എഫ്ഡി കാൽക്കുലേറ്റർ; 9.50% മുതൽ 8.50% വരെ പലിശ നൽകുന്ന 5 ബാങ്കുകൾ; 5 ലക്ഷം നിക്ഷേപിച്ചാൽ വരുമാനമെത്ര

രാജ്യത്ത് ഒരു ബാങ്കിൽ നിന്ന് ലഭിക്കുന്ന ഏറ്റവും ഉയർന്ന പലിശ നിരക്ക് 9.50 ശതമാനമാണ്. ഈ ഉയർന്ന നിരക്കുകൾ ഇന്ന് വാ​ഗ്ദാനം ചെയ്യുന്നത് സ്മോൾ ഫിനാൻസ് ബാങ്കുകളാണ്. മറ്റ് ബാങ്കുകളെ പോലെ റിസർവ് ബാങ്ക് ഓഫ് ഇന്ത്യയുടെ നിയന്ത്രണത്തിലുള്ളവയായതിനാൽ സ്മോൾ ഫിനാൻസ് ബാങ്കുകളിലെ നിക്ഷേപവും സുരക്ഷിതമാണ്.

സ്മോൾ ഫിനാൻസ് ബാങ്കുകളിലെ നിക്ഷേപത്തിന് ഇൻഷുറൻസ് ആൻഡ് ക്രെഡിറ്റ് ഗ്യാരന്റി കോർപ്പറേഷന്റെ 5 ലക്ഷം രൂപയുടെ ഇൻഷുറൻസ് ലഭിക്കും. ഈ ബാങ്കുകളിൽ 9.50 ശതമാനത്തിനും 8.50 ശതമാനത്തിനും ഇടയിൽ പലിശ നൽകുന്ന 5 ബാങ്കുകളെയും 5 ലക്ഷം രൂപ നിക്ഷേപിച്ചാൽ ലഭിക്കുന്ന വരുമാനവും നോക്കാം.

യൂണിറ്റി സ്മോൾ ഫിനാൻസ് ബാങ്ക്

7 ദിവസത്തിനും 10 വർഷത്തിനും ഇടയിൽ കാലാവധിയുള്ള നിക്ഷേപങ്ങൾക്ക് 4.50 ശതമാനം മുതൽ 9 ശതമാനം വരെയാണ് യൂണിറ്റി ബാങ്ക് സാധാരണ പൗരന്മാർക്ക് നൽകുന്ന പലിശ നിരക്ക്. മുതിർന്ന പൗരന്മാർക്ക് 4.50 ശതമാനം മുതൽ 9.50 ശതമാനം വരെ പലിശ ലഭിക്കും.

 

ഏറ്റവും ഉയർന്ന നിരക്ക് ലഭിക്കുന്നത് 1001 ദിവസത്തെ കാലയളവിലാണ്. സാധാരണ നിക്ഷേപകർക്ക് 9 ശതമാനവും മുതിർന്ന പൗരന്മാർക്ക് 9.50 ശതമാനവും പലിശ ലഭിക്കും. 9.50 ശതമാനം പലിശ നിരക്കിൽ 1001 ദിവസത്തേക്ക് 5 ലക്ഷം രൂപ നിക്ഷേപിച്ചാൽ 6.46 ലക്ഷം രൂപ ലഭിക്കും. 9 ശതമാനം പലിശ ലഭിക്കുന്ന സാധാരണ നിക്ഷേപകന് 5 ലക്ഷത്തിന്റെ നിക്ഷേപം വഴി 6.38 ലക്ഷം രൂപ ലഭിക്കും. 

സൂര്യോദയ് സ്മോൾ ഫിനാൻസ് ബാങ്ക്

സാധാരണ നിക്ഷേപകർക്ക് 4 ശതമാനം മുതൽ 8.51 ശതമാനം പലിശയാണ് സൂര്യോദയ് സ്മോൾ ഫിനാൻസ് ബാങ്ക് നൽകുന്ന പലിശ നിരക്ക്. മുതിർന്ന പൗരന്മാർക്ക് 4.5 ശതമാനം മുതൽ 8.76 ശതമാനം വരെ പലിശ നേടാം.

999 ദിവസത്തെ കാലാവധിയിലാണ് ഉയർന്ന പലിശ ലഭിക്കുന്നത്. 8.76 ശതമാനം പലിശയിൽ 5 ലക്ഷം രൂപ 999 ദിവസത്തേക്ക് നിക്ഷേപിച്ചാൽ കാലാവധിയിൽ 6.33 ലക്ഷം രൂപയായി മാറും. സാധാരണ നിക്ഷേപകർക്ക് 8.51 ശതമാനം പലിശയിൽ 6.29 ലക്ഷം രൂപ നേടാൻ സാധിക്കും.

ഉത്കൃഷ് സ്മോൾ ഫിനാൻസ് ബാങ്ക്

ഉത്കർഷ് സ്മോൾ ഫിനാൻസ് ബാങ്ക് സാധരണ നിക്ഷേപകർക്ക് 4 ശതമാനം മുതൽ 8.25 ശതമാനം വരെ പലിശയാണ് നൽകുന്നത്. സാധാരണ പൗരന്മാർക്ക് 700 ദിവസത്തെ നിക്ഷേപങ്ങൾക്കാണ് 8.25 ശതമാനം പലിശ ലഭിക്കുക. മുതിർന്ന പൗരന്മാർക്ക് ഇതേ കാലയളവിൽ 8.75 ശതമാനം പലിശ ലഭിക്കും.

8.75 ശതമാനം പലിശയ്ക്ക് 5 ലക്ഷം രൂപ 700 ദിവസത്തേക്ക് നിക്ഷേപിച്ചാൽ കാലാവധിയിൽ 5,90,286 രൂപ ലഭിക്കും. 8.25 ശതമാനം പലിശ നിരക്കിൽ 5 ലക്ഷം രൂപ 5,84,769 രൂപയായി വളരും. 

ജനസ്മോൾ ഫിനാൻസ് ബാങ്ക്

ജന സ്‌മോൾ ഫിനാൻസ് ബാങ്ക് സാധാരണക്കാർക്കുള്ള സ്ഥിര നിക്ഷേപത്തിന് 3.75 ശതമാനം മുതൽ 8.15 ശതമാനം വരെയും മുതിർന്ന പൗരന്മാർക്ക് 4.45 ശതമാനം മുതൽ 8.80 ശതമാനം വരെയും പലിശ നൽകും. 500 ദിവസത്തേക്കാണ് ഉയർന്ന നിരക്ക്.

5 ലക്ഷം രൂപ 500 ദിവസത്തേക്ക് 8.85 ശതമാനം പലിശ നിരക്കിൽ നിക്ഷേപിച്ചാൽ 5,63,698 രൂപ ലഭിക്കും. സാധാരണ നിക്ഷേപകർക്ക് 8.15 ശതമാനം പലിശ നിരക്കിൽ 5 ലക്ഷം രൂപ നിക്ഷേപിച്ചാൽ 5,58,430 രൂപ ലഭിക്കും. 

ഫിൻകെയർ സ്മോൾ ഫിനാൻസ് ബാങ്ക്

സ്ഥിര നിക്ഷേപങ്ങൾക്ക് 3 ശതമാനം മുതൽ 8.11 ശതമാനം പലിശയും മുതിർന്ന പൗരന്മാർക്ക് 8.71 ശതമാനം വരെയുമാണ് ഫിൻകെയർ ബാങ്ക് നൽകുന്ന പലിശ. 750 ദിവസത്തെ നിക്ഷേപത്തിനാണ് ഉയർന്ന നിരക്ക്. 750 ദിവസത്തിൽ 8.71 ശതമാനം പലിശ നിരക്കിൽ 5 ലക്ഷം നിക്ഷേപിച്ചാൽ കാലാവധിയിൽ 5,96,846 രൂപ ലഭിക്കും.