80,000 രൂപ മാസ ശമ്പളക്കാരന് എങ്ങനെ 20,000 രൂപ നിക്ഷേപത്തിലേക്ക് മാറ്റാം; നിക്ഷേപിക്കാൻ ഈ തന്ത്രമിറക്കാം

50/25/25 റൂൾ

സാമ്പത്തിക നിയന്ത്രണത്തിന് സഹായിക്കുന്ന മികച്ചൊരു സേവിം​ഗ് റൂളാണ് 50/25/25 എന്നത്. ഓരോ മാസത്തെയും വരുമാനം ഏതൊക്കെ രീതിയിൽ അലോട്ട് ചെയ്യണം എന്ന് പറഞ്ഞു തരുന്നൊരു കൃത്യമായ മാർ​ഗ നിർദ്ദേശമാണിത്.

ആകെ മാസ വരുമാനത്തിന്റെ പകുതി അവശ്യ ചെലവുകൾക്ക് മാറ്റിവെയ്ക്കണം. ജീവിതത്തിൽ ഒഴിവാക്കാൻ സാധിക്കാത്ത, ആരോ​ഗ്യം, ഭക്ഷണം, വീട്ടു ചെലവുകൾ,​ ​ഗതാ​ഗത ചെലവുകൾ എന്നിവയ്ക്കായി 50 ശതമാനം മാറ്റിവെയ്ക്കാം. 

വരുമാനത്തിന്റെ 25 ശതമാനം, നാലിലൊന്ന് മറ്റു ചെലവുകൾക്ക് മാറ്റിവെയ്ക്കാം. ഹോട്ടൽ ഭക്ഷണം, സിനിമാ ടിക്കറ്റ് തുടങ്ങിയ ​ഗണത്തിലുള്ള ഓരോരുത്തരുടെയും ഇഷ്ടമനുസരിച്ചുള്ള ചെലവുകൾക്ക് ഈ തുക മാറ്റിവെയ്ക്കാം.

ബാക്കി വരുന്ന 25 ശതമാനം തുകയാണ് നിക്ഷേപത്തിനായി മാറ്റിവെയ്ക്കേണ്ടത്. ശമ്പളം കയ്യിലെത്തുന്ന സമയത്ത് തന്നെ ഈ തുക നിക്ഷേപത്തിനായി മാറ്റേണ്ടതുണ്ട്. 

80,000 രൂപ ശമ്പളക്കാരന് എങ്ങനെ മാനേജ് ചെയ്യാം

പ്രതിമാസ ശമ്പളം 80,000 രൂപ വാങ്ങുന്നൊരാൾക്ക് 50/25/25 റൂൾ അനുസരിച്ച് ശമ്പളത്തെ 40,000 രൂപ/ 20,000 രൂപ/ 20,000 രൂപ എന്നിങ്ങനെ തരം തിരിക്കാം. വാടക ചെല്, പലചരക്ക് സാധനങ്ങൾ, ഗതാഗത ചെലവുകൾ, മറ്റ് ഒഴിവാക്കാനാവാത്ത ചെലവുകൾ എന്നി അവശ്യ ചെലവുകൾക്കായി 40,000 മാറ്റിവെയ്ക്കാം.

20,000 രൂര വിനോദങ്ങൾക്കും, ഡൈനിംഗ്, ഷോപ്പിംഗ്, മറ്റ് ചെലവുകൾക്കും ഉപയോ​ഗിക്കാം. അടുത്ത 25 ശതമാനമായി 20,000 രൂപയെ നിക്ഷേപത്തിലേക്ക് മാറ്റാം.

റൂൾ മാറ്റാം

50/25/25 സേവിം​ഗ്സ് റൂൾ ഓരോരുത്തർക്കും വ്യക്തിഗത സാഹചര്യങ്ങളെ അടിസ്ഥാനമാക്കി മാറ്റം വരുത്താവുന്നതാണ്.

ഉദാഹരണത്തിന് വായ്പകൾ, മെഡിക്കൽ ബില്ലുകൾ തുടങ്ങിയ ഉയർന്ന അവശ്യ ചെലവുകളുള്ള വ്യക്തിയാണെങ്കിൽ 50 ശതമാനത്തിലധികം ഇവിടെ ചെലവഴിക്കേണ്ടി വരാം. ഈ സാഹചര്യത്തിൽ വിനോദത്തിനായി മാറ്റിവെയ്ക്കുന്ന തുക കുറച്ച് നിക്ഷേപം മുടക്കമില്ലാതെ കൊണ്ടു പോകാൻ പരിശ്രമിക്കണം.

നേരെമറിച്ച്, ഉയർന്ന വരുമാനവും കുറഞ്ഞ അവശ്യ ചെലവുകളുമുള്ള മാസങ്ങളിൽ വിനോദ ചെലവുകൾക്കും ​​സമ്പാദ്യത്തിനോ വേണ്ടി കൂടുതൽ തുക നീക്കിവെക്കാം. 

എങ്ങനെ നിക്ഷേപിക്കാം

കയ്യിൽ നിക്ഷേപിക്കാനായി വന്ന തുക ഓരോരുത്തരുടെയും നിക്ഷേപ ലക്ഷ്യങ്ങൾ അടിസ്ഥാനമാക്കി വേണം നിക്ഷേപിക്കാൻ. റിട്ടയർമെന്റിന് വേണ്ടിയുള്ള സമ്പാദ്യം, മക്കളുടെ വിദ്യാഭ്യാസം, വീട് വാങ്ങനായുള്ള സമ്പാദ്യം, വാഹനം വാങ്ങാൻ തുടങ്ങിയ ലക്ഷ്യങ്ങൾക്ക് വേണ്ടി നിക്ഷേപിക്കാം.

ഇതോടൊപ്പം ഈ തുകയിൽ ഒരു ഭാ​ഗം മെഡിക്കൽ ബില്ലുകൾ, കാർ അറ്റകുറ്റപ്പണികൾ പോലെയുള്ള അപ്രതീക്ഷിത ചെലവുകൾക്കായി മാറ്റണം. എമർജൻസി ഫണ്ടായി ലിക്വിഡിറ്റിയുള്ളിടത്ത് ഈ തുക മാറ്റണം.

20,000 രൂപയുടെ നിക്ഷേപം

80,000 രൂപ ശമ്പളക്കാരൻ മാസത്തിൽ നിക്ഷേപത്തിനായി മാറ്റിവെയ്ക്കുന്നത് 20,000 രൂപയാണെങ്കിൽ ഇത് ഒന്നിലധികം അസറ്റ് ക്ലാസുകളിലേക്ക് നിക്ഷേപിക്കണം. ഇക്വിറ്റി, ഡെബ്റ്റ്, സ്വർണം തുടങ്ങി ഓരോരുത്തരുടെയും റിസ്ക് പ്രൊഫൈൽ അനുസരിച്ച് നിക്ഷേപിക്കാം.

പ്രതിമാസം 10,000 രൂപ എസ്ഐപി വഴി 15 വർഷത്തേക്ക് ഇക്വിറ്റി മ്യൂച്വൽ ഫണ്ടിൽ നിക്ഷേപിക്കുമ്പോൾ 12 ശതമാനം റിട്ടേൺ ലഭിക്കാം. ഇതുവഴി 50,45,760 രൂപ നിക്ഷേപകന് ലഭിക്കും.

ഡെബ്റ്റ് നിക്ഷേപത്തിനായി ആവർത്തന നിക്ഷേപങ്ങളോ പബ്ലിക്ക് പ്രൊവിഡന്റ് ഫണ്ടോ തിരഞ്ഞെടുക്കാം. മാസ തവണകളായി സ്വർണത്തിൽ നിക്ഷേപിക്കാൻ അനുയോജ്യം ​ഗോൾഡ് മ്യൂച്വൽ ഫണ്ടുകളാണ്.