മാസം 20,000 രൂപ വരെ വരുമാനം നേടാൻ കിടിലൻ പോസ്റ്റ് ഓഫീസ് പദ്ധതി

വിരമിക്കലിന് ശേഷം സ്ഥിരമായുള്ള വരുമാനത്തിൽ ബുദ്ധിമുട്ടനുഭവിക്കുന്നവരാണ് കൂടുതൽ പേരും. കൃത്യമായ പ്ലാനിങ് ഇല്ലാത്തതാണ് ഇതിന് കാരണം. വിരമിക്കലിന് ശേഷവും നമ്മുടെ ആവശ്യങ്ങൾക്ക് നമ്മൾ തന്നെ പണം കണ്ടെത്തേണ്ടതുണ്ട്. ഇത് മനസ്സിലാക്കി പലരും സേവിങ്സ് സ്കീമുകളെ നേരത്തെ തന്നെ സമീപിക്കുന്നു. അത്തരത്തിലുള്ള, അഥവാ വിരമിക്കലിന് ശേഷം ഒരു സ്ഥിരമായ വരുമാനം എന്ന ആശയത്തിൽ രൂപകൽപ്പന ചെയ്ത സർക്കാർ പിന്തുണയുള്ള ഒരു സേവിങ്സ് പദ്ധതിയാണ് സീനിയർ സിറ്റിസൺ സേവിങ്സ് സ്കീം (SCSS). 60 വയസും അതിനുമുകളിലും പ്രായമുള്ള വ്യക്തികൾക്കായുള്ള ഈ പദ്ധതി, വിരമിക്കലിന് ശേഷം സ്ഥിരമായ വരുമാനം ഉറപ്പാക്കാൻ ആഗ്രഹിക്കുന്ന ഇന്ത്യയിലെ മുതിർന്ന പൗരന്മാർക്ക്, മാന്യമായ ഒരു നിക്ഷേപ ഓപ്ഷനായി വേറിട്ടുനിൽക്കുന്നു.

5 വർഷം കൊണ്ട് സമ്പാദ്യം വർധിപ്പിക്കാം, ഇതാണ് പോസ്റ്റ് ഓഫീസ് പദ്ധതി, നേടാം ബാങ്ക് സ്ഥിര നിക്ഷേപത്തേക്കാൾ പലിശ

എസ്.സി.എസ്.എസ് സ്കീം പ്രകാരം, 8.2% വാർഷിക പലിശ നിരക്കിൽ, കാൽവർഷമായി സംയോജിപ്പിച്ച് പ്രതിമാസം 20,000 രൂപ വരെ വരുമാനം ഉണ്ടാക്കാനുള്ള അവസരം നൽകുന്നു. വിദഗ്ദർ പറയുന്നത് പ്രകാരം വിരമിക്കലിന് ശേഷം ഏറ്റവും അനുയോജ്യമായ ഒരു സേവിങ്സ് സ്കീമാണ് സീനിയർ സിറ്റിസൺ സേവിങ്സ് സ്കീം. 55നും 60നും ഇടയിൽ പ്രായമുള്ള പെൻഷൻ യോഗ്യരായവർക്കും വോളണ്ടറി റിട്ടയർമെന്റ് സ്കീമുകൾ (വിആർഎസ്), അല്ലെങ്കിൽ പ്രത്യേക വിആർഎസ് തിരഞ്ഞെടുത്തിട്ടുള്ള വിരമിച്ചവർക്കും ഈ സ്കീം ഉപയോഗിക്കാവുന്നതാണ്. ഡിഫെൻസ് സർവീസിൽ നിന്ന് വിരമിച്ചവർക്ക് പോലും 50 വയസ്സ് കഴിഞ്ഞാൽ പ്രത്യേക വ്യവസ്ഥകളിൽ അക്കൗണ്ട് തുറക്കാം.

ഇടയിലുടനീളമുള്ള ഏത് ബാങ്കിലും അല്ലെങ്കിൽ പോസ്റ്റ്‌ ഓഫീസിലും ഒരു എസ്.സി.എസ്.എസ് ഓപ്പൺ ചെയ്യാവുന്നതാണ്. ഈ പദ്ധതിയനുസരിച്ച് ഏറ്റവും കുറഞ്ഞ നിക്ഷേപം 1000 രൂപയും പരമാവധി നിക്ഷേപം 30 ലക്ഷം രൂപയുമാണ്. 1000 രൂപയുടെ ഗുണിതങ്ങളായിട്ടാണ് നിക്ഷേപം സാധ്യമാവുകയുള്ളൂ. പങ്കാളികളുമായിട്ട് ജോയിന്റ് അക്കൗണ്ട് തുറക്കാമെങ്കിലും, ആദ്യത്തെ അക്കൗണ്ട് ഉടമയ്ക്ക് മാത്രമേ നിക്ഷേപം നടത്താൻ കഴിയൂ.

ഒരു വ്യക്തി തന്റെ എസ്.സി.എസ്.എസ് അക്കൗണ്ടിൽ 30 ലക്ഷം രൂപ നിക്ഷേപിക്കുമ്പോൾ, പ്രതിവർഷം 8.2% പലിശ നിരക്കിൽ, വാർഷിക പലിശ 2.46 ലക്ഷം രൂപയാവും. വാർഷിക പലിശയെ 12 മാസം കൊണ്ട് ഹരിക്കുമ്പോൾ പ്രതിമാസ വരുമാനം 20,500 രൂപയായി കണക്കാക്കാം. എസ്.സി.എസ്.എസ് നിക്ഷേപങ്ങൾക്ക് ഇൻകംടാക്സ് നിയമത്തിലെ സെക്ഷൻ 80C പ്രകാരം പ്രതിവർഷം 1.5 ലക്ഷം വരെ നികുതിയിളവിന് അർഹതയുണ്ട്. എസ്.സി.എസ്.എസ് അക്കൗണ്ടിന് 5 വർഷത്തെ മെച്യൂരിറ്റി കാലയളവുണ്ട്. കാലാവധി പൂർത്തിയാകുമ്പോൾ 3 വർഷത്തേക്ക് കൂടി നീട്ടാനുള്ള ഓപ്ഷനുമുണ്ട്. അതുകൊണ്ട് തന്നെ, വിരമിച്ചവർക്ക് എസ്.സി.എസ്.എസ് നല്ലൊരു തിരഞ്ഞെടുപ്പായി മാറുന്നു.