ഇ-കൊമേഴ്‌സ് മേഖലയില്‍ പുതിയ നിയന്ത്രണങ്ങള്‍; ഫ്‌ളാഷ് സെയില്‍ ഉള്‍പ്പെടെ ഇല്ലാതായേക്കാം

ഇ കൊമേഴ്‌സ് മേഖലയില്‍ വര്‍ധിച്ചു വരുന്ന തട്ടിപ്പുകള്‍ തടയിടാന്‍ സര്‍ക്കാര്‍ പുതിയ നിയന്ത്രണങ്ങള്‍ നടപ്പില്‍ വരുത്താന്‍ ഒരുങ്ങുന്നു. കൃത്യസമയത്ത് ഓര്‍ഡര്‍ ചെയ്ത ഉത്പ്പന്നം ഉപയോക്താവിന്റെ പക്കല്‍ എത്തിക്കാതിരിക്കുന്നതുള്‍പ്പെടെയുള്ള വീഴ്ചകള്‍ക്കെതിരെ ഇനി നടപടികള്‍ ഉണ്ടായേക്കും. ഒപ്പം ചില പ്രത്യേക ഫ്‌ളാഷ് സെയിലുകള്‍ക്കും നിയന്ത്രണം ഏര്‍പ്പെടുത്തും.

ഉപഭോക്താക്കളുടെ താത്പര്യങ്ങള്‍ സംരക്ഷിക്കുന്നതിനും, സ്വതന്ത്രവും നീതിയുക്തവുമായ മത്സരം പ്രോത്സാഹിപ്പിക്കുന്നതിനും മേഖലയിലെ സുതാര്യത ഉറപ്പാക്കുന്നതിനും മേഖലയെ ശക്തിപ്പെടുത്തുവാനുമാണ് പുതിയ ഭേദഗതികള്‍ നടപ്പിലാക്കുന്നതെന്ന് കേന്ദ്ര ഉപഭോക്തൃകാര്യ മന്ത്രാലയം പുറത്തിറക്കിയ പ്രസ്താവനയില്‍ പറയുന്നു.

പ്രത്യേക ഉത്പന്നങ്ങളുടെ വിപണനം പ്രോത്സാഹിപ്പിക്കുന്ന ഫ്ളാഷ് സെയിലുകള്‍ക്കായിരിക്കും നിയന്ത്രണം ഏര്‍പ്പെടുത്തുക. ഉപഭോക്താക്കള്‍ക്ക് തിരഞ്ഞെടുക്കാനുള്ള അവസരമില്ലാതാക്കുന്ന അധിക ഡിസ്‌കൗണ്ട് വില്‍പന ഇതോടെ ഇല്ലാതാകും.

2020ലെ കണ്‍സ്യൂമര്‍ പ്രൊട്ടക്ഷന്‍ ( ഇ കൊമേഴ്‌സ്) റൂള്‍സിലുള്ള ഈ ഭേദഗതികള്‍ക്ക് മേല്‍ സര്‍ക്കാര്‍ ആഭിപ്രായങ്ങളും നിര്‍ദേശങ്ങളും ആരാഞ്ഞിരിക്കുകയാണ്. 15 ദിവസമാണ് സമയ പരിധി. നിര്‍ദേശങ്ങള്‍ 2021 ജൂലൈ 6 വരെ എന്ന ഇ-മെയിലില്‍ സമര്‍പ്പിക്കാം.

2019ലെ ഉപഭോക്തൃ സംരക്ഷണ നിയമം പാലിക്കുന്നുണ്ടെന്ന് ഉറപ്പുവരുത്താനായി ചീഫ് കംപ്ലെയിന്‍സ് ഓഫീസര്‍മാരെ നിയമിക്കണമെന്നും മന്ത്രാലയത്തിന്റെ ഭേദഗതികളില്‍ പറയുന്നു. പരാതി പരിഹാര സംവിധാനം ശക്തിപ്പെടുത്തുന്നതിന്റെ ഭാഗമായാണിത്.