സ്ഥിര നിക്ഷേപം; മുതിർന്ന പൗരന്മാർക്ക് പലിശ വരുമാനത്തിൽ നികുതി ഇളവ് നേടാം; എങ്ങനെ എന്നറിയാം

0 വയസ് പ്രായമുള്ള പലരുടെയും ഇഷ്ട നിക്ഷേപം സ്ഥിര നിക്ഷേപമാണ്. ബാങ്കിൽ നിക്ഷേപിക്കുന്നത് വഴി നിക്ഷേപത്തിന് ലഭിക്കുന്ന സുരക്ഷിതത്വമാണ് മുതിർന്ന പൗരന്മാരെ സ്ഥിര നിക്ഷേപത്തിലേക്ക് ആകർഷിക്കുന്നത്. ഇന്നത്തെ കാലത്ത് മികച്ച പലിശ നിരക്ക് കൂടി ലഭിക്കുന്നതിനാൽ സ്ഥിര നിക്ഷേപമിടുന്നത് മികച്ച ഓപ്ഷനാണ്.

മുതിർന്ന പൗരന്മാർക്ക് 9.50 ശതമാനമാണ് ലഭിക്കുന്ന ഏറ്റവും ഉയർന്ന പലിശ. മികച്ച പലിശ ലഭിക്കുന്നതിനോടൊപ്പം മുതിർന്ന പൗരന്മാർക്ക് മാത്രമായി സ്ഥിര നിക്ഷേപ പലിശയ്ക്ക് മുകളിൽ നികുതി ഇളവ് ലഭിക്കുന്നുണ്ട്. ഇത് വിശദമായി നോക്കാം. 

 

സെക്ഷൻ 80ടിടിബി

മുതിർന്ന പൗരന്മാർക്ക് സ്ഥിര നിക്ഷേപ പലിശയ്ക്ക് മുകളിൽ നികുതി ഇളവ് നൽകുന്നത് 1961ലെ ആദായ നികുതി നിയമം സെക്ഷൻ 80ടിടിബി പ്രകാരമാണ്. 2019 ലെ ഫിനാന്‍സ് ആക്ടിലാണ് ആദായ നികുതി നിയമത്തിലെ സെക്ഷന്‍ 80ടിടിബി അവതരിപ്പിക്കുന്നത്. ഈ സെക്ഷന്‍ പ്രകാരം മുതിര്‍ന്ന പൗരന്മാര്‍ക്ക് വിവിധ നികുതി ഇളവുകളായി നേട്ടം ലഭിക്കും.

മുതിര്‍ന്ന പൗരന്മാര്‍ക്ക് സ്ഥിര നിക്ഷേപത്തിന് 50,000 രൂപ വരെ നികുതി ഇളവ് ലഭിക്കും. 60 വയസ് കഴിഞ്ഞ നിക്ഷേപകര്‍ക്കുള്ള 50,000 രൂപ വരെയുള്ള പലിശ വരുമാനത്തിനാണ് സെക്ഷന്‍ 80ടിടിബി പ്രകാരം ഇളവ് ലഭിക്കുക.

നിക്ഷേപം എവിടെ എന്നത് പ്രധാനം

സ്ഥിര നിക്ഷേപം, ആവര്‍ത്തന നിക്ഷേപം, സേവിംഗ്‌സ് അക്കൗണ്ട് എന്നിവയില്‍ നിന്നുള്ള പലിശ വരുമാനത്തിനാണ് 80ടിടിബി പ്രകാരമുള്ള ഇളവ് ഉപയോഗിക്കാൻ സാധിക്കുക. ബാങ്കിംഗ് സ്ഥാപനത്തിലെ നിക്ഷേപങ്ങള്‍ക്കും രജിസ്റ്റര്‍ ചെയ്ത സഹകരണ സൊസൈറ്റികളിലെ നിക്ഷേപത്തിനും പോസ്റ്റ് ഓഫീസ് നിക്ഷേപങ്ങളിലെ പലിശ വരുമാനത്തിനുമാണ് നികുതി ഇളവ് ഉപയോഗിക്കാന്‍ സാധിക്കുക.

എങ്ങനെ ഉപയോ​ഗപ്പെടുത്താം

മുതിര്‍ന്ന പൗരന്മാര്‍ക്ക് ആദായ നികുതി റിട്ടേണ്‍ ഫയല്‍ ചെയ്യുമ്പോള്‍ സെക്ഷൻ 80ടിടിബി പ്രകാരമുള്ള നികുതി ഇളവുകള്‍ ഉപയോഗിക്കാം. ഇന്‍കം ഫ്രം അദര്‍ സോഴ്‌സ് എന്ന തലക്കെട്ടിലാണ് പലിശ വരുമാനം വരുന്നത്. ഈ വരുമാനത്തിന് നികുതി ഇളവ് ക്ലെയിം ചെയ്യാൻ സാധിക്കും.

സേവിം​ഗ്സ് അക്കൗണ്ട്, സ്ഥിര നിക്ഷേപം, ആവർത്തന നിക്ഷേപം എന്നിവയ്ക്ക് പുറമെ പോസ്റ്റ് ഓഫീസ് പദ്ധതികളിൽ നാഷണൽ സേവിം​ഗ്സ് സർട്ടിഫക്കറ്റ്, സീനിയര്‍ സിറ്റിസണ്‍ സേവിംഗ്സ് സ്‌കീം, പോസ്റ്റ് ഓഫീസ് പ്രതിമാസ വരുമാന സ്‌കീം മുതലായവയിലെ പലിശയിൽ നിന്നും ഇളവ് നേടാം. എന്നാൽ കമ്പനി സ്ഥിര നിക്ഷേപത്തിൽ നിന്നുള്ള പലിശ പോലുള്ളവയ്ക്ക് അര്‍ഹത ഉണ്ടായിരിക്കില്ല.

ഇളവ് ലഭിക്കാനുള്ള യോ​ഗ്യതകൾ

* വ്യക്തിക്ക് 60 വയസോ അതിൽ കൂടുതലോ പ്രായമുണ്ടായിരിക്കണം.

* ഇളവ് ആ​ഗ്രഹിക്കുന്ന വ്യക്തിയുടെ നിക്ഷേപം ബാങ്കുകളിലോ പോസ്റ്റ് ഓഫീസുകളിലോ സഹകരണ സംഘങ്ങളിലോ ആയിരിക്കണം.

* ഈ മൂന്ന് ധനകാര്യ സ്ഥാപനങ്ങളിലെ മേൽ പറഞ്ഞ നിക്ഷേപങ്ങളിൽ നിന്നുള്ള വരുമാനം പലിശ രൂപത്തിലായിരിക്കണം.

* വ്യക്തിയുടെ മൊത്തം വാർഷിക വരുമാനം 5 ലക്ഷം രൂപയിൽ കവിയാൻ പാടില്ല, കിഴിവ് തുക 50,000 രൂപയിൽ കവിയാൻ പാടില്ല

9.50% പലിശ

മുതിർന്ന പൗരന്മാർക്ക് ഏറ്റവും മികച്ച പലിശ നൽകുന്നത് യൂണിറ്റി സ്മോൾ ഫിനാൻസ് ബാങ്കാണ്. ജൂണ്‍ 14 നാണ് യൂണിറ്റി സ്‌മോള്‍ ഫിനാന്‍സ് ബാങ്ക് 2 കോടിക്ക് താഴെയുള്ള നിക്ഷേപങ്ങള്‍ക്ക് പലിശ നിരക്കുയര്‍ത്തിയത്. റെഗുലര്‍ നിക്ഷേപകര്‍ക്ക് 4.50 ശതാനം മുതല്‍ 9 ശതമാനം പലിശ ലഭിക്കും. 1001 ദിവസത്തേക്കാണ് 9 ശതമാനം പലിശ ലഭിക്കുക. മുതിര്‍ന്ന പൗരന്മാര്‍ക്ക് 9.50 ശതമാനം പലിശ നേടാം.