്‍ നിക്ഷേപ പലിശ നിരക്കുയര്‍ത്തിട്ടുണ്ട്. പൊതുവെ മുന്‍നിര ബാങ്കുകളെ അപേക്ഷിച്ച് ചെറുകിട ബാങ്കുകളാണ് മികച്ച പലിശ നല്‍കുന്നത്. ഒന്നിലധികം ബാങ്കുകളുടെ പലിശ നിരക്ക് താരതമ്യം ചെയ്യേണ്ടത് അനിവാര്യമാണ്. ഉയര്‍ന്ന പലിശ നല്‍കുന്ന ചെറുകിട ബാങ്കുകളില്‍ നിക്ഷേപിക്കുമ്പോള്‍ ഇവിടെയുള്ള റിസ്‌ക് പരിഗണിക്കേണ്ടതാണ്. 

കാലാവധി

മികച്ച പലിശ നിരക്കിനൊപ്പം ശ്രദ്ധ പുലർത്തേണ്ട കാര്യം കാലാവധിയാണ്. ഓരോരുത്തരും വ്യത്യസ്ത സാമ്പത്തിക ലക്ഷ്യങ്ങൾ കണക്കാക്കി നിക്ഷേപം നടത്തുന്നവരാകും. പല ബാങ്കുകളും ഹ്രസ്വകാലത്തേക്ക് പ്രത്യേക സ്ഥിര നിക്ഷേപ പദ്ധതി വഴി ഉയർന്ന പലിശ നൽകുന്നുണ്ട്. ഉദാഹരണമായി എസ്ബിഐ 400 ദിവസത്തെ സ്ഥിര നിക്ഷേപത്തിന് 7.10 ശതമാനം പലിശ നൽകുന്നു. എന്നാൽ 5 വർഷത്തേക്ക് ലഭിക്കുന്ന പലിശ നിരക്ക് 6.50 ശതമാനമാണ്. ഇത്തരത്തിൽ ഓരോരുത്തരുടെയും കാലാവധി മനസിലാക്കിയുള്ള നിക്ഷേപങ്ങൾ തിരഞ്ഞെടുക്കണം. 

സുരക്ഷ

നിക്ഷേപിക്കുന്ന തുകയുടെ സുരക്ഷിതത്വം ഏറ്റവും പ്രധാനമാണ്. സാമ്പത്തിക ശേഷിയും വലുപ്പവും അനുസരിച്ച് വലിയ ബാങ്കുകളാണ് ചെറിയ ബാങ്കുകളേക്കാള്‍ സുരക്ഷിതമെന്ന് കാണാം. ചെറിയ ബാങ്കുകളെ അപേക്ഷിച്ച് വലിയ ബാങ്കുകള്‍ക്ക് സാമ്പത്തിക മാന്ദ്യങ്ങളും സാമ്പത്തിക പ്രതിസന്ധികളും നേരിടാന്‍ കഴിയും. എല്ലാ ബാങ്കുകൾക്കും ഡെപ്പോസിറ്റ് ഇൻഷൂറൻസ് ആൻഡ് ക്രെഡിറ്റ് ​ഗ്യാരണ്ടി ​കോർപ്പറേഷന്റെ 5 ലക്ഷം രൂപയുടെ ഇൻഷൂറൻസ് ലഭിക്കുന്നവയായിരിക്കും.

വ്യക്തിഗത മുന്‍ഗണനകള്‍

വ്യക്തിപരമായ മുന്‍ഗണനകളും സാമ്പത്തിക ലക്ഷ്യങ്ങളും ഏത് ബാങ്കിൽ നിക്ഷേപിക്കണം എന്നതിൽ പ്രധാന പങ്കുവഹിക്കുന്ന കാര്യമാണ്. ഒരു വലിയ ബാങ്കിന്റെ സൗകര്യവും പ്രവേശനക്ഷമതയും ആ​ഗ്രഹിക്കുന്നുവെങ്കിൽ കൂടുതൽ ശാഖകളുള്ള വലിയ ബാങ്ക് നിക്ഷേപിക്കാന്‍ തിരഞ്ഞെടുക്കാം. ചെറിയ ബാങ്കുമായി ബന്ധം പുലര്‍ത്താൻ താൽപര്യപ്പെടുന്നവർക്ക് ചെറുകിട ബാങ്കുകളെ തിരഞ്ഞെടുക്കാം. വലിയ ബാങ്കുകളാണെങ്കിൽ രാജ്യത്തുടനീളം ശാഖകളുണ്ടാകും. പുത്തൻ തലമുറ ബാങ്കുകൾ കൂടുതൽ സൗകര്യങ്ങൾ വാ​ഗ്ദാനം ചെയ്യുന്നവയായിരിക്കും.

എവിടെ നിക്ഷേപിക്കണം

സ്ഥിര നിക്ഷേപങ്ങള്‍ക്കായി മുൻനിര ബാങ്കുകളോ പുത്തൻ തലമുറ ബാങ്കുകളോ തിരഞ്ഞെടുക്കണം എന്നതിന് ഓരോ വ്യക്തികളനുസരിച്ചും വ്യത്യസ്ത ഉത്തരമായിരിക്കും. തീരുമാനം എടുക്കുന്നതിന് മുൻപ് പലിശ നിരക്ക്, സുരക്ഷ, വ്യക്തിഗത മുന്‍ഗണനകള്‍ എന്നിവ പരി​ഗണിക്കേണ്ടത് പ്രധാനമാണ്. സാമ്പത്തിക ലക്ഷ്യങ്ങളും മുന്‍ഗണനകളോടും പൊരുത്തപ്പെടുന്നൊരു ബാങ്ക് തിരഞ്ഞെടുക്കണം.