ക്രെഡിറ്റ് കാർഡ് നിറയെ മാറ്റങ്ങൾ; ഇനി പഴയതു പോലെ ലോഞ്ച് ആക്സസ് ലഭിക്കില്ല; ക്യാഷ്ബാക്കിലും മാറ്റങ്ങൾ

ക്രെഡിറ്റ് കാർഡ് ഉപഭോക്താക്കളിൽ താൽപര്യമുണ്ടാക്കുന്ന ഓഫറായിരുന്നു കോംപ്ലിമെന്ററിയായി ലഭിച്ചിരുന്ന ലോഞ്ച് ആക്സസുകൾ. ചെറിയ തുക ചെലവാക്കുന്നവരും സൗജന്യ ക്രെഡിറ്റ് കാർ‍ഡ് ഉപഭോക്താക്കളുമടക്കം ലോഞ്ച് ആക്സസുകൾ നന്നായി ഉപയോ​ഗിക്കാൻ തുടങ്ങിയതോടെ ക്രെഡിറ്റ് കാർഡ് കമ്പനികൾക്ക് അധിക ചെലവായി. നേരത്തെ ലോഞ്ച് ആക്സസ് എന്നത് മൊത്തെ ഉത്പ്പന്ന വിലയുടെ 0.10 ശതമാനമായിരുന്നത് ഇപ്പോൾ 0.25 ശതമാനമായി വർധിച്ചു.

ഇതോടെ കഴിഞ്ഞ 2-3 മാസങ്ങളിലായി എച്ച്ഡിഎഫ്സി ബാങ്ക്, എസ്ബിഐ കാർഡ്സ്, ആക്സിസ് ബാങ്ക്, ഐസിഐസിഐ ബാങ്ക് എന്നിവ ലോഞ്ച് ആക്സസ് അടക്കമുള്ള ക്രെഡിറ്റ് കാർഡ് ആനുകൂല്യങ്ങളിൽ വലിയ മാറ്റങ്ങൾ കൊണ്ടു വന്നു. ക്രെഡിറ്റ് കാർഡ് ഉപഭോക്താവാണെങ്കിൽ അറിയേണ്ട മാറ്റങ്ങൾ ഇതാ.

എച്ച്ഡിഎഫ്സി ബാങ്ക് ക്രെഡിറ്റ് കാർഡ്

എച്ച്ഡിഎഫ്സി ബാങ്കിന്റെ ജനപ്രിയമായ രണ്ട് ക്രെഡിറ്റ് കാർഡുകളുടെ ഓഫറുകളിലാണ് ബാങ്ക് മാറ്റം വരുത്തിയിട്ടുള്ളത്. റെ​ഗാലിയ, മില്ലേനിയ ക്രെഡിറ്റ് കാർഡുകളിലെ ലോഞ്ച് ആക്സസ് പ്രോ​ഗ്രാം 2023 ഡിസംബർ 1 മുതൽ ചെലവാക്കലിനെ അടിസ്ഥാനമാക്കിയാണ്. ഒരു കലണ്ടർ പാദത്തിൽ ഒരു ലക്ഷം രൂപയോ അതിൽ കൂടുതലോ ചെലവഴിക്കുന്നവർക്കാണ് ലോഞ്ച് ആക്സസ് ലഭിക്കുക.

ചെലവാക്കൽ മാനദണ്ഡങ്ങൾ പാലിച്ചാൽ റെ​ഗാലിയ കാർഡ് ഉടമകൾ റെ​ഗാലിയ സ്മാർട്ട് ബൈ പേജ് സന്ദർശിക്കണം. ഇതിൽ ലോഞ്ച് ആനുകൂല്യങ്ങൾ > ലോഞ്ച് ആക്‌സസ് വൗച്ചർ എന്ന ഭാ​ഗത്ത് വൗച്ചറുകൾ ലഭിക്കും. ത്രൈമാസത്തിൽ ചെലവാക്കൽ മാനദണ്ഡം പാലിക്കുന്നവർക്ക് 2 കോംപ്ലിമെന്ററി ലോഞ്ച് ആക്‌സസ് വൗച്ചറുകൾ ലഭിക്കും.

മില്ലേനിയ കാർഡ് ഉടമകൾക്ക് മില്ലേനിയ മൈൽസ്റ്റോൺ പേജിനുള്ള ലിങ്ക് എസ്എംഎസ് വഴി ലഭിക്കും. ഇതിൽ ലോഞ്ച് ആക്‌സസ് വൗച്ചർ തിരഞ്ഞെടുക്കാം. ഒരു കോംപ്ലിമെന്ററി ലോഞ്ച് ആക്‌സസ് വൗച്ചറാണ് ത്രൈമാസത്തിൽ ലഭിക്കുക.

എസ്ബിഐ ക്രെഡിറ്റ് കാർഡ്

2024 ജനുവരി ഒന്ന് മുതൽ പേടിഎം എസ്ബിഐ ക്രെഡിറ്റ് കാർഡിലെ വാടക അടയ്ക്കുന്ന ഇടപാടുകൾക്ക് ലഭിക്കുന്ന ക്യാഷ്ബാക്ക് സൗകര്യം കമ്പനി അവസാനിപ്പിച്ചിട്ടുണ്ട്. 2023 നവംബർ 1 മുതൽ സിംപ്ലിക്ലിക്ക്,സിംപ്ലിക്ലിക്ക് അഡ്വാന്റേജ് എസ്ബിഐ കാർഡ് ഉപയോ​ഗിച്ച് ഈസിഡൈനർ വഴിയുള്ള ഓൺലൈൻ വാങ്ങലുകൾക്ക് ലഭിക്കുന്ന റിവാർഡ് പോയിന്റ് 10X ൽ നിന്ന് 5X റിവാർഡ് പോയിന്റുകളായി കുറച്ചു.

അപ്പോളോ 24x7, ബുക്ക്മൈഷോ, ക്ലിയർട്രിപ്പ്, ഡോമിനോസ്, മിന്ത്ര തുടങ്ങിയവയിലെ ഓൺലൈൻ ചെലവാക്കലുകൾക്ക് തുടർന്നു 10X റിവാർഡ് പോയിന്റുകൾ ലഭിക്കും.

ആക്സിസ് ബാങ്ക് ക്രെഡിറ്റ് കാർഡ്

ആക്സിസ് ബാങ്കും ക്രെഡിറ്റ് കാർഡ് ഉടമകൾക്കായി ചില സുപ്രധാന മാറ്റങ്ങൾ വരുത്തിയിട്ടുണ്ട്. ആക്‌സിസ് ബാങ്ക് മാഗ്നസ് ക്രെഡിറ്റ് കാർഡ് ആനുകൂല്യങ്ങളും വാർഷിക ഫീസും ജോയിനിം​ഗ് ബെനിഫിറ്റും ബാങ്ക് പരിഷ്‌ക്കരിച്ചു. ആക്‌സിസ് ബാങ്ക് റിസർവ് ക്രെഡിറ്റ് കാർഡിന്റെ നിബന്ധനകളും വ്യവസ്ഥകളും ബാങ്ക് പരിഷ്‌കരിച്ചിട്ടുണ്ട്.

2023 സെപ്റ്റംബർ 1 മുതൽ ആക്സിസ് ബാങ്ക് മാ​ഗ്നസ് ക്രെഡിറ്റ് കാർഡിലെ തിരഞ്ഞെടുത്ത ഇടപാടുകൾ എഡ്ജി റിവാർഡുകൾക്കോ ​​വാർഷിക ഫീസ് ഇളവുകൾക്കോ ​​വേണ്ടി പരിഗണിക്കില്ല. വിവിധ യൂട്ടിലിറ്റി ഇടപാടുകളും സർക്കാർ സ്ഥാപനങ്ങളിൽ നടത്തുന്ന ഇടപാടുകളും ഉൾപ്പെടും. ഒരു ലക്ഷം രൂപയുടെ പ്രതിമാസ ചെലവുകൾക്ക് 25,000 എഡ്ജി റിവാർഡ് പോയിന്റുകൾ നൽകുന്നത് 2023 സെപ്റ്റംബർ 1 മുതൽ ബാങ്ക് അവസാനിപ്പിച്ചു.

ഐസിഐസിഐ ബാങ്ക് ക്രെഡിറ്റ് കാർഡ്

21 ക്രെഡിറ്റ് കാർഡുകൾക്കുള്ള എയർപോർട്ട് ലോഞ്ച് ആക്‌സസിലും മറ്റ് പല കാർഡുകളുടെയും റിവാർഡ് പോയിന്റ് നിയമങ്ങളിലും കാര്യമായ മാറ്റങ്ങളാണ് ഐസിഐസിഐ ബാങ്ക് പ്രഖ്യാപിച്ചത്. ഐസിഐസിഐ ബാങ്ക് ക്രെഡിറ്റ് കാർഡ് ഉടമകൾക്ക് ലോഞ്ച് ആക്സസ് ലഭിക്കാൻ മുൻ കലണ്ടർ പാദത്തിൽ 35,000 രൂപ ചെലവഴിക്കണം.

ഐസിഐസിഐ ബാങ്ക് കോറൽ ക്രെഡിറ്റ് കാർഡോ ഐസിഐസിഐ ബാങ്ക് എക്‌സ്‌പ്രഷൻസ് ക്രെഡിറ്റ് കാർഡോ ആണ് ഉപയോഗിക്കുന്നതെങ്കിൽ ഒരു പാദത്തിൽ കുറഞ്ഞത് 5,000 രൂപ ചെലവാക്കണം. ഏപ്രിൽ 1 മുതൽ ഇത് നിലവിൽ വരും.

വാടക പേയ്‌മെന്റുകൾക്കും ഇ-വാലറ്റ് ലോഡ് ചെയ്യുന്നതിനും ഫെബ്രുവരി ഒന്ന് മുതൽ റിവാർഡ് പോയിന്റുകൾ ലഭിക്കില്ല. ആമസോൺ പേ ഐസിഐസിഐ ബാങ്ക് ക്രെഡിറ്റ് കാർഡിന് മാത്രമാണ് ഇളവ്.