3 വർഷം കൊണ്ട് 30 ലക്ഷം നേടാം; കുറഞ്ഞ ചെലവിൽ സാധാരണക്കാരെ ലക്ഷാധിപതിയാക്കുന്ന എസ്ഐപി മാജിക്ക്

നിക്ഷേപത്തിലൂടെ 30 ലക്ഷം രൂപ സമ്പാദിക്കാന്‍ ആഗ്രഹിക്കുന്നൊരാള്‍ക്ക് ഇന്ന് നിലവിലുള്ള ഏറ്റവും അനുയോജ്യമായ മാര്‍ഗം മ്യൂച്വല്‍ ഫണ്ടില്‍ എസ്‌ഐപിയായി നിക്ഷേപിക്കുകയാണ്. നിക്ഷേപത്തിന് പിന്നാലെ കോമ്പൗണ്ടിംഗിലൂടെ വേഗത്തില്‍ സമ്പാദ്യം വര്‍ധിക്കുമെന്നതാണ് എസ്‌ഐപിയുടെ ഗുണം. എസ്‌ഐപിയിലൂടെ തന്നെ വേഗം ലക്ഷ്യത്തിലെത്താന്‍ ചില നുറുക്ക് വഴികളുണ്ട്.

വരുമാനത്തിന് ക്രമാനുസൃതമായി എസ്‌ഐപി തുക ഉയര്‍ത്തുക എന്നത് ആദ്യത്തെ വഴി. മറ്റൊന്ന് നിക്ഷേപത്തില്‍ കൂടുതല്‍ വളര്‍ച്ചയുണ്ടാകാന്‍ കാത്തിരിക്കുക എന്നതാണ്. ഇതില്‍ ആദ്യത്തെ ഓപ്ഷനാണ് നിക്ഷേപകര്‍ക്ക് തീരുമാനമെടുക്കാന്‍ സാധിക്കുന്നത്. രണ്ടാമത്തെ ഘടകം വിപണി സാഹചര്യങ്ങളെ അടിസ്ഥാനപ്പെടുത്തിയിരിക്കുന്നതാണ്. ഇതിനാല്‍ വര്‍ഷത്തില്‍ 5 ശതമാനമോ, 10 ശതമാനമോ എസ്‌ഐപി തുകയില്‍ വര്‍ധനവ് വരുത്തിയാല്‍ പോലും ലക്ഷ്യത്തിലെത്താനുള്ള വേഗം കുറയ്ക്കാനാകും.

ഫണ്ട്‌സ് ഇന്ത്യയുടെ വെല്‍ത്ത് കോണ്‍വര്‍സേഷന്‍ റിപ്പോര്‍ട്ട് 1 കോടി രൂപ രൂപ കണ്ടെത്താനുള്ള നിക്ഷേപങ്ങളെ പറ്റി വിശദമാക്കുന്നുണ്ട്. 12 ശതമാനം വാര്‍ഷിക ആദായം പ്രതീക്ഷിക്കുന്നൊരു മ്യൂച്വല്‍ ഫണ്ടില്‍ നിക്ഷേപിക്കുന്നവര്‍ക്ക് എസ്ഐപിയില്‍ വാര്‍ഷിക വര്‍ധനവും വരുത്തിയാല്‍ എത്ര തുക നിക്ഷേപിച്ച് എത്ര കാലം കൊണ്ട് 30 ലക്ഷം രൂപയിലെത്താമെന്ന് പരിശോധിക്കാം. 

10,000 രൂപ

പ്രതിമാസം 10,000 രൂപയുടെ എസ്‌ഐപി ചെയ്യുന്നൊരാള്‍ക്ക് മ്യൂച്വല്‍ ഫണ്ടിലൂടെ 30 ലക്ഷം രൂപ നേടാന്‍ 11 വര്‍ഷവും 7 മാസവും ആവശ്യമാണ്. വര്‍ഷത്തില്‍ 5% എസ്‌ഐപി തുക ഉയര്‍ത്തിയാല്‍ കാലയളവ് 10 വര്‍ഷവും 5 മാസവുമായി ചുരുങ്ങും. 10 ശതമാനം വര്‍ധനവ് വരുത്തിയാല്‍ 9 വര്‍ഷവും 6 മാസവും കൊണ്ട് 30 ലക്ഷം രൂപ നേടാന്‍ സാധിക്കും.

20,000 രൂപ

എസ്‌ഐപി തുക 20,000 രൂപയായി വര്‍ധിക്കുമ്പോള്‍ 12 ശതമാനം വാര്‍ഷിക വളര്‍ച്ചയുള്ളൊരു ഫണ്ടില്‍ നിന്ന് 30 ലക്ഷം രൂപ ലഭിക്കാന്‍ 7 വര്‍ഷവും 8 മാസവും കാത്തിരുന്നാല്‍ മതി. 5 ശതമാനം എസ്‌ഐപി വര്‍ധിപ്പിച്ചാല്‍ 7 വര്‍ഷവും 1 മാസവും മതിയാകും. 10 ശതമാനം എസ്‌ഐപി തുക വര്‍ധിപ്പിച്ചാല്‍ 6.6 വര്‍ഷം കൊണ്ട് ലക്ഷ്യത്തിലെത്താം. 

25,000 രൂപ

പ്രതിമാസ എസ്‌ഐപി തുക 25,000 രൂപയിലെത്തുമ്പോള്‍ 30 ലക്ഷം രൂപ നേടാനുള്ള സമയം 6 വര്‍ഷവും 7 മാസവുമായി ചുരുങ്ങും. 5 ശതമാനം എസ്‌ഐപി വര്‍ധിപ്പിച്ചാല്‍ 6 വര്‍ഷവും 1 മാസവുമാണ് കാലാവധി. 10 ശതമാനം വര്‍ധിപ്പിച്ചാല്‍ 30 ലക്ഷം നേടാനുള്ള സമയം 5 വര്‍ഷവും 8 മാസവുമായി ചുരുങ്ങും.

30,000 രൂപ

30,000 രൂപ മാസത്തില്‍ നിക്ഷേപത്തിനായി മാറ്റാന്‍ സാധിക്കുന്നൊരാള്‍ക്ക് മ്യൂച്വല്‍ ഫണ്ട് എസ്‌ഐപി വഴി 5 വര്‍ഷവും 10 മാസവും കൊണ്ട് 30 ലക്ഷം രൂപ നേടാനാകും. 5 വര്‍ഷവും 5 മാസവും കൊണ്ട് 30 ലക്ഷം രൂപ നേടാന്‍ 30,000 രൂപയുടെ എസ്‌ഐപി വര്‍ഷത്തില്‍ 5 ശതമനം വര്‍ധിപ്പിച്ചാല്‍ മതി.

40,000 രൂപ

എസ്‌ഐപി തുക വര്‍ധിക്കുന്തോറും കാലയളവ് കുറഞ്ഞു വരികയാണ്. മാസത്തില്‍ 40,000 രൂപ നിക്ഷേപിക്കുന്നൊരാള്‍ക്ക് 4.8 വര്‍ഷം കൊണ്ട് 30 ലക്ഷം നേടാം. 6 വര്‍ഷവും 9 മാസവും കാത്തിരുന്നാല്‍ 50 ലക്ഷം രൂപ സ്വന്തമാക്കാം. 5 ശതമാനം എസ്‌ഐപി തുക വര്‍ധിപ്പിച്ചാല്‍ 4.5 വര്‍ഷവും കൊണ്ട് ലക്ഷ്യത്തിലെത്താം. 10 ശതമാനം വര്‍ധനവ് വരുത്തിയാല്‍ 4 വര്‍ഷം 2 മാസമായി കാലയളവ് കുറയും.

50,000 രൂപ

മാസത്തില്‍ അരലക്ഷം രൂപ എസ്‌ഐപി വഴി മ്യൂച്വല്‍ ഫണ്ടില്‍ നിക്ഷേപിക്കുന്നൊരാള്‍ക്ക് 3 വര്‍ഷവും 11 മാസവും കൊണ്ട് 30 ലക്ഷം രൂപ നേടാം. 5 ശതമാനം എസ്‌ഐപിയില്‍ വാര്‍ഷിക വര്‍ധനവ് വരുത്തിയാല്‍ 3 വര്‍ഷവും 9 മാസവുമായി ചുരുങ്ങും. 10 ശതമാനം എസ്‌ഐപി വര്‍ധിപ്പിച്ചാല്‍ 3 വര്‍ഷവും 7 മാസവും കൊണ്ട് 30 ലക്ഷം രൂപ നേടാനാകും.