ഇപിഎഫിൽ നിന്ന് പണം പിൻവലിക്കാൻ നോമിനേഷൻ നിർബന്ധമുണ്ടോ? എങ്ങനെ ഇ-നോമിനേഷൻ പൂർത്തിയാക്കാം

ശമ്പളക്കാരായ ജീവനക്കാർക്ക് വലിയ രീതിയിലുള്ള സാമ്പത്തിക സഹായമാണ് എംപ്ലോയീസ് പ്രൊവിഡന്റ് ഫണ്ടിൽ (ഇപിഎഫ്) നിന്നും ലഭിക്കുന്നത്. വിരമിക്കൽ കാലത്തേക്കുള്ള സമ്പാദ്യത്തിന് ഉപരി വീട് വെയ്ക്കാനോ ഭവന വായ്പ തിരിച്ചടവിനോ ആരോഗ്യ എമർജൻസിയിലോ വിവാഹ സമയത്തോ എംപ്ലോയീസ് പ്രൊവിഡന്റ് ഫണ്ട് സഹായത്തിനെത്തും. ഇപിഎഫിൽ നിന്ന് വായ്പയെടുത്തും ആവശ്യ സമയത്ത് പണം പിൻവലിക്കാം.

മാസത്തിൽ അടിസ്ഥാന ശമ്പളവും ക്ഷാമബത്തയും ചേർന്ന തുകയുടെ 12 ശതമാനമാണ് ഇപിഎഫിലേക്ക് ജീവനക്കാരന്റെ സംഭാവനയായി എത്തുന്നത്. അതേ തുക കമ്പനിയും ഇപിഎഫിലേക്ക് അടയ്ക്കും. ഇതോടൊപ്പം പലിശയും ചേർന്ന തുക ഇപിഎഫ് അം​ഗത്തിന് വിരമിക്കുമ്പോൾ പിൻവലിക്കാൻ സാധിക്കും. ഇപിഎഫ് 2022-23 സാമ്പത്തിക വർഷത്തിലെ നിക്ഷേപങ്ങൾക്ക് 8.15 ശതമാനം പലിശ ഇപിഎഫിൽ നിന്ന് ലഭിക്കുന്നുണ്ട്.

ഇപിഎഫിന്റെ നിയന്ത്രണാധികാരിയായ എംപ്ലോയീസ് പ്രൊവിഡന്റ് ഫണ്ട് ഓർ​ഗനൈസേഷൻ (ഇപിഎഫ്ഒ) ഈയിടെ നോമിനേഷൻ നിർബന്ധമാക്കിയിട്ടുണ്ട്. ഇപിഎഫിൽ നിന്ന് പണം പിൻവലിക്കാൻ നോമിനേഷൻ ആവശ്യമുണ്ടോയെന്നും എങ്ങനെ ഇ-നോമിനേഷൻ നടത്താമെന്നും ഈ ലേഖനത്തിൽ പരിശോധിക്കുന്നത്.

നോമിനിയുടെ പ്രധാന്യം

വിരമിക്കൽ കാലത്തോടൊപ്പം ജീവനക്കാരന് അത്യാഹിതം സംഭവിച്ചാൽ ഇപിഎഫ് തുക കുടുംബാംഗങ്ങൾക്ക് ലഭിക്കാൻ നോമിനിയെ തിരഞ്ഞെടുക്കുക അത്യാവശ്യമാണ്. കുടുംബാംഗങ്ങൾക്ക് ഇപിഎഫ് തുക ലഭിക്കാൻ അംഗങ്ങളെ ഇപിഎഫ് നോമിനിയായി തിരഞ്ഞെടുക്കേണ്ടതുണ്ട്. അക്കൗണ്ട് ഉടമകൾ ഗുണഭോക്താക്കളായി നോമിനികളെ തിരഞ്ഞെടുക്കുന്നത് ഈയിടെ ഇപിഎഫ്ഒ നിർബന്ധമാക്കിയിരുന്നു. എന്നാൽ നോമിനികളെ ചേർക്കുന്നതിന് സമയപരിധി നിശ്ചയിച്ചട്ടില്ല. നോമിനികൾക്ക് പ്രൊവിഡന്റ് ഫണ്ട് വിഹിതവും എംപ്ലോയീസ് ഡെപ്പോസിറ്റ് ലിങ്ക്ഡ് ഇൻഷൂറൻസും പെൻഷൻ വിഹിതവും ലഭിക്കും.

പണം പിൻവലിക്കാൻ നോമിനേഷൻ ആവശ്യമുണ്ടോ

ഇപിഎഫ്ഒ വെബ്‌സൈറ്റ് പ്രകാരം ഇപിഎഫ് അ​ഗംമായൊരാൾ നോമിനേഷൻ സമർപ്പിക്കേണ്ടത് നിർബന്ധമാണ്. ഓൺലൈൻ ഡെത്ത് ക്ലെയിമുകൾ സമർപ്പിക്കുമ്പോഴും നാമനിർദ്ദേശം ആവശ്യമാണ്. ഇപിഎഫ് അംഗത്തിന്റെ സേവന സമയത്ത് എത്ര തവണ വേണമെങ്കിലും ഇ-നോമിനേഷനുകൾ സമർപ്പിക്കാനും അപ്ഡേറ്റ് ചെയ്യാനും സാധിക്കും.

നോമിനേഷൻ വിശദാംശങ്ങൾ മാറ്റുന്നതിന് തൊഴിലുടമയുടെ അനുമതി ആവശ്യമില്ല. നോമിനേഷനുകൾ ഫയൽ ചെയ്യാൻ അംഗങ്ങൾക്ക് ആധാർ അടിസ്ഥാനമാക്കിയുള്ള ഇ-സൈൻ ഉപയോഗിക്കാം. ഇപിഎഫ് അംഗത്തിന്റെ മരണശേഷം നോമിനേഷൻ മാറ്റാനാകില്ല.

നോമിനിയെ ചേർത്തില്ലെങ്കിൽ

അക്കൗണ്ട് ഉടമകൾക്ക് ഒന്നോ ഒന്നിലധികം നോമിനികളെയോ ചേർക്കാം. കുടുംബാംഗങ്ങളില്ലെങ്കിൽ മറ്റുള്ളവരെയും നോമിനിയായി ചേർക്കാം. നോമിനി ഇല്ലെങ്കിൽ കുടുംബാംഗങ്ങൾക്ക് തുല്യവിഹിതമായി ഇപിഎഫ് തുക നൽകും. ഇപിഎഫ് അം​ഗത്വമുള്ളയാൾ വിവാഹിതനും ഭാര്യയും കുട്ടികളും ഉള്ള വ്യക്തിയാണെങ്കിൽ ഇവരെ നിർബന്ധമായും നോമിനിയായി ചേർക്കണം. പെൻഷൻ ഫണ്ടിൽ ഭാര്യയെയും മക്കളെയുമാണ് നിശ്ചയിക്കുന്നത്. ഇവരുടെ പേരുകൾ ഫാമിലി ലിസ്റ്റിൽ വേണം.

എങ്ങനെ ഇ- നോമിനേഷൻ നടത്താം

ഇപിഎഫ്ഒ വെബ്‌സൈറ്റ് വഴി ഓണ്‍ലൈനായി ഇ-നോമിനേഷന്‍ നടത്താം. ഇതിനായി ഇപിഎഫ് വരിക്കാര്‍ക്ക് ആധാര്‍ ലിങ്ക്ഡ് യുഎഎന്‍, ആധാര്‍ നമ്പറുമായി ലിങ്ക് ചെയ്ത മൊബൈല്‍ നമ്പര്‍, അപ്‌ഡേറ്റ് ചെയ്ത മെംമ്പര്‍ പ്രൊഫൈല്‍ എന്നിവ ആവശ്യമാണ്. നോമിനിയുടെ സ്‌കാന്‍ ചെയ്ത ഫോട്ടോ, ആധാര്‍, ഐഎഫ്എഫ്‌സി കോഡുള്ള ബാങ്ക് അക്കൗണ്ട്, മേല്‍വിലാസം എന്നിവ വേണം.

ഇപിഎഫ്ഒ വെബ്‌സൈറ്റ് ലോഗിന്‍ ചെയ്താല്‍ ഇ-നോമിനേഷന്റെ ബാനര്‍ ലഭിക്കും. ഇതില്‍ ക്ലിക്ക് ചെയ്‌തോ മാനേജ് ടാബില്‍ നിന്ന് ഇ- നോമിനേഷന്‍ തിരഞ്ഞെടുത്തോ ഇ-നോമിനേഷന്‍ പേജിലേക്ക് എത്താം. ഫാമിലി ഡിക്ലറേഷന്‍ വിവരങ്ങള്‍ ഇവിടെ നല്‍കണം. ഒന്നോ ഒന്നിലധികമോ നോമിനികളെ ഇവിടെ ചേര്‍ക്കാന്‍ സാധിക്കും.

നോമിനി വിശദാംശങ്ങളോടൊപ്പം നോമിനി വിഹിതവും ചേര്‍ക്കണം. ഒരു നോമിനിയാണെങ്കില്‍ 100 ശതമാനം വിഹിതവും നല്‍കാം. ഈ നടപടികള്‍ പൂര്‍ത്തിയാക്കിയ ശേഷം സേവ് ഇപിഎഫ് നോമിനേഷന്‍ ക്ലിക്ക് ചെയ്യണം.