കൂപ്പുകുത്തി ഓഹരി വിപണി; തകർച്ചയെ എങ്ങനെ നേരിടാം? അറിഞ്ഞിരിക്കേണ്ട 10 കാര്യങ്ങൾ

കോവിഡിന് ശേഷമുള്ള ഏറ്റവും വലിയ ഇടിവാണ് തിങ്കളാഴ്ച ഓഹരി വിപണിലുണ്ടായത്. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ തീരുവ പരിഷ്കാരങ്ങളാണ് ആഗോള തലത്തിൽ വ്യാപാര രംഗത്ത് വലിയ തിരിച്ചടിയുണ്ടാക്കിയിരിക്കുന്നത്. വ്യാപാര പങ്കാളികൾക്കുമേൽ ഏർപ്പെടുത്തിയിരിക്കുന്ന വ്യത്യസ്ത തീരുവയും നിരക്കുകളിലെ കുത്തനെയുള്ള വർദ്ധനവുമാണ് നിലവിലെ അനിശ്ചിതത്വത്തിന് കാരണം. പ്രധാന ആഗോള സമ്പദ്‌വ്യവസ്ഥകളിൽ ട്രംപ് ദൂരവ്യാപകമായ വ്യാപാര തീരുവയാണ് പ്രഖ്യാപിച്ചിരിക്കുന്നത്. ഏറ്റവും വലിയ സമ്പദ് വ്യവസ്ഥയായ അമേരിക്കയിലേക്ക് ചൈനയിൽ നിന്നുള്ള ഇറക്കുമതിക്ക് 34 ശതമാനവും ഇന്ത്യയിൽ നിന്നുള്ള ഇറക്കുമതിക്ക് 26 ശതമാനവും യൂറോപ്യൻ യൂണിയനിൽ നിന്നുള്ള ഇറക്കുമതിക്ക് 20 ശതമാനവുമാണ് തീരുവ പ്രഖ്യാപിച്ചിപിക്കുന്നത്.

ഇതോടെ ഏറെ നാളായി സജീവമായി നിൽക്കുന്ന പണപ്പെരുപ്പ ആഘാതവും ആഗോള മാന്ദ്യവും ഭയന്ന്, സാമ്പത്തിക വിപണികൾ അനിശ്ചിതത്വത്തിലേക്ക് നീങ്ങുകയായിരുന്നു. ഇതിന്റെ ശക്തമായ പ്രതിഫലനമാണ് ഇന്ത്യൻ വിപണിയിലും വ്യക്തമായത്. ഇന്ത്യൻ ഓഹരി സൂചികകളായ സെൻസെക്സും നിഫ്റ്റിയും കഴിഞ്ഞ ആഴ്ച 6 ശതമാനത്തിലധികം ഇടിഞ്ഞിരുന്നു. ചോര പുഴയൊഴുകിയ കറുത്ത തിങ്കളാഴ്ച രണ്ട് സൂചികകളും 5 ശതമാനത്തിലധികവും ഇടിഞ്ഞു. വിപണിയിലെ മാറ്റങ്ങളും വ്യാപര യുദ്ധവും നിക്ഷേപകർക്കിടയിലെ ആശങ്കകൾ വലിയ രീതിയിൽ വർദ്ധിപ്പിക്കുന്നു. അത്തരമൊരു അന്തരീക്ഷത്തിൽ, സാധാരണ നിക്ഷേപകരെ ഏറ്റവും കൂടുതൽ അലട്ടുന്നത് ഈ ചോദ്യങ്ങളാണ്: ഇപ്പോൾ എന്തുചെയ്യണം? എന്റെ നിക്ഷേപം എങ്ങനെ ലാഭിക്കാം? ഈ ചോദ്യങ്ങൾക്കുള്ള ഉത്തരം കണ്ടെത്താൻ ശ്രമിക്കുകയാണ് ഈ ലേഖനത്തിലൂടെ.

1. പരിഭ്രാന്തരാകാതെ ശാന്തമായി കാര്യങ്ങളെ നിരീക്ഷിക്കുക - കഴിഞ്ഞ ഒരാഴ്ചയായി ആഗോളതലത്തിൽ ഓഹരികളിൽ ഉണ്ടായ തീവ്രമായ വിറ്റഴിക്കൽ കാണുമ്പോൾ ഏതൊരു നിക്ഷേപകനും പരിഭ്രാന്തരാകുന്നത് സ്വാഭാവികമാണ്. എന്നാൽ, എല്ലാക്കാലവും ഇത് ഇങ്ങനെ ആയിരിക്കില്ലയെന്ന കാര്യം പ്രത്യേകം ശ്രദ്ധിക്കുക. ഓഹരി വിപണിയുടെ ലോകത്ത്, ഇടിവും ഉയർച്ചയും മാറി മാറി വരുന്നതാണ്. കാത്തിരിന്ന്, ശ്രദ്ധയോടെ അടുത്ത നീക്കം നടത്തുക. ക്ഷമ ഇവിടെ പ്രധാന ഘടകമാണ് നിങ്ങളുടെ നേട്ടത്തിൽ. ഇന്ന് നിങ്ങൾ പരിഭ്രാന്തരായി എല്ലാം വിൽക്കുകയാണെങ്കിൽ, നാളെ വിപണി മെച്ചപ്പെടുമ്പോൾ, നിങ്ങൾ കൂടുതൽ ഖേദിച്ചേക്കാം.

2. ദീർഘദൂര നിക്ഷേപകരാകുക - ഓഹരി വിപണി അനിശ്ചിതത്വങ്ങളുടെയും അപകട സാധ്യതകളുടെയും ഒരു സജീവ നിക്ഷേപ ഇടമാണ്. ഓർക്കുക, നിങ്ങൾ ഒരു മാസം, ആറ് മാസം തുടങ്ങിയ ഹ്രസ്വകാല ലക്ഷ്യത്തോടെയല്ല വിപണിയിൽ പ്രവേശിച്ചത്. നിങ്ങളുടെ നിക്ഷേപം 3 വർഷമോ 5 വർഷമോ അതിൽ കൂടുതലോ ആണ്. അപ്പോൾ ഇപ്പോഴത്തെ ഇടിവിനെക്കുറിച്ച് നിങ്ങൾ എന്തിന് വിഷമിക്കണം? വിദഗ്ധരായ പല നിക്ഷേപകരും വിപണിയിൽ തുടരാനും ദീർഘകാലത്തേക്ക് ചിന്തിക്കാനും ഉപദേശിക്കുന്നു. ഉയർച്ച താഴ്ചകൾ ഉണ്ടാകും, പക്ഷേ നല്ല ഓഹരികളും ഫണ്ടുകളും തീർച്ചയായും കാലക്രമേണ നല്ല വരുമാനം നൽകുന്നു.

3. നിങ്ങളുടെ പോർട്ട്‌ഫോളിയോ പരിശോധിക്കുക - സ്വയം ചോദ്യങ്ങൾ ചോദിക്കാനും വിശകലനം ചെയ്യാനുമുള്ള സമയമാണിത്. നിങ്ങളുടെ പോർട്ട്‌ഫോളിയോയിൽ ഉയർന്നതും ഉറപ്പായതുമായ റിട്ടേൺസ് വാഗ്ദാനം ചെയ്യുന്ന സ്റ്റോക്കുകൾ ഉണ്ടോ? അതോ ഭാവി വ്യക്തമല്ലാത്ത ചിലതുണ്ടോ? ശക്തമായ ബിസിനസ്സ് ഉള്ള കമ്പനികളിൽ തന്നെ തുടരുക. എന്നാൽ ട്രാക്ക് റെക്കോർഡ് അസ്ഥിരമായവരെക്കുറിച്ച് വിചിന്തനം നടത്തുക. ഓരോ വീഴ്ചയും ഒരു കണ്ണാടി ആകുന്നു, അതുകൊണ്ട് തന്നെ നിങ്ങളുടെ പോർട്ട്‌ഫോളിയോ വിശകലനം ചെയ്യാൻ ഇത് നല്ല സമയമായിരിക്കാം.

4. എസ്ഐപി നിക്ഷേപം തുടരുക - ഓഹരി വിപണിയിലെ അപകട സാധ്യതകൾ കുറയ്ക്കാനും അച്ചടക്കത്തോടെയുള്ള നിക്ഷേപം അനുവദിക്കുന്ന രീതിയാണ് എസ്ഐപി അഥവ സിസ്റ്റമാറ്റിക് ഇൻവെസ്റ്റമെന്റ് പ്ലാൻ. ഒരു ഇടിവ് നേരിടുന്ന വിപണിയില്‍ എസ്ഐപി നിക്ഷേപം നിര്‍ത്തുന്നത് ഏറ്റവും വലിയ തെറ്റായിരിക്കാം. വിപണി താഴുമ്പോള്‍, അതേ തുകയ്ക്ക് കൂടുതല്‍ യൂണിറ്റുകള്‍ ലഭിക്കും - അതിനര്‍ത്ഥം നിങ്ങള്‍ കുറഞ്ഞ വിലയ്ക്ക് വാങ്ങുന്നു എന്നാണ്. ഇത് ഒരു വില്‍പ്പനയില്‍ ഷോപ്പിംഗ് നടത്തുന്നത് പോലെയാണ്. ദീര്‍ഘകാലാടിസ്ഥാനത്തില്‍, ഈ യൂണിറ്റുകള്‍ നല്ല ലാഭം നല്‍കുന്നു.

5. പരിഭ്രാന്തരായി വിറ്റു കളയരുത് - വിപണി ഇടിയുമ്പോൾ സാധാരണയായി കണ്ടുവരുന്ന പ്രവണതയും പ്രതികരണവുമാണ് എല്ലാം വിൽക്കുക എന്നത്. ഭീമമായ നഷ്ടം പ്രതീക്ഷിച്ചാണ് പലരും മുതലെങ്കിലും ലാഭിക്കാൻ ഇങ്ങനെ ചെയ്യുന്നത്. എന്നാൽ ഇത് പലപ്പോഴും ഏറ്റവും വലിയ തെറ്റാണെന്ന് തെളിയുന്നു. നിങ്ങൾ വാങ്ങിയ വിലയേക്കാൾ കുറഞ്ഞ വിലയ്ക്ക് വിൽക്കുന്നതിലൂടെ നിങ്ങൾക്ക് യഥാർത്ഥ നഷ്ടം സംഭവിക്കും. അൽപ്പം കാത്തിരിക്കുക, ഒരു ശ്വാസം എടുക്കുക, തുടർന്ന് ചിന്തിക്കുക. ഇത്തരം സാഹചര്യങ്ങളിലാണ് നിങ്ങൾ നഷ്ടത്തിലേക്കുള്ള കുറുക്കുവഴി തിരഞ്ഞെടുക്കുന്നതാണെന്ന് പറയുന്നത്.

6. വിപണി തകർച്ചയിലും ഒളിഞ്ഞിരിക്കുന്ന നിക്ഷേപ സാധ്യതകൾ - ഓഹരി വിപണിയിലെ ഇടിവ് ഒരു കിഴിവ് വിൽപ്പന പോലെയാണ്. മുമ്പ് വില കൂടിയ ഓഹരികൾ ഇപ്പോൾ കുറഞ്ഞ വിലയിൽ നിക്ഷേപകർക്ക് ലഭ്യമാണ്. നിങ്ങൾ റിസ്ക് എടുക്കാൻ തയ്യാറാണെങ്കിൽ, മിച്ചം പണമുണ്ടെങ്കിൽ, ദീർഘകാല നിക്ഷേപം ആരംഭിക്കാൻ ഇതൊരു നല്ല അവസരമായിരിക്കും.

7. എമർജൻസി ഫണ്ട് സജ്ജമാക്കി നിർത്തുക - വിപണി ഇടിഞ്ഞു കൊണ്ടിരിക്കുകയാണ്, അതിനിടയിൽ, ഏതെങ്കിലും വ്യക്തിപരമായ ആവശ്യം ഉണ്ടായാൽ ഉപയോഗിക്കാൻ ആവശ്യത്തിന് പണം നിങ്ങളുടെ കൈവശം ഒരു എമർജൻസി ഫണ്ടായി ഉണ്ടാകണം. ഉദ്ദാഹരണത്തിന് അടിയന്തര ആശുപത്രി ചെലവുകൾ, തൊഴിൽ നഷ്ടം, വീടിന്റെയും വാഹനങ്ങളുടെയും അറ്റകുറ്റപ്പണി തുടങ്ങിയവ മാറ്റിവെക്കാൻ സാധിക്കുന്ന ചെലവുകളല്ലാ. കുറഞ്ഞത് 6 മുതൽ 12 മാസത്തെ ദൈനംദിന ചെലവുകൾക്ക് ആവശ്യമായ പണം എഫ്ഡി, സേവിംഗ്സ് അക്കൗണ്ടിൽ കരുതുക.

8. എത്രത്തോളം റിസ്ക് എടുക്കാനുള്ള കഴിവ് നിങ്ങൾക്കുണ്ടെന്ന് വിലയിരുത്തുക - എല്ലാ ദിവസവും മാർക്കറ്റ് കാണുന്നത് നിങ്ങൾക്ക് ബോറടിപ്പിക്കുന്നുണ്ടെങ്കിൽ അല്ലെങ്കിൽ രാത്രിയിൽ ഉറങ്ങാൻ കഴിയുന്നില്ലെങ്കിൽ, ഒരുപക്ഷേ നിങ്ങൾ നിങ്ങളുടെ കഴിവിനേക്കാൾ കൂടുതൽ റിസ്ക് എടുത്തിട്ടുണ്ടാകാം. നിക്ഷേപം മനസ്സിന് സമാധാനം നൽകുന്ന തരത്തിലായിരിക്കണം, അസ്വസ്ഥതയല്ല. ആവശ്യമെങ്കിൽ, ഇക്വിറ്റി കുറയ്ക്കുക, ബാലൻസ്ഡ് ഫണ്ടുകൾ അല്ലെങ്കിൽ ഡെറ്റ് ഉപകരണങ്ങൾ ഉൾപ്പെടുത്തുക.

9. വിദഗ്ധ അഭിപ്രായം തേടുക - നിങ്ങൾ തുടക്കക്കാരാണെങ്കിലും പരിചയ സമ്പന്നരാണെങ്കിലും വിപണി സാധ്യതകളും പ്രതീക്ഷകളും മനസ്സിലാക്കുന്നതിന് ഒരു വിദഗ്ധ അഭിപ്രായം തേടുന്നതും ഉപദേശം സ്വീകരിക്കുന്നതും നന്നായിരിക്കും. ഒരു സാമ്പത്തിക അല്ലെങ്കിൽ നിക്ഷേപ ഉപദേഷ്ടവിന് നിങ്ങൾക്ക് ശരിയായ ദിശ കാണിച്ചുതരാനാകും. എസ്ഐപി നിർത്തണോ വേണ്ടയോ, ഏത് ഓഹരികൾ വിൽക്കണം, എവിടെ നിക്ഷേപിക്കണം എന്നതിനെക്കുറിച്ച് നിങ്ങൾക്ക് ആശയക്കുഴപ്പമുണ്ടെങ്കിൽ - തീർച്ചയായും ഒരു വിദഗ്ദ്ധനെ സമീപിക്കുക.

10. സമൂഹ മാധ്യമങ്ങളിലെ കിംവദന്തികളോട് പ്രതികരിക്കരുത് - എല്ലാ ദിവസവും, മുഖ്യധാര മാധ്യമങ്ങളിലും സോഷ്യൽ മീഡിയയിലും 'മാർക്കറ്റ് തകർച്ച’, 'സാമ്പത്തിക മാന്ദ്യം’ തുടങ്ങിയ തലക്കെട്ടുകൾ പ്രത്യക്ഷപ്പെടും. പക്ഷേ അവയെ ഭയപ്പെടുന്നതിനുപകരം, നിങ്ങൾ നിങ്ങളുടെ തന്ത്രത്തിൽ ഉറച്ചുനിൽക്കണം. നിങ്ങളുടെ പദ്ധതി, നിങ്ങളുടെ ലക്ഷ്യം, നിങ്ങളുടെ സമയപരിധി - ഈ മൂന്ന് കാര്യങ്ങളാണ് ഏറ്റവും പ്രധാനം. ഒഴിവാക്കേണ്ടവയെ അർഹിക്കുന്ന പ്രധാന്യത്തോടെ തന്നെ ഒഴിവാക്കുക.