ലോട്ടറി അടിച്ചാൽ എത്ര ശതമാനം നികുതി; ഇക്കാര്യങ്ങൾ ശ്രദ്ധിച്ചില്ലെങ്കിൽ ലോട്ടറി തിരിച്ചടിക്കും!

ലോട്ടറിയിൽ ഭാ​ഗ്യ പരീക്ഷണം നടത്തുന്നവർ സംസ്ഥാനത്ത് ഒരുപാട് പേരുണ്ട്. ചെറുതും വലുതുമായ സമ്മാനങ്ങൾ ഭാ​ഗ്യകുറിയിൽ നിന്ന് ലഭിച്ചവരുണ്ടാകും. ലോട്ടറി എടുക്കുക എന്നത് എളുപ്പമുള്ള കാര്യമാണ്. ലോട്ടറി സ്റ്റാളിൽ നിന്ന് വില നൽകി വാങ്ങുന്ന ലോട്ടറി അടിച്ചാൽ എന്ത് ചെയ്യും. 100, 500 രൂപയൊക്കെ സമ്മാനം ലഭിച്ചവരാണെങ്കിൽ ലോട്ടറിയെടുത്ത കടയിൽ നിന്ന് തന്നെ പണമാക്കി ലോട്ടറി വാങ്ങിയാകും ശീലം.

അൽപം വലിയ തുക ലോട്ടറിയടിച്ചാൽ പിന്നെ ആശങ്കയായി. എങ്ങനെ സമ്മാനം വാങ്ങണം, എവിടെ പോകണം എന്നീ കാര്യങ്ങൾ പലർക്കും അറിയാത്ത കാര്യമാണ്. ഇതിനോടൊപ്പം എത്ര ശതമാനം നികുതി അടയ്ക്കണം, വർഷത്തിൽ നികുതി അടയ്ക്കേണ്ടതുണ്ടോ എന്നിങ്ങനെയുള്ള ചിന്തകളുണ്ട്. ലോട്ടറി അടിച്ചാൽ എത്ര തുക നികുതി നൽകണം എന്ന കാര്യം നോക്കാം.

 

ലോട്ടറി നികുതി

1961 ലെ ആദായ നികുതി നിയമം സെക്ഷന്‍ 194ബി പ്രകാരം ലോട്ടറിയിൽ നിന്നുള്ള സമ്മാനങ്ങൾക്ക് നികുതി ഈടാക്കിയ ശേഷം മാത്രമെ പണം വിതരണം ചെയ്യാൻ സാധിക്കുകയുള്ളൂ. 10,000 രൂപയ്ക്ക് മുകളിൽ സമ്മാനം വാങ്ങുമ്പോള്‍ ലോട്ടറി വകുപ്പ് 30 ശതമാനം സ്രോതസിൽ നിന്നുള്ള നികുതി (ടിഡിഎസ്) ഈടാക്കി മാത്രമെ പണം അനുവദിക്കുകയുള്ളൂ.

സമ്മാനര്‍ഹരുടെ വരുമാനം നികുതി പരിധിയില്‍ വരില്ലെങ്കിലും ടിഡിഎസ് ഈടാക്കും. ലോട്ടറി സമ്മാനതുകയിൽ നിന്ന് നികുതി കിഴിച്ചാണ് സമ്മാനർഹന് ലഭിക്കുക. കയ്യിൽ നിന്ന് പണമെടുത്ത് നികുതി അടയ്ക്കേണ്ടതില്ല.

ലോട്ടറിക്ക് മാത്രമല്ല ഈ നികുതി ബാധകമാകുന്നത്. ക്രോസ്വേഡ് പസില്‍, കാര്‍ഡ് ഗെയിം, മറ്റ് ഗെയിമുകള്‍ എന്നിവയില്‍ നിന്നുള്ള സമ്മാനങ്ങൾക്കും ഇതേ നികുതി ബാധകമാണ്. ടെലിവിഷനുകളിലെ പരിപാടികളിൽ നിന്ന് ലഭിക്കുന്ന സമ്മാനത്തിനും ഇതേരീതിയിൽ നികുതി ഈടാക്കും.

സമ്മാനം 10,000 രൂപ കടന്നാല്‍ സമ്മാനം നൽകുന്നവരാണ് 30 ശതമാനം ടിഡിഎസ് ഈടാക്കേണ്ടത്. സമ്മാനം പണമല്ലാതെ ലഭിച്ചാൽ സമ്മാനത്തിന്റെ മൂല്യം കണക്കാക്കി നികുതി അടയ്ക്കേണ്ടി വരും. ഇത്തരത്തില്‍ ഈടാക്കുന്ന തുക ആദായ നികുതി വകുപ്പിലേക്ക് അടയ്ക്കും.

സർചാർജ്

സമ്മാനത്തുക 10,000 രൂപ കടന്നാൽ 30 ശതമാനം നികുതിയാണ് ലോട്ടറി വകുപ്പ് സമ്മാനർ​ഹരിൽ നിന്ന് ഈടാക്കുന്നത്. എന്നാൽ സമ്മാനത്തുക 50 ലക്ഷത്തില്‍ മുകളിൽ ലഭിച്ച പാന്‍കാര്‍ഡ് ഉടമകളായ സമ്മാനാര്‍ഹര്‍ സര്‍ചാര്‍ജും സെസും നല്‍കേണ്ടതുണ്ട്. ഇത് ആദായ നികുതി വകുപ്പിനാണ് നൽകേണ്ടത്.

ഭാഗ്യകുറി മാത്രമല്ല, 50 ലക്ഷത്തില്‍ കൂടുതൽ തുക സമ്മാനമായി ലഭിക്കുമ്പോൾ ഏതൊരാളും സർചാ‍ർജും സെസും അടയ്ക്കേണ്ടതാണെന്ന് ആദായ നികുതി ചട്ടങ്ങളിലുണ്ട്. നികുതി സ്ലാബ് അനുസരിച്ച് സെസ്സ ഈടാക്കും. സമ്മാനര്‍ഹരുടെ വരുമാനം 20 ശതമാനം സ്ലാബ് റേറ്റില്‍ വരികയാണെങ്കില്‍ 1.2 ശതമാനം സെസ്സ് നല്‍കേണ്ടി വരും.

നികുതിയില്ലാതെ എങ്ങനെ സമ്മാനത്തുക വാങ്ങാം

5,000 രൂപയുടെ സമ്മാനം അടിച്ചവരാണെങ്കിൽ സംസ്ഥാനത്തെ ഏത് ലോട്ടറി സ്റ്റാളുകളിൽ നിന്നും ടിക്കറ്റ് നൽകി പണം മാറ്റാവുന്നതാണ്. 5,000 രൂപയ്ക്ക് മുകളിൽ 1 ലക്ഷം രൂപ വരെയുള്ള സമ്മാന ടിക്കറ്റുകൾ ജില്ലാ ലോട്ടറി ഓഫീസുകളിൽ നിന്ന് മാറിയെടുക്കാം. 1 ലക്ഷത്തിൽ കൂടുതൽ സമ്മാനത്തുകയുള്ള ടിക്കറ്റുകൾ കേരള ലോട്ടറി ഡയറക്ടറേറ്റിൽ നിന്നാണ് മാറിയെടുക്കേണ്ടത്.

സമ്മാനാർഹമായ ടിക്കറ്റുകൾ ദേശസാൽകൃത ബാങ്കുകളിലോ ഷെഡ്യൂൾഡ് ബാങ്കിലോ, സംസ്ഥാന, ജില്ലാ സഹകരണ ബാങ്കുകളിലോ സമർപ്പിക്കാവുന്നതാണ്. സമ്മാന തുക ലഭിക്കുന്നതിനായി നറുക്കെടുപ്പ് ദിവസം മുതൽ 30 ദിവസത്തിനുള്ളിൽ ഒറിജിനൽ ടിക്കറ്റ് ബന്ധപ്പെട്ട് രേഖകൾ സഹിതം ഹാജരാക്കണം. 30 ദിവസത്തിനുള്ളിൽ ടിക്കറ്റ് ഹാജരാക്കുവാൻ സാധിച്ചില്ലെങ്കിൽ കാലതാമസത്തിനുള്ള കാരണം വ്യക്തമാക്കുന്ന വിശദീകരണം ലോട്ടറി വകുപ്പിൽ സമർപ്പിക്കേണ്ടി വരും.

ഭാ​ഗ്യകുറി വകുപ്പിന്റെ ക്ലാസ്

ഭാഗ്യക്കുറി സമ്മാനാർഹർക്ക് ക്ലാസുകൾ സംഘടിപ്പിക്കാൻ ലോട്ടറി വകുപ്പ് ഒരുങ്ങുകയാണ്. നികുതിയെ സംബന്ധിച്ചും പരിശീലന പരിപാടിയിൽ അവബോധമുണ്ടാക്കും. ധന മാനേജ്മെന്റിന് കൂടി സഹായകമാവുന്ന പരിശീലന ക്ലാസ് ഓണം ബമ്പർ നറുക്കെടുപ്പിന് ശേഷം നടത്തും.

ചിത്രം കടപ്പാട്- DIRECTORATE OF STATE LOTTERIES