സ്ഥിര നിക്ഷേപത്തിനിത് നല്ല കാലം; മുതിർന്നവർക്ക് അധിക സന്തോഷം; ഉയർന്ന പലിശ തരുന്ന ബാങ്കുകളിതാ

റിസര്‍വ് ബാങ്ക് റിപ്പോ നിരക്ക് ഉയര്‍ത്തിയതിന് പിന്നാലെ വായ്പ നിരക്ക് ഉയരുകയാണ്. ഈ സമയത്ത് അല്പം ആശ്വാസം ലഭിക്കുന്നത്. സ്ഥിര നിക്ഷേപക്കാര്‍ക്കാണ്. ബാങ്കുകള്‍ നിക്ഷേപമായി സ്വീകരിക്കുന്ന പണത്തിന് പലിശ ഉയര്‍ത്താന്‍ തുടങ്ങിയിട്ടുണ്ട്. റിസ്‌ക് എടുക്കാന്‍ താല്പര്യമില്ലാത്ത മുതിർന്ന പൗരന്മാർക്ക് മറ്റൊന്നും ചിന്തിക്കാതെ സ്ഥിര നിക്ഷേപത്തിന് ഇറങ്ങാം. സ്ഥിര നിക്ഷേപത്തിന് നിരക്ക് ഉയരാൻ തുടങ്ങിയതോടെ മുതിര്‍ന്ന പൗരന്മാരുടെ പലിശ നിരക്കും നല്ല രീതിയിൽ ഉയർന്നിട്ടുണ്ട്. എന്നാൽ മുഴുവൻ പണവും ഇപ്പോഴെ നിക്ഷേപിക്കേണ്ടതുണ്ടോ. ഇനിയും പലിശ ഉയരുമ്പോൾ അതിന്റെ ​ഗുണം നേടേണ്ടതില്ലേ. അതിനാൽ ഹൃസ്വകാല നിക്ഷേപമാണ് നല്ലത്. ഹൃസ്വകാലത്തേക്ക് മികച്ച പലിശ നല്‍കുന്ന സ്വകാര്യ ബാങ്കുകൾ ഏതൊക്കെയാണെന്ന് നോക്കാം.

ബന്‍ഡന്‍ ബാങ്ക്

കൊൽക്കത്ത ആസ്ഥാനമായി പ്രവർത്തിക്കുന്ന സ്വകാര്യ ബാങ്കാണ് ബൻഡൻ ബാങ്ക്. 2001 ൽ സ്ഥാപിതമായ ബാങ്കിന് സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലുമടക്കം 34 ഇടത്ത് ബാങ്കിന് സ്വാധീനമുണ്ട്. 2022 മേയ് മാസത്തിൽ ബൻഡൻ ബാങ്ക് പലിശനിരക്ക് പുനക്രമീകരിച്ചിരുന്നു. മുതിര്‍ന്ന പൗരന്മാര്‍ക്ക് രണ്ട് വര്‍ഷം വരെയുള്ള നിക്ഷേപത്തിന് 6.5 ശതമാനം പലിശ ബൻഡൻ ബാങ്ക് നല്‍കും. 1 വര്‍ഷം മുതല്‍ 18 മാസം വരെയുള്ള നിക്ഷേപങ്ങൾക്കും 6.5 ശതമാനം പലിശയാണ് ബാങ്ക് അനുവദിക്കുന്നത്. 

ആര്‍ബിഎല്‍ ബാങ്ക്

മുംബൈ ആസ്ഥാനമായി പ്രവർത്തിക്കുന്ന ആർബിഎൽ ബാങ്ക് ബുധനാഴ്ചയാണ് നിക്ഷേപങ്ങളുടെ പലിശ നിരക്ക് ഉയര്‍ത്തിയത്. 1-2 വര്‍ഷ കാലാവധിയിൽ രണ്ട് കോടിക്ക് താഴെയുള്ള നിക്ഷേപത്തിന് ആര്‍എല്‍ബി ബാങ്ക് മുതിര്‍ന്ന പൗരന്മാര്‍ക്ക് 6.7 ശതമാനം പലിശയാണ് നല്‍കുന്നത്. 12 മാസം മുതല്‍ 15 മാസത്തില്‍ കുറവുള്ള നിക്ഷേപത്തിന് 6.75 ശതമാനം പലിശയാണ് ആര്‍ബിഎല്‍ ബാങ്ക് നല്‍കുന്നത്. നിക്ഷേപം 15 മാസം വരെ നടത്തിയാൽ 7.15 ശതമാനം പലിശ ലഭിക്കും. 15 മാസം മുതല്‍ 24 മാസത്തിന് ഒരു ദിവസം കുറവ് കാലാവധിയുള്ള നിക്ഷേപങ്ങള്‍ക്ക് 6.75 ശതമാനം പലിശ ലഭിക്കും.

കൊടക് മഹീന്ദ്ര ബാങ്ക്

മുംബൈ ആസ്ഥാനമായി പ്രവർത്തിക്കുന്ന കൊടക് മഹീന്ദ്ര ബാങ്ക് 2003 ലാണ് സ്ഥാപിതമായത്. 1 മുതല്‍ 2 വര്‍ഷത്തേക്കുള്ള നിക്ഷേപത്തിന് 5.90 ശതമാനം പലിശയാണ് കൊടക് മഹീന്ദ്ര ബാങ്ക് നല്‍കുന്നത്. 356 ദിവസം മുതല്‍ 389 ദിവസം വരെയുള്ള നിക്ഷേപങ്ങള്‍ക്ക് 5.90 ശതമാനമാണ് ബാങ്കിലെ പലിശ. 390 ദിവസം മുതല്‍ 23 മാസത്തില്‍ കൂടാതെയുള്ള നിക്ഷേപങ്ങള്‍ക്ക് 6 ശതമാനം പലിശ ലഭിക്കും. 23 മാസം മുതല്‍ രണ്ട് വര്‍ഷം വരെ 6.10 ശതമാനം പലിശയും കൊടക് മഹീന്ദ്ര ബാങ്ക് നൽകുന്നുണ്ട്.

ഇന്‍ഡസ്ഇന്‍ഡ് ബാങ്ക്

1994 ൽ മുംബൈയിൽ പ്രവർത്തനം തുടങ്ങിയ സ്വകാര്യ ബാങ്കാണ് ഇൻഡസ്ഇൻഡ് ബാങ്ക്. അന്നത്തെ കേന്ദ്ര ധനകാര്യ മന്ത്രി മൻമോഹൻ സിം​ഗാണ് ബാങ്ക് ഉദ്ഘാടനം ചെയ്തത്. രണ്ട് കോടി വരെയുള്ള സ്ഥിര നിക്ഷേപത്തിന് ജൂണ്‍ 1 മുതലാണ് പലിശ നിരക്ക് ഉയര്‍ത്തിയത്. 1 വര്‍ഷം ം മുതല്‍ രണ്ട് വര്‍ഷത്തില്‍ താഴെയുള്ള നിക്ഷേപത്തിന് 6.5 ശതമാനം പലിശ ലഭിക്കും. 2 വര്‍ഷത്തിനും 2 വര്‍ഷം ആറ് മാസം കാലവധിയുള്ള നിക്ഷേപത്തിന് 7 ശതമാനം പലിശയും നല്‍കുന്നു. 

യെസ് ബാങ്ക്

2004 ൽ സ്ഥാപിതമായ സ്വകാര്യ ബാങ്കാണ് യെസ് ബാങ്ക്. മുബൈയാണ് ആസ്ഥാനം. 2 കോടി വരെയുള്ള നിക്ഷേപത്തിന് യെസ് ബാങ്ക് പലിശ നിരക്ക് പുതുക്കി നിശ്ചയിച്ചത് 2022 ജൂണ്‍ ആറിനമാണ്. ഒരു വര്‍ഷം വരെയുള്ള നിക്ഷേപത്തിന് 6.25 ശതമാനം പലിശ യെസ് ബാങ്ക് നൽകുന്നുണ്ട്. മൂന്ന് വർഷം വരെയുള്ള നിക്ഷേപത്തിന് യെസ് ബാങ്കിൽ 6.50 ശതമാനം പലിശയാണ് നൽകുക. 

ഡിസിബി ബാങ്ക്

1 വര്‍ഷം മുതല്‍ 2 വര്‍ഷം വരെയുള്ള നിക്ഷേപങ്ങള്‍ക്ക് 6.50 ശതമാനം മുതല്‍ 7 ശതമാനം വരെ പലിശ ഡിസിബി ബാങ്ക് നല്‍കുന്നുണ്ട്. 12 മാസം വരെ 6.50 ശതമാനം പലിശ നല്‍കും. 12 മാസം മുതല്‍ 15 മാസം വരെ 6.25 ശതമാനം പലിശയാണ് നൽകുന്നത്. 15മാസത്തിനും 18 മാസത്തിനും ഇടയിലുള്ള നിക്ഷേപത്തിന് 6.6 ശതാമാനം പലിശ നല്‍കും. 700 ദിവസത്തില്‍ കുറയാത്ത നിക്ഷേപങ്ങള്‍ക്ക് 7 ശതമാനം പലിശ നല്‍കും.