5 വർഷം നിക്ഷേപിച്ചാൽ 4,50,000 രൂപ പലിശ; സുരക്ഷിതമായ രീതിയിൽ പണം സമ്പാദിക്കാൻ ഒരു പദ്ധതി

പണം നിക്ഷേപിക്കുമ്പോൾ, സുരക്ഷിതത്വവും നിക്ഷേപത്തിന് നല്ല വരുമാനവും ലഭിക്കുന്ന പദ്ധതികൾ നമ്മൾ തിരഞ്ഞെടുക്കേണ്ടതുണ്ട്. രാജ്യത്തുള്ള എല്ലാ വിഭാഗങ്ങൾക്കുമായി സർക്കാർ ഒരുപാട് പദ്ധതികൾ നടത്തുന്നു. അങ്ങനെയുള്ള പദ്ധതികളിലൊന്നാണ് പോസ്റ്റ്‌ ഓഫീസ് നടത്തുന്ന ടൈം ഡെപ്പോസിറ്റ്. പോസ്റ്റ്‌ ഓഫീസ് നടത്തുന്നതായത് കൊണ്ട് തന്നെ നിക്ഷേപകർക്ക് കൂടുതൽ സുരക്ഷിതത്വവും വിശ്വാസവും ഇങ്ങനെയുള്ള പദ്ധതികളോടുണ്ട്. പോസ്റ്റ് ഓഫീസിന്റെ സ്ഥിര നിക്ഷേപം അഥവ ടൈം ഡെപ്പോസിറ്റ് പദ്ധതി പ്രകാരം, നിങ്ങൾ 5 വർഷത്തേക്ക് 10 ലക്ഷം രൂപ ഒരുമിച്ച് നിക്ഷേപിക്കുകയാണെങ്കിൽ, ഏകദേശം 4,50,000 രൂപ വരെ പലിശ ഇനത്തിൽ മാത്രം നിങ്ങൾക്ക് ലഭിക്കും.

5 വർഷത്തേക്ക് പണം നിക്ഷേപിക്കുന്ന ഈ പദ്ധതിക്ക് 7.50 ശതമാനം പലിശ പോസ്റ്റ്‌ ഓഫീസ് ഉറപ്പ് നൽകുന്നു. അതായത് ഒരു വർഷത്തേക്ക് 6.9 ശതമാനം എന്ന നിരക്കിലും 2,3 വർഷത്തേക്കാണെങ്കിൽ യഥാക്രമം 7 ശതമാനം, 7.1 ശതമാനം എന്ന നിരക്കിലും പലിശ ലഭിക്കുന്നു. അപ്പോൾ ഒരു നിക്ഷേപകനെ സംബന്ധിച്ചിടത്തോളം, ഏറ്റവും നല്ല ഒരു നിക്ഷേപമാണ് പോസ്റ്റ്‌ ഓഫീസ് ടൈം ഡെപ്പോസിറ്റ്. കൂടാതെ, വളരെ മികച്ച സുരക്ഷിതത്വവും ടൈം ഡെപ്പോസിറ്റ് പദ്ധതിയെ വ്യത്യസ്തമാക്കുന്നു.

പോസ്റ്റ്‌ ഓഫീസ് ടൈം ഡെപ്പോസിറ്റ് പ്രകാരം, ഒറ്റയ്ക്കോ അല്ലെങ്കിൽ മൂന്ന് പേർക്ക് ഒരുമിച്ചോ അക്കൗണ്ട് തുറക്കാൻ സാധിക്കുന്നതാണ്. അതുകൊണ്ട് തന്നെ, ഏറ്റവും വലിയ തുക നിക്ഷേപിക്കാനുള്ള അവസരവും പോസ്റ്റ്‌ ഓഫീസ് ഈ പദ്ധതിയിലൂടെ നമുക്ക് വാഗ്ദാനം നൽകുന്നു. ഈ സ്കീമിലെ ഏറ്റവും കുറഞ്ഞ നിക്ഷേപ തുക ആയിരം രൂപയാണ്. നൂറ് രൂപയുടെ ഗുണിതങ്ങളെ മാത്രമെ നിക്ഷേപത്തിനായി പരിഗണിക്കുകയുള്ളൂ. നിക്ഷേപിക്കാവുന്ന പരമാവധി തുകയ്ക്ക് പരിധിയില്ല.

മാസം 9,250 രൂപ പെൻഷനായി വേണോ? പോസ്റ്റ് ഓഫീസിന്റെ ഈ പദ്ധതിയിൽ അംഗമാകൂ

വളരെ മികച്ച ഒരു പദ്ധതിയാണെങ്കിൽ പോലും ചില കാര്യങ്ങൾ നമ്മൾ ശ്രദ്ധിക്കേണ്ടതുണ്ട്. സർക്കാർ പദ്ധതിയായ പോസ്റ്റ്‌ ഓഫീസ് ടൈം ഡെപ്പോസിറ്റിൽ, മുഴുവൻ പണവും ഒരുമിച്ച് നിക്ഷേപിക്കണം. ഈ പദ്ധതിക്ക് കീഴിൽ, ആദായനികുതിയുടെ സെക്ഷൻ 80സി പ്രകാരം 5 വർഷത്തേക്ക് പ്രതിവർഷം 1.5 ലക്ഷം രൂപ വരെ കിഴിവ് നൽകുന്നു. ഒരുതവണ നിങ്ങൾ ഈ പദ്ധതിയിൽ പണം നിക്ഷേപിച്ചാൽ 6 മാസത്തിന് മുമ്പ് പണം പിൻവലിക്കാൻ സാധിക്കുന്നതല്ല.