എസ്ഐപി വഴി കോടികൾ സമ്പാദിക്കുന്നത് സിംപിളല്ല; നിക്ഷേപത്തിൽ അധികം സമ്പാദിക്കാൻ ചില പൊടിക്കൈകൾ

സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ വഴിയുള്ള മ്യൂച്വൽ ഫണ്ടിലേക്കുള്ള നിക്ഷേപം ഇന്ന് ജനപ്രീയ മാർ​ഗമായി മാറിയിട്ടുണ്ട്. ചെറിയ തുകയിൽ പോലും തുടങ്ങാൻ സാധിക്കുന്നതും അച്ചടക്കത്തോടെയുള്ള നിക്ഷേപ ശീലം വളർത്തിയെടുക്കുന്നതും കോമ്പൗണ്ടിം​ഗിന്റെ പ്രയോജനവും നിക്ഷേപ രീതിയോടുള്ള താൽപര്യത്തിന് കാരണമാകുന്നുണ്ട്. ആരംഭിക്കാനും നിർത്താനും പ്രത്യേക നിബന്ധനകളില്ലെന്നതും എസ്ഐപി രീതിയുടെ നേട്ടമാണ്.

വിപണി ഉയരുമ്പോൾ എസ്ഐപി നിക്ഷേപത്തിന് പ്രധാന്യമുണ്ടെങ്കിലും വിപണിയിലെ തിരുത്തൽ ഘട്ടത്തിൽ പലരും നിക്ഷേപത്തോട് മുഖം തിരിക്കുന്നതും കാണാം. ദീർഘകാല നിക്ഷേപമെന്ന നിലയിൽ ആരംഭിക്കുന്നവർക്ക് എസ്‌ഐ‌പി വഴി ശരാശരി 12 ശതമാനം റിട്ടേൺ ലഭിക്കുന്നുണ്ട് എന്നത് ഇവിടെ എടുത്ത് കാണേണ്ടതാണ്.

ഒരൊറ്റ മ്യൂച്വൽ ഫണ്ടിൽ നിക്ഷേപിക്കുന്നതിലൂടെ ഉയർന്ന നിലവാരമുള്ള സെക്യൂരിറ്റികൾ അടങ്ങുന്ന വൈവിധ്യമാർന്ന പോർട്ട്‌ഫോളിയോ ലഭിക്കും എന്നതിനാൽ വൈവിധ്യവത്കരണത്തിന്റെ റിസ്ക് നിക്ഷേപത്തിലില്ല. ഉദാഹരണമായി പ്രതിമാസം 500 രൂപ മുതൽ നിക്ഷേപിക്കാൻ സാധിക്കുന്ന നിഫ്റ്റി 50 ഫണ്ടിൽ എസ്ഐപി ചെയ്യുമ്പോൾ ഇന്ത്യയിലെ ഏറ്റവും വലിയതും മികച്ച ട്രാക്ക് റെക്കോർഡുള്ള ഏറ്റവും ലാഭകരമായ 50 കമ്പനികളിലേക്കാണ് എക്സ്പോഷർ ലഭിക്കുന്നത്. മ്യൂച്വൽ ഫണ്ടിൽ എസ്ഐപി വഴി നിക്ഷേപിക്കുന്നവർക്ക് കൂടുതൽ സമ്പാദിക്കാൻ ചില പൊടിക്കൈകൾ നോക്കാം.

നേരത്തെ തുടങ്ങാം

എസ്‌ഐ‌പി നിക്ഷേപം ആരംഭിക്കേണ്ടത് കഴിവതും നേരത്തെയാണ്. നേരത്തെ നിക്ഷേപം ആരംഭിക്കുകയും ദീർഘകാലത്തേക്ക് നിക്ഷേപിക്കാൻ ക്ഷമയുണ്ടെങ്കിൽ 50 വയസാകുമ്പോഴേക്കും വലിയ സമ്പത്ത് ഉണ്ടാക്കിയെടുക്കാനും സാധിക്കും. പ്രതിമാസം 10,000 രൂപ വീതം മ്യൂച്വൽ ഫണ്ടിൽ നിക്ഷേപിക്കുന്നൊരാൾക്ക് 12 ശതമാനം സിഎജിആർ നിരക്കിൽ റിട്ടേൺ ലഭിച്ചാൽ 5 വർഷം, 10 വർഷം, 15 വർഷം, 20 വർഷത്തേക്ക് പണം എത്ര കണ്ട് വളരുമെന്ന് നോക്കാം.

5 വർഷത്തിന്റെ അവസാനത്തോടെ ഈ നിക്ഷേപത്തിൽ നിന്ന് 8 ലക്ഷം രൂപ സമ്പാദിക്കാൻ സാധിക്കും. 10 വർഷം നിക്ഷേപിച്ചാൽ 23 ലക്ഷം രൂപയും 15 വർഷം നിക്ഷേപിച്ചാൽ 50 ലക്ഷവും 20 വർഷം കൊണ്ട് 98 ലക്ഷം രൂപയും സമ്പാദിക്കാം. 20 വർഷകാലത്തോളം വലിയ തുക നിക്ഷേപിക്കണമെങ്കിൽ നേരത്തെ നിക്ഷേപം ആരംഭിക്കേണ്ടതുണ്ട്.

25-ാം വയസിൽ പ്രതിമാസം 10,000 രൂപ നിക്ഷേപിക്കുകയും അടുത്ത 25 വർഷത്തേക്ക് 12 ശതമാനം വാർഷിക റിട്ടേൺ ലഭിക്കുകയും ചെയ്താൽ സമ്പാദ്യം ഒരു കോടി കടക്കും. നിക്ഷേപ കാലയളവിൽ 30 ലക്ഷം രൂപയാണ് നിക്ഷേപിക്കുന്നത്. ഇതിൽ നിന്ന് മൂലധന നേട്ടമടക്കം പ്രതീക്ഷിക്കുന്ന വരുമാനം 1.90 കോടി രൂപ ആയിരിക്കും. 50 വയസാകുമ്പോഴേക്കും കോർപ്പസിൽ ഏകദേശം 2 കോടി രൂപ ഉണ്ടായിരിക്കും.

അച്ചടക്കത്തോടെ നിക്ഷേപം

മുകളിൽ പറഞ്ഞ നേട്ടം എസ്ഐപിയിൽ തുടർച്ചയായി നിക്ഷേപം നടത്തുന്നവർക്കുള്ളതാണ്. അതിനാൽ എസ്ഐപി വഴി നല്ല തുക സമ്പാദിക്കാൻ നിക്ഷേപത്തിൽ അച്ചടക്കം പാലിക്കേണ്ടതുണ്ട്. എന്നാൽ വിപണി താഴുകയും മ്യൂച്വൽ ഫണ്ട് നിക്ഷേപം നഷ്ടമാകുന്ന സമയത്ത് പലരും എസ്ഐപികൾ നിർത്തുന്നത് പതിവാണ്. നിക്ഷേപത്തിൽ കോസ്റ്റ് ആവറേജിം​ഗിന്റെ ​ഗുണം ലഭിക്കാൻ മാർക്കറ്റ് തിരുത്തലുകളുടെ സമയത്തും നിക്ഷേപം തുടരണം. കുറഞ്ഞ മൂല്യത്തിൽ യൂണിറ്റുകൾ സ്വന്തമാക്കുന്നതിലൂടെ നെറ്റ് അസറ്റ് വാല്യു ആവറേജ് ചെയ്യാൻ സാധിക്കും.

നിക്ഷേപ തുക ഉയർത്താം

ശമ്പളം വർധിപ്പിക്കുന്നതിനൊപ്പം വർഷത്തിൽ എസ്ഐപി തുക ഉയർത്തുക എന്നത് സമ്പാദ്യം വളർത്താനുള്ള മാർ​ഗമാണ്. എല്ലാ വർഷവും എസ്ഐപി തുക 10 ശതമാനം വർധിപ്പിക്കുകയാണെങ്കിൽ ലക്ഷ്യത്തിലേക്ക് വേ​ഗത്തിൽ എത്തിച്ചേരാം. പ്രതിമാസം 50,000 രൂപ ശമ്പളമുള്ള വ്യക്തി മാസം 10,000 രൂപയും നിക്ഷേപിക്കുകയും തൊട്ടടുത്ത വർഷം എസ്ഐപി 10 ശതമാനം ഉയർത്തുകയും ചെയ്താൽ തൊട്ടടുത്ത വർഷം മുതൽ 11,000 രൂപ നിക്ഷേപിക്കണം.