10 ലക്ഷം രൂപ 5-7 വർഷത്തേക്ക് റിസ്കില്ലാതെ നിക്ഷേപിക്കണം; സ്ഥിര നിക്ഷേപമല്ലാതെ മറ്റു സാധ്യതകൾ എന്തെല്ലാം

റിസ്കെടുക്കാതെ നിക്ഷേപിക്കാൻ ആ​ഗ്രഹിക്കുന്നവരാണെങ്കിൽ സ്ഥിര നിക്ഷേപങ്ങളെയാണ് പൊതുവെ തിരഞ്ഞെടുക്കുന്നത്. ഡെബ്റ്റ് നിക്ഷേപങ്ങളിൽ ഒരു മാർ​ഗം മാത്രമാണ് സ്ഥിര നിക്ഷേപം. കയ്യിലുള്ള പണം റിസ്കില്ലാതെ നിക്ഷേപിക്കാൻ നിരവധി ഡെബ്റ്റ് നിക്ഷേപ ഓപ്ഷനുകൾ ഉണ്ട്. 5-7 വർഷം എന്ന ദീർ​ഘകാല കാലയളവിലേക്ക് 10 ലക്ഷം രൂപ നിക്ഷേപിക്കാൻ ഏതൊക്കെ നിക്ഷേപങ്ങൾ ഉപയോ​ഗിക്കാമെന്ന് നോക്കാം.

ഡെബ്റ്റ് നിക്ഷേപത്തിൽ ശ്രദ്ധിക്കാൻ

പലിശ നിരക്കിലെ ചാഞ്ചാട്ടമാണ് ഡെബ്റ്റ് നിക്ഷേപങ്ങളിൽ ശ്രദ്ധിക്കാനുള്ളത്. ദീർഘകാലടിസ്ഥാനത്തിൽ പലിശ നിരക്ക് സാഹചര്യം കണക്കാക്കാൻ സാധിക്കാത്തതിനാൽ ഡെബ്റ്റ് നിക്ഷേപത്തിൽ പലിശ നിരക്ക് വലിയ പങ്ക് വഹിക്കുന്നുണ്ടെന്ന് മനസ്സിലാക്കണം. ബാങ്ക് സ്ഥിര നിക്ഷേപങ്ങളുടെ പലിശനിരക്കിൽ ഈയടുത്ത കാലത്തുണ്ടായ മാറ്റങ്ങൾ ഡെബ്റ്റ് നിക്ഷേപങ്ങളുടെ പലിശ നിരക്ക് ചലനങ്ങളുടെ സൂചനയാണ്. 2022 മെയ് മുതൽ ബാങ്കുകൾ സ്ഥിര നിക്ഷേപങ്ങളുടെ പലിശ നിരക്ക് ഗണ്യമായി വർധിപ്പിച്ചിട്ടുണ്ട്.

പണപ്പെരുപ്പം നിയന്ത്രിക്കുന്നതിനായി റിസർവ് ബാങ്ക് ഓഫ് ഇന്ത്യ റിപ്പോ നിരക്കും മറ്റ് പ്രധാന നയ നിരക്കുകളും ഉയർത്തിയതിന് ശേഷമാണ് നിക്ഷേപ പലിശ ഉയർന്നത്. പണപ്പെരുപ്പം ആർബിഐയുടെ പ്രതീക്ഷയ്ക്ക് ഉള്ളിൽ നിന്നാൽ റിപ്പോ നിരക്ക് കുറയ്ക്കാൻ തുടങ്ങും. അതോടെ പലിശ നിരക്കും ഇടിയും. ഹ്രസ്വകാല പലിശനിരക്കിന്റെ ചലനം മനസ്സിലാക്കാൻ കഴിയുമെങ്കിലും ദീർഘകാലാടിസ്ഥാനത്തിൽ പലിശ നിരക്കുകളുടെ ചലനം പ്രവചിക്കാൻ പ്രയാസമാണ്. നിക്ഷേപിക്കുന്നതിന് മുൻപ് ഇക്കാര്യം ശ്രദ്ധിക്കേണ്ടതുണ്ട്.

എവിടെയൊക്കെ നിക്ഷേപിക്കാം

റിസ്കെടുക്കാതെ നിക്ഷേപിക്കുന്നൊരാൾക്ക് 5-7 വർഷത്തേക്ക് ഉയർന്ന വരുമാനം നേടുന്നതിന് ഡെബ്റ്റ് നിക്ഷേപങ്ങൾ തിരഞ്ഞെടുക്കാം. ഇപിഎഫ് വരിക്കാനാണെങ്കിൽ വളണ്ടറി പ്രൊവിഡന്റ് ഫണ്ട് വഴി 2.5 ലക്ഷം രൂപ വരെ നിക്ഷേപിക്കാൻ സാധിക്കും. ഇത് നികുതി രഹിത പലിശ നൽകുന്ന പദ്ധതിയാണ്.

8.15 ശതമാനം പലിശ വിപിഎഫ് നിക്ഷേപത്തിന് ലഭിക്കും. മറ്റൊരു നിക്ഷേപം പിപിഎഫ് അക്കൗണ്ടാണ്. വർഷത്തിൽ 1.50 ലക്ഷം രൂപ പിപിഎഫിലും നിക്ഷേപിക്കാം. 7.15 ശതമാനം പലിശ ലഭിക്കും. 5-7 വർഷത്തിനുള്ളിൽ പലിശ ആവശ്യമുള്ളവരാണെങ്കിൽ പിപിഎഫ് കാലാവധി 15 വർഷമാണെന്ന് ഓർക്കണം.

എൻപിഎസ്

5-7 വർഷത്തിനുള്ളിൽ 60 വയസ് തികയുന്നവരാണെങ്കിൽ നാഷണൽ പെൻഷൻ സിസ്റ്റത്തിലെ ഡെറ്റ് പോർട്ട്ഫോളിയോ ഉപയോഗിക്കാം. 60 വയസിന് ശേഷം സ്ഥിര വരുമാനവും സമ്പാദ്യവും ഉണ്ടാക്കാൻ സാധിക്കും. 5-7 വർഷത്തെ കാലാവധിയുള്ള ഫിക്സഡ് കൂപ്പൺ സെക്യൂരിറ്റികളിൽ നിക്ഷേപിക്കാം. ഇവ മെച്യൂരിറ്റി വരെ കൈവശം വെച്ചാൽ അസ്ഥിരമല്ലാത്ത ആനുകൂല്യങ്ങൾ ലഭിക്കും.

സ്വർണത്തിൽ നിക്ഷേപിക്കാം

സോവറിൻ ഗോൾഡ് ബോണ്ടുകളിൽ പണം നിക്ഷേപിക്കാം. 8 വർഷ കാലാവധിയുള്ള നിക്ഷേപം മെച്യൂരിറ്റി വരെ തുടർന്നാൽ നികുതി രഹിതമായി പിൻവലിക്കാം. 8 വർഷത്തെ കാലയളവിൽ ലഭിക്കുന്ന പലിശയ്ക്ക് നികുതി നൽകണം. 5-ാം വർഷത്തിൽ സോവറിൻ ​ഗോൾഡ് ബോണ്ട് പിൻവലിക്കാനും സാധിക്കും. നിലവിൽ സോവറിൻ ​ഗോൾഡ് ബോണ്ട് രണ്ടാം സീരിസ് വാങ്ങാൻ സാധിക്കും.

മാസ വരുമാനത്തിന്

പ്രതിമാസ വരുമാനം ആവശ്യമുള്ളവരാണെങ്കിൽ പോസ്റ്റ് ഓഫീസിലെ പ്രതിമാസ വരുമാന പദ്ധതി ഉപയോ​ഗിക്കാം. 5 വർഷ കാലാവധിയുള്ള പദ്ധതിയാണിത്. ലിക്വിഡിറ്റി പരി​ഗണിക്കുമ്പോൾ ഡെബ്റ്റ് മ്യൂച്വൽ ഫണ്ടുകളും ബാങ്ക് സ്ഥിര നിക്ഷേപങ്ങളും പരി​ഗണിക്കാം. സ്ഥിര വരുമാനം നേടി തരുന്നൊരു നിക്ഷേപമാണ് ആർബിഐ ഫ്ലോട്ടിംഗ് റേറ്റ് ബോണ്ടുകൾ.

ഡെബ്റ്റ് മ്യൂച്വൽ ഫണ്ടുകൾ

ഇൻ‌ഫ്ലേഷൻ ഇൻഡെക്സ്ഡ് ബോണ്ടുകൾ, സ്റ്റേറ്റ് ഡെവലപ്‌മെന്റ് ബോണ്ടുകൾ എന്നിവയും ഡെബ്റ്റ് നിക്ഷേപങ്ങളിൽ വരുന്ന നിക്ഷേപങ്ങലാണ്. ആവശ്യകത അനുസരിച്ച് ഹ്രസ്വകാല, ഇടത്തരം കാലാവധിയുള്ള ഡെബ്റ്റ് മ്യൂച്വൽ ഫണ്ടുകളും ടാർഗെറ്റ് മെച്യുരിറ്റി ഫണ്ടുകളും മറ്റൊരു നല്ല ഓപ്ഷനാണ്.