എഫ്ഡി പലിശ നിരക്കുയരുന്നു; സ്ഥിര നിക്ഷേപത്തിന് ഏത് കാലാവധി തിരഞ്ഞെടുക്കുന്നത് അനുയോജ്യം; അറിയാം

സ്ഥിര നിക്ഷേപങ്ങളുടെ പലിശ നിരക്കുകൾ സമീപ കാലത്ത് വർധനവ് രേഖപ്പെടുത്തുകയാണ്. പലിശനിരക്കിൽ വർധനവുണ്ടാകുന്നതിനാൽ നിക്ഷേപകരുടെ മനസിൽ നിരവദി സംശയങ്ങളും ഉടലെടുത്തിട്ടുണ്ട്. ഇപ്പോൾ നിക്ഷേപിക്കണോ, നിലവിലുള്ള നിക്ഷേപം പിൻവലിച്ച് ഉയർന്ന നിരക്കിൽ നിക്ഷേപിക്കണമോ, ഏത് കാലയളവിൽ നിക്ഷേപിക്കണം എന്നിങ്ങനെ ആശയകുഴപ്പങ്ങൾ നിരവധിയാണ്. സിംപിളായ നിക്ഷേപമാണെന്ന് കരുതുമ്പോഴും സ്ഥിര നിക്ഷേപങ്ങളുടെ ഇത്തരം ഭാ​ഗങ്ങൾ ആശയകുഴപ്പമുണ്ടാക്കുന്നവയാണ്.

നിരവധി ബാങ്കുകൾ സ്ഥിര നിക്ഷേപ പലിശ നിരക്കുകൾ വർദ്ധിപ്പിച്ചിട്ടുണ്ട്. ചില ബാങ്കുകൾ നിരക്ക് വർധനവ് തുടരുകയാണ്. ഇതോടൊപ്പം സ്ഥിര നിക്ഷേപത്തിൽ റിട്ടേൺ പരമാവധിയാക്കാൻ നിരവധി ഓപ്ഷനുകളുണ്ട്. ഉദാഹരണത്തിന്, നിക്ഷേപത്തിന് ഉയർന്ന വരുമാനം നൽകുന്നവയാണ് പ്രത്യേക സ്ഥിര നിക്ഷേപങ്ങൾ. സ്ഥിര നിക്ഷേപം ആരംഭിക്കുന്നതിന് മുൻപ് ഇത്തരത്തിലുള്ള നിരവധി ഘടകങ്ങൾ അറിഞ്ഞിരിക്കേണ്ടതുണ്ട്. ഇവ വിശദമായി നോക്കാം.

സാമ്പത്തിക ആവശ്യങ്ങൾ അറിയുക

സ്ഥിര നിക്ഷേപങ്ങൾക്ക് മുന്നോടിയായി സാമ്പത്തിക ലക്ഷ്യങ്ങൾ പുനരവലോകനം ചെയ്യേണ്ടത് നിർണായകമാണ്. വീട് വാങ്ങുക, മക്കളുടെ ഉന്നത വിദ്യാഭ്യാസ ചെലവുകൾ, കാർ വാങ്ങൽ, വിരമിക്കൽ ആസൂത്രണം ചെയ്യുക തുടങ്ങിയ ഹ്രസ്വകാല, ദീർഘകാല ലക്ഷ്യങ്ങൾ പരിഗണിക്കണം. ഇത് അനുസരിച്ചായിരിക്കണം സ്ഥിര നിക്ഷേപത്തിന്റെ കാലയളവ് തീരുമാനിക്കേണ്ടത്.

ലോക്ഇൻ പിരിയഡ് അറിയുക

സ്ഥിര നിക്ഷേപത്തിൽ ശ്രദ്ധിക്കാത്ത കാര്യമാണ് കാലയളവുമായി ബന്ധപ്പെട്ട ലോക്ക്-ഇൻ പിരിയഡുകൾ. ടാക്സ് സേവിം​ഗ്സ് സ്ഥിര നിക്ഷേപങ്ങൾക്ക് 5 വർഷ ലോക്ഇൻ പിരിയഡുണ്ട്. ഉയർന്ന പലിശ നൽകുന്ന നോൺ കോളബിൾ സ്ഥിര നിക്ഷേപങ്ങൾ കാലാവധിയോളം പിൻവലിക്കൽ അനുവദിക്കുന്നില്ല. പലിശ നിരക്ക് ഇനിയും ഉയരുമെന്ന് പ്രതീക്ഷിക്കുന്നുണ്ടെങ്കിൽ ഹ്രസ്വകാല സ്ഥിര നിക്ഷേപങ്ങൾ തിരഞ്ഞെടുക്കുന്നത് അനുയോജ്യമാണ്. നിലവിലെ സ്ഥിര നിക്ഷേപം കാലാവധി പൂർത്തിയാകുമ്പോൾ ഉയർന്ന നിരക്കിൽ വീണ്ടും നിക്ഷേപിക്കാൻ ഇത് സഹായിക്കും.

പലിശ നിരക്ക് താരതമ്യം ചെയ്യുക

വിവിധ ബാങ്കുകളും ബാങ്കിതര ധനകാര്യ സ്ഥാപനങ്ങളും നൽകുന്ന പലിശ നിരക്കുകൾ നിക്ഷേപത്തിന് മുൻപ് വിലയിരുത്തണം. പലിശ നിരക്ക് ഉയരുന്ന ഘട്ടത്തിൽ നിരക്കുകൾ താരതമ്യം ചെയ്യുന്നത് കൂടുതൽ നിർണായകമാണ്. ബാങ്കുകലുടെ വിശ്വാസ്യത ഉറപ്പാക്കിക്കൊണ്ട് മികച്ച നിരക്കുകൾ നൽകുന്ന ബാങ്കുകൾ പരി​ഗണിക്കാം.

പ്രത്യേക സ്ഥിര നിക്ഷേപങ്ങൾ

നിക്ഷേപകരെ ആകർഷിക്കുന്നതിനായി ബാങ്കുകൾ പലപ്പോഴും ഉയർന്ന നിരക്കിൽ പ്രത്യേക സ്ഥിര നിക്ഷേപ സ്കീമുകൾ അവതരിപ്പിക്കാറുണ്ട്. ഹ്രസ്വകാലത്തേക്കാണ് പൊതുവെ പ്രത്യേക സ്ഥിര നിക്ഷേപങ്ങളുണ്ടാകാറുള്ളത്. നിബന്ധനകളും വ്യവസ്ഥകളും മനസിലാക്കിയ ശേഷം ഇവ തിരഞ്ഞെടുക്കാം.

എഫ്‍ഡി ലാഡറിം​ഗ്

സ്ഥിര നിക്ഷേപത്തിൽ ലാഡറിംഗ് തന്ത്രം ഉപയോ​ഗിക്കുന്നത് പരിഗണിക്കാവുന്നതാണ്. വ്യത്യസ്ത കാലയളവുകളുള്ള ഒന്നിലധികം സ്ഥിര നിക്ഷേപങ്ങളിൽ നിക്ഷേപം നടത്തുകയാണ് ഇതിനായി ചെയ്യേണ്ടത്. ഓരോ സ്ഥിര നിക്ഷേപവും കാലാവധി എത്തുമ്പോൾ നിലവിലുള്ള ഉയർന്ന നിരക്കിൽ വീണ്ടും നിക്ഷേപിക്കാം. ലിക്വിഡിറ്റി നിലനിർത്തിക്കൊണ്ടുതന്നെ റിട്ടേൺ പരമാവധിയാക്കാൻ എഫ്ഡി ലാഡറിം​ഗ് സ​ഹായിക്കും.

പോസ്റ്റ് ടാക്സ് റിട്ടേൺ

സ്ഥിര നിക്ഷേപ പലിശ നികുതി ബാധകമാണ്. ഉയർന്ന് ടാക്സ് ബ്രാക്കറ്റിൽ വരുന്നവർ നികുതിക്ക് ശേഷം ലഭിക്കുന്ന യഥാർഥ റിട്ടേൺ പരിശോധിക്കേണ്ടതുണ്ട്. വ്യത്യസ്ത കാലാവധിയിൽ വ്യത്യസ്ത ബാങ്കുകൾ നൽകുന്ന പലിശ നിരക്കുകൾ വ്യത്യസ്തമാണ്. എച്ച്‌ഡിഎഫ്‌സി ബാങ്ക് ഒരു വർഷത്തേക്കുള്ള സ്ഥിര നിക്ഷേപത്തിന് 6.60 ശതമാനം പലിശ നിരക്ക് നൽകുന്നുണ്ട്.

നികുതിക്ക് ശേഷമുള്ള നിരക്ക് 4.62 ശതമാനമാണ്. ഐസിഐസിഐ ബാങ്ക് 6.70 ശതമാനം പലിശ നിരക്കിലാണ് ഒരു വർഷത്തേക്ക് സ്ഥിര നിക്ഷേപം സ്വീകരിക്കുന്നത്. ഇവിടെ പോസ്റ്റ് ടാക്സ് റിട്ടേൺ 4.69 ശതമാനമാണ്.