പണം വളർന്നത് ഇരട്ടിയലധികം; 10,000 രൂപയുടെ എസ്ഐപിയെ 38 ലക്ഷമാക്കി വളർത്തിയ നിക്ഷേപിമിതാ

ഓഹരി വിപണിയിലെ വിശകലനങ്ങലുടെ തലവേദനകളില്ലാതെ നിക്ഷേപിക്കാനാണ് പലരും മ്യൂച്വൽ ഫണ്ടുകളെ തിരഞ്ഞെടുക്കുന്നത്. എന്നാൽ വിപണികളിലെ ചാഞ്ചാട്ടങ്ങളിൽ നിന്ന് രക്ഷപ്പെടാൻ ലാർജ്കാപ്, മിഡ്കാപ്, സ്മോൾകാപ് എന്നിവയിൽ ഏത് ഫണ്ടിൽ നിക്ഷേപിക്കണമെന്ന ആശയകുഴപ്പം നിക്ഷേപകർക്കുണ്ടാകും. ലാർജ്കാപ് ഫണ്ടുകളുടെ സന്തുലനാവസ്ഥയും സ്മോൾ കാപ് ഫണ്ടുകളിലെ റിട്ടേണും പ്രതീക്ഷിക്കുകയാണെങ്കിൽ എല്ലാ മാർക്കറ്റ് ക്യാപിറ്റലൈസേഷനിലും ഉൾപ്പെടുന്ന ഫണ്ടുകളിൽ നിക്ഷേപിക്കണം. ഇതിന് ഫ്ലെക്സികാപ് ഫണ്ടുകളെ തിരഞ്ഞെടുക്കാം.

മൊത്തം ആസ്തിയുടെ 65 ശതമാനമെങ്കിലും ഇക്വിറ്റിയിൽ നിക്ഷേപിക്കുന്ന ഫ്ലെക്സികാപ് ഫണ്ടുകളിൽ ഫണ്ട് മാനേജർമാർക്ക് മാർക്കറ്റ് വീക്ഷണത്തിനും നിക്ഷേപ ലക്ഷ്യത്തിനും അനുസരിച്ച് പോർട്ട്ഫോളിയോയുടെ അസറ്റ് അലോക്കേഷൻ ക്രമീകരിക്കാൻ സാധിക്കും. ഉദാഹരണത്തിന് ലാർജ്കാപ് ഓഹരികൾ ഓവർ വാല്യുഡ് ആയി കാണുന്ന ഘട്ടത്തിൽ ഫണ്ട് മാനേജർക്ക് മിഡ്കാപ്, സ്മോൾകാപ് ഓഹരികളിലേക്ക് അലോക്കേഷൻ വർധിപ്പിക്കാൻ സാധിക്കും.

മികച്ച ഫണ്ട് മാനേജർക്ക് കീഴിലുള്ള ഫ്ലെക്സികാപ് ഫണ്ടുകൾ കഴിഞ്ഞ 5- 10 വർഷത്തിനിടെ മികച്ച റിട്ടേൺ നൽകിയിട്ടുണ്ട്. 22.04 ശതമാനം റിട്ടേൺ നൽകിയ ക്വാൻഡ് ഫ്ലെക്സികാപ് ഫണ്ട് ഡയറക്ട് പ്ലാൻ ആണ് കൂട്ടത്തിലെ മിടുക്കൻ. മികച്ച ഫണ്ടുകളും റിട്ടേണുകളും പരിശോധിക്കാം.

ക്വാൻഡ് ഫ്ലെക്സികാപ് ഫണ്ട് - ഡയറക്ട് പ്ലാൻ

10 വർഷത്തിനിടെ ക്വാൻഡ് ഫ്ലെക്സികാപ് ഫണ്ട് - ഡയറക്ട് പ്ലാൻ 22.04 ശതമാനം റിട്ടേൺ നൽകി. 10,000 രൂപയുടെ പ്രതിമാസ എസ്ഐപി വഴി 10 വർഷത്തേക്ക് തുടർച്ചയായി നിക്ഷേപിച്ചൊരാൾക്ക് 38,43,318 രൂപയാണ് ലഭിച്ചത്. 12 ലക്ഷത്തിന്റെ നിക്ഷേപം ഇരട്ടിയിലധികമായി മാറി. നവംബർ 16 നുള്ള കണക്ക് പ്രകാരം 80.13 രൂപയാണ് ക്വാൻഡ് ഫ്ലെക്സികാപ് ഫണ്ട് - ഡയറക്ട് പ്ലാനിന്റെ നെറ്റ് അസറ്റ് വാല്യു.

പരാ​ഗ് പരീ​ഖ് ഫ്ലെക്സികാപ് ഫണ്ട്- ഡയറക്ട് പ്ലാൻ

10 വർഷത്തിനിടെ 19.61 ശതമാനം റിട്ടേണാണ് പരാ​ഗ് പരീ​ഖ് ഫ്ലെക്സികാപ് ഫണ്ട്- ഡയറക്ട് പ്ലാൻ നൽകിയത്. ഇതേ ഫണ്ടിൽ 10 വർഷം മുൻപ് ആരംഭിച്ച 10,000 രൂപയുടെ പ്രതിമാസ എസ്ഐപി ആരംഭിച്ചിരുന്നെങ്കിൽ നിക്ഷേപകന് ഇന്നത്തെ മൂല്യം 33,69,921രൂപയാകുമായിരുന്നു. വാല്യുറിസർച്ച് 5 സ്റ്റാർ റേറ്റിം​ഗ് നൽകിയ ഫണ്ടിന്റെ നവംബർ 16 നുള്ള നെറ്റ് അസറ്റ് വാല്യു 66.07 രൂപയാണ്.

ജെഎം ഫ്ലെക്സികാപ് ഫണ്ട്- ഡയറക്ട് പ്ലാൻ

മൂന്നാം സ്ഥാനത്തുള്ള ജെഎം ഫ്ലെക്സികാപ് ഫണ്ട്- ഡയറക്ട് പ്ലാനിന്റെ 10 വർഷത്തെ റിട്ടേൺ 18.51 ശതമാനമാണ്. 10,000 രൂപയുടെ പ്രതിമാസ എസ്ഐപി 10 വർഷത്തേക്ക് നടത്തിയവർക്ക് 31,75,757 രൂപയാണ് ഇന്നത്തെ സമ്പാദ്യം. വാല്യു റിസർച്ച് 5 സ്റ്റാർ റേറ്റിം​ഗ് നൽകിയ ഫണ്ടിന് 78.79 രൂപയാണ് നവംബർ 16 നുള്ള നെറ്റ് അസറ്റ് വാല്യു.

ഫ്രാങ്ക്ളിൻ ഇന്ത്യ ഫ്ലെക്സികാപ് ഫണ്ട്- ഡയറക്ട് പ്ലാൻ

ഫ്രാങ്ക്ളിൻ ഇന്ത്യ ഫ്ലെക്സികാപ് ഫണ്ട്- ഡയറക്ട് പ്ലാൻ 10 വർഷത്തിനിടെ 15.22 ശതമാനം റിട്ടേൺ നൽകി. 10,000 രൂപയുടെ എസ്ഐപി ഇക്കാലയളവിനുള്ളിൽ 26,60,395 രൂപയായാണ് വളർന്നത്. ഫണ്ടിന്റെ നെറ്റ് അസറ്റ് വാല്യു നവംബർ 16 നുള്ള കണക്ക് പ്രകാരം 1,202.17 രൂപയാണ്. വാല്യു റിസർച്ചിന്റെ 5 സ്റ്റാർ റേറ്റിം​ഗുള്ള ഫണ്ടാണിത്.

ആദിത്യ ബിർള സൺലൈഫ് ഫ്ലെക്സികാപ് ഫണ്ട്- ഡയറക്ട് പ്ലാൻ

10 വർഷത്തിനിടെ 15.57 ശതമാനം റിട്ടേണാണ് ആദിത്യ ബിർള സൺലൈഫ് ഫ്ലെക്സികാപ് ഫണ്ട്- ഡയറക്ട് പ്ലാൻ നൽകിയത്. 31,36,068 രൂപയാണ് 10 വർഷത്തെ 10,000 രൂപ പ്രതിമാസ എസ്ഐപിയുടെ ഇന്നത്തെ മൂല്യം. 1,446.62 രൂപയാണ് നവംബർ 16 നുള്ള നെറ്റ് അസറ്റ് വാല്യു. വാല്യു റിസർച്ച് 3 സ്റ്റാർ റേറ്റിം​ഗാണ് ഫണ്ടിന് നൽകിയിട്ടുള്ളത്.

അറിയിപ്പ്

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നല്‍കുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ സ്വീകരിക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. മ്യൂച്വൽ ഫണ്ട് നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.