എല്ലാം എല്ലാവർക്കും ചേരില്ല; ഓരോ പോസ്റ്റ് ഓഫീസ് നിക്ഷേപവും ആർക്കൊക്കെ അനുയോജ്യം

ബാങ്ക് പോലെ തന്നെ ഒരുപാട് നിക്ഷേപങ്ങൾ പോസ്റ്റ് ഓഫീസിലും ലഭിക്കുന്നുണ്ട്. ബാങ്കുകളെക്കാൾ മികച്ച പലിശ നിരക്ക് ലഭിക്കുന്ന നിക്ഷേപങ്ങൾ പോസ്റ്റ് ഓഫീസിന്റേതായിട്ടുണ്ട്. എന്നാൽ പോസ്റ്റ് ഓഫീസ് ആവർത്തന നിക്ഷേപങ്ങൾ മാത്രമാണ് കൂടുതൽ പേരും തിരഞ്ഞെടുക്കുന്നത്. പോസ്റ്റ് ഓഫീസിൽ നിരവധിയായ നിക്ഷേപങ്ങൾ ലഭിക്കും. ദീർഘ കാലത്തേക്കും, ഹ്രസ്വകാലത്തേക്കും നികുതി ആനുകൂല്യങ്ങളുമുള്ളതുമായി വ്യത്യസ്ത നിക്ഷേപങ്ങൾ പോസ്റ്റ് ഓഫീസിലുണ്ട്. പോസ്റ്റ് ഓഫീസ് നിക്ഷേപങ്ങളുടെ ​ഗുണങ്ങളും ദോഷങ്ങളും എന്തൊക്കെയാണെന്ന് പരിശോധിച്ച് അനുയോജ്യമായവ കണ്ടെത്താം.

​ഗുണങ്ങൾ

പോസ്റ്റ് ഓഫീസ് നിക്ഷേപങ്ങളുടെ പ്രധാന ​ഗുണം ഇതിന്റെ സുരക്ഷിതത്വമാണ്. കേന്ദ്രസർക്കാർ സ്ഥാപനമായതിനാൽ നിക്ഷേപിക്കുന്ന തുകയ്ക്കും പലിശയ്ക്കും പൂർണ ​ഗ്യാരണ്ടിയുണ്ട്. നിക്ഷേപം ആരംഭിക്കാനുള്ള നടപടിക്രമങ്ങൾ പോസ്റ്റ് ഓഫീസിൽ വളരെ എളുപ്പത്തിൽ പൂർത്തിയാക്കാം. ഇതിനാൽ ​ഗ്രാമീണ മേഖകളിൽ ഉള്ളവർക്ക് എളുപ്പത്തിൽ പദ്ധതിയിൽ ചേരാൻ സാധിക്കുന്നു. ദീർഘകാലത്തേക്ക് നിക്ഷേപങ്ങൾ നടത്താനുള്ള സൗകര്യങ്ങൾ പോസ്റ്റ് ഓഫീസിലുണ്ട്. 1 വർഷം മുതൽ 15 വർഷം വരെയുള്ള കാലാവധിയിലാണ് വിവിധ നിക്ഷേപങ്ങൾ.

4 ശതമാനം മുതൽ 7.6 ശതമാനം വരെ പലിശ നിരക്കാണ് പോസ്റ്റ് ഓഫീസ് നിക്ഷേപങ്ങൾക്ക് ലഭിക്കുന്നത്. ഓരോ മൂന്ന് മാസത്തിലും (സാമ്പത്തിക വർഷത്തിന്റെ പാദത്തിലും) പലിശ നിരക്ക് പുനഃപരിശോധിക്കും. ഇതിനാൽ കാലാനുസൃതമായ മാറ്റം പലിശ നിരക്കിലുണ്ടാവും. ഇതോടൊപ്പം എടുത്തു പറയേണ്ടതാണ് ആദായ നികുതിയിളവ്.

നാഷണൽ സേവിം​ഗ്സ് സർട്ടിഫിക്കറ്റ്, സുകന്യ സമൃദ്ധി യോജന, പബ്ലിക്ക് പ്രൊവിഡന്റ് ഫണ്ട്, അഞ്ച് വർഷ ടൈം ഡെപ്പോസിറ്റ്, സീനിയർ സിറ്റിസൺ സേവിം​ഗ്സ് സ്കീം എന്നീ നിക്ഷേപങ്ങൾക്ക് ആദായ നികുതി നിയമം സെക്ഷൻ 80സി പ്രകാരം ആദായ നികുതിയിളവും ലഭിക്കും.

പരിമിതികൾ

പോസ്റ്റ് ഓഫീസ് സമ്പാദ്യ പദ്ധതികളെ പറ്റി അറിവില്ലാത്തത് തന്നെയാണ് പ്രധാന പോരായ്മ. ആവര്‍ത്തന നിക്ഷേപത്തിനായി ഏജന്റുമാർ ക്യാൻവാസിം​ഗ് നടത്തുന്നുണ്ട്. ഇതിനാൽ പല വീടുകളിലും ആവർത്തന നിക്ഷേപത്തെ പറ്റി ധാരണയുണ്ട്. മിക്ക കുടുംബങ്ങളും സാമ്പാദ്യമായി ആവർത്തന നിക്ഷേപത്തെ കാണുന്നുമുണ്ട്. കുറഞ്ഞ റിസ്ക് എന്നതാണ് പോസ്റ്റ് ഓഫീസ് നിക്ഷേപങ്ങളുടെ ​ഗുണം. റിസ്ക് കൂടുമ്പോൾ ആദായം കുറയും. ഇത് നിക്ഷേപകരെ പിന്നോട്ടടിപ്പിക്കുന്ന കാരണങ്ങളിലൊന്നാണ്. സുരക്ഷിതത്വത്തിന് അമിത പ്രാധാന്യം നല്‍കുന്നവര്‍ക്ക് പോസ്റ്റ് ഓഫീസ് നിക്ഷേപങ്ങൾ തിരഞ്ഞെടുക്കാം.

മറ്റൊരു പോരായ്മ പ്രൊഫഷണലിസമാണ്. പോസ്റ്റ് ഓഫീസിന്റെ പ്രധാന ജോലി തപാൽ ഇടപടാകുകളാണ്. ഇതിനാൽ ബാങ്കിം​ഗ് സേവനങ്ങൾക്ക് പൊതുവെ സമയമെടുക്കും. ഇത് നിക്ഷേപകരെ പിന്നോട്ടടിപ്പിക്കുന്നു. മിക്ക പോസ്റ്റ് ഓഫീസ് നിക്ഷേപങ്ങളും ചേരുന്ന ബ്രാഞ്ചുമായി ബന്ധിപ്പിച്ചിരിക്കുന്നവയാണ്. ഉദാഹരണത്തിന് ഇടുക്കിയിൽ നിന്ന് ചേർന്ന ഒരു പോസ്റ്റ് ഓഫീസ് നിക്ഷേപം കാസർകോട് നിന്ന് ഉപയോ​ഗിക്കാൻ സാധിക്കില്ല. ഇതിന് പകരം ട്രാൻസ്ഫർ സൗകര്യമാണ് പോസ്റ്റ് ഓഫീസിൽ നിലവിലുള്ളത്.

 പോസ്റ്റ് ഓഫീസ് സമ്പാദ്യ പദ്ധതികൾ

പോസ്റ്റ് ഓഫീസ് അനുവദിക്കുന്ന സമ്പാദ്യ പദ്ധതികളും അവയുടെ പലിശ നിരക്ക്, കാലാവധി, എന്നി ക്രമത്തിൽ,

>> സുകന്യ സമൃദ്ധി യോജന- 7.6 ശതമാനം- നിക്ഷേപകയ്ക്ക് 21 വയസ് പൂർത്തിയാകുന്നത് വരെ

>> സീനിയര്‍ സിറ്റസണ്‍ സ്‌കീം- 7.4 ശതമാനം- 5 വർഷം

>> പബ്ലിക്ക് പ്രൊവിഡന്റ് ഫണ്ട്- 7.1 ശതമാനം- 15 വർഷം

>> കിസാന്‍ വികാസ് പത്ര- 6.9 ശതമാനം-

>> നാഷണല്‍ സേവിംഗ്‌സ് സര്‍ട്ടിഫിക്കറ്റ് - 6.8 ശതമാനം- 5 വർഷം

>> മന്ത്‌ലി ഇന്‍കം അക്കൗണ്ട്- 6.6 ശതമാനം- 5 വർഷം

>> ടേം ഡെപ്പോസിറ്റ്- 6.7 ശതമാനം- 5 വര്‍ഷം

>> ആവര്‍ത്തന നിക്ഷേപം- 5.8 ശതമാനം - 5 വർഷം

>> ടേം ഡെപ്പോസിറ്റ്- 5.5 ശതമാനം- 1,2,3 വർഷം

>> സേവിഗംസ് ബാങ്ക് ഡെപ്പോസിറ്റ്- 4 ശതമാനം