സ്ഥിര നിക്ഷേപമിടാൻ ഈ 3 പൊതുമേഖലാ ബാങ്കുകൾ നോക്കാം; പലിശ നിരക്ക് 8% മുതൽ 8.50% വരെ

സ്ഥിര നിക്ഷേപത്തിന് തയ്യാറെടുക്കുന്ന മുതിർന്ന പൗരന്മാർക്ക് ഏറ്റവും മികച്ച അവസരമാണ് റിപ്പോ നിരക്ക് വർധനവിന് പിന്നാലെ കൈവന്നിരിക്കുന്നത്. 2022 മേയ് മുതൽ 250 അടിസ്ഥാന നിരക്ക് ഉയർന്ന് 6.50 ശതമാനമായി റിപ്പോ നിരക്ക്. ഇതിന് ചുവട് പിടിച്ച് ഭൂരിഭാഗം ബാങ്കുകളും സ്ഥിരനിക്ഷേപങ്ങളുടെ പലിശ നിരക്കുയർത്തി.

ഇതിനൊപ്പം മുതിർന്ന പൗരന്മാർക്ക് അധിക നിരക്ക് നൽകുന്നതിനാൽ സ്ഥിര നിക്ഷേപത്തിന് സമീപ കാലത്ത് ലഭിക്കുന്ന മികച്ച നിരക്കിലേക്ക് പലിശ എത്തിയിട്ടുണ്ട്. 8 ശതമാനത്തിന് മുകളിൽ പലിശ നിരക്ക് എത്തിയതോടെ പണപ്പെരുപ്പത്തെ മറികടക്കുന്നൊരു ആദായം മുതിർന്ന പൗരന്മാർക്ക് സ്ഥിര നിക്ഷേപത്തിൽ നിന്ന് നേടാനാകും. 8 ശതമാനം മുതൽ 8.50 ശതമാനം വരെ പലിശ നൽകുന്ന പൊതുമേഖലാ ബാങ്കുകളെ പരിചയപ്പെടാം.

പഞ്ചാബ് ആൻഡ് സിന്ദ് ബാങ്ക്

പഞ്ചാബ് ആൻഡ് സിന്ദ് ബാങ്ക് ഫെബ്രുവരി 21നാണ് അവസാനമായി പലിശ നിരക്കുയർത്തിയത്. 222 ദിവസത്തെ പ്രത്യേക സ്ഥിര നിക്ഷേപമായ പിഎസ്ബി ഉത്കൃഷ് 222 സ്കീമിൽ മുതിർന്ന പൗരന്മാർക്ക് 8.50 ശതമാനം പലിശ ലഭിക്കും. 80 വയസിന് മുകളിൽ പ്രായമുള്ള സൂപ്പർ സീനിയർ സിറ്റിസൺസിന് 8.85 ശതമാനം പലിശയും ലഭിക്കും. 

മറ്റൊരു പദ്ധതിയായ പിഎസ്ബി ഫാബുലസ് 300 ഡേയ്സ് പ്രകാരം 300 ദിവസത്തെ സ്ഥിര നിക്ഷേപത്തിന് മുതിർന്ന പൗരന്മാർക്ക് 8 ശതമാനം പലിശയും സൂപ്പർ സീനിയർ സിറ്റിസൺസ് 8.35 ശതമാനം പലിശയും ലഭിക്കും. നിക്ഷേപം ഓൺലൈൻ വഴിയാണെങ്കിൽ മുതിർന്ന പൗരന്മാർക്ക് 8.25 ശതമാനം പലിശയും സൂപ്പർ സീനിയർ സിറ്റിസൺസിന് 8.60 ശതമാനം പലിശയും ലഭിക്കും. 

പഞ്ചാബ് നാഷണൽ ബാങ്ക്

പഞ്ചാബ് നാഷണൽ ബാങ്ക് ഫെബ്രുവരി 20നാണ് അവസാനമായി പലിശ നിരക്കുയർത്തിയത്. 666 ദിവസത്തെ പ്രത്യേക സ്ഥിര നിക്ഷേപത്തിന് മുതിർന്ന പൗരന്മാർക്ക് ബാങ്ക് 7.75 ശതമാനം പലിശ നൽകും. സൂപ്പർ സീനിയർ സിറ്റിസൺസിന് 8.05 ശതമാനം പലിശ ലഭിക്കും.

നോൺ കോളബിൽ സ്ഥിര നിക്ഷേമായ ഉത്തം സ്ഥിര നിക്ഷേപ പദ്ധതിയിൽ, 15 ലക്ഷം രൂപയ്ക്ക് മുകളിലുള്ള നിക്ഷേപത്തിന് മുതിർന്ന പൗരന്മാർക്ക് 7.80 ശതമാനം പലിശയും 80 വയസിന് മുകളിലുള്ളവർക്ക് 8.10 ശതമാനം പലിശയും നൽകും. 

പഞ്ചാബ് നാഷണൽ ബാങ്കിൽ 60 വയസിന് മുകളിലുള്ള നിക്ഷേപകർക്ക് 5 വർഷത്തേക്ക് .50 ശതമാനം അധിക നിരക്കും 5 വർഷത്തിന് മുകളിൽ 0.80 ശതമാനവും ലഭിക്കും. 80 വയസിന് മുകളിലുള്ള സൂപ്പർ സീനിയർ സിറ്റിസൺസിന് എല്ലാ കാലയളവിലേക്കും 0.80 ശതമാനം അധിക നിരക്ക് ലഭിക്കും. 

യൂണിയൻ ബാങ്ക്

യൂണിയൻ ബാങ്കിൽ ഉയർന്ന പലിശ നിരക്ക് ലഭിക്കുന്ന 2 സ്ഥിര നിക്ഷേപങ്ങൾ 800 ദിവസത്തെ നിക്ഷേപവും 3 വർഷ കാലാവധിയുള്ള നിക്ഷേപവുമാണ്. സാധാരണ നിക്ഷേപകർക്ക് യൂണിയൻ ബാങ്ക് പരമാവധി 7.30 ശതമാനം പലിശ നൽകുന്നു. ഈ കാലയളവുകളിൽ മുതിർന്ന പൗരന്മാർക്ക് 7.80 ശതമാനം പലിശ നേടാൻ സാധിക്കും. സൂപ്പർ സീനിയർ സിറ്റിസൺസിന് ഇതേ കാലയളവിൽ 8.05 ശതമാനം പലിശയും ലഭിക്കും.

സാധാരണ നിക്ഷേപകർക്ക് ലഭിക്കുന്നതിനേക്കാൾ 0.50 ശതമാനം പലിശയാണ് യൂണിയൻ ബാങ്ക് മുതിർന്ന പൗരന്മാർക്ക് നൽകുന്നത്. സൂപ്പർ സീനിയർ സിറ്റിസൺസിന് 0.75 ശതമാനം പലിശയും അധികമായി ലഭിക്കും.