8.05% പലിശ; സ്ഥിര വരുമാനം; റിസര്‍വ് ബാങ്കിന്റെ ഈ നിക്ഷേപം ബാങ്ക് എഫ്ഡിയേക്കാള്‍ ഗുണം ചെയ്യും; നോക്കുന്നോ

പണം ഏറ്റവും സുരക്ഷിതമായ ഇടത്ത് നിക്ഷേപിക്കാൻ ആ​ഗ്രഹിക്കുന്നവർ സർക്കാർ പദ്ധതികളെ സ്വീകരിക്കുന്നത് സ്വാഭാവികമാണ്. ബാങ്ക് സ്ഥിര നിക്ഷേപങ്ങളും പോസ്റ്റ് ഓഫീസ് നിക്ഷേപങ്ങളുമാണ് റിസ്കെടുക്കാൻ താല്പര്യമില്ലാത്തവരുടെ ഇഷ്ട നിക്ഷേപങ്ങൾ.

റിസർവ് ബാങ്ക് ഓഫ് ഇന്ത്യയുടെ സുരക്ഷിതത്വത്തിൽ നിക്ഷേപിക്കാൻ ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ട് 2020 എന്ന നിക്ഷേപ പദ്ധതി നോക്കാം. വർഷത്തിൽ 2 തവണ പലിശ വരുമാനം നൽകുന്ന ഈ ബോണ്ടിന്റെ പലിശ നിരക്ക് ബാങ്ക് സ്ഥിര നിക്ഷേപങ്ങളേക്കാൾ ഉയരാൻ പോവുകയാണ്. പലിശ 8.05 ശതമാനത്തിലേക്ക് എത്തുന്ന ഈ നിക്ഷേപത്തെ വിശദമായി അറിയാം.

ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ട് 2020

ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ട് 2020 കേന്ദ്ര സർക്കാറിന് വേണ്ടി റിസര്‍വ് ബാങ്ക് ഓഫ് ഇന്ത്യയാണ് അനുവദിക്കുന്നത്. ചെയ്യുന്നു, അതിനാല്‍, ഈ ബോണ്ടുകളിലെ പണം പൂര്‍ണമായും സുരക്ഷിതമാണ്. കുറഞ്ഞ നിക്ഷേപം 1,000 രൂപയാണ്. ശേഷം 1,000 രൂപയുടെ ഗുണിതങ്ങളായി പരിധിയില്ലാതെ നിക്ഷേപിക്കാം. 

ഏഴ് വര്‍ഷത്തെ ലോക്ക്-ഇന്‍ കാലയളവ് ഉള്ള നിക്ഷേപമാണിത്. ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ടിൽ 70 നും 80 നും ഇടയില്‍ പ്രായമുള്ളവര്‍ക്ക് ലോക്ക്-ഇന്‍ കാലാവധി അഞ്ച് വര്‍ഷമായിരിക്കും. 80 വയസിന് മുകളിലുള്ളവര്‍ക്ക് നിക്ഷേപ തീയതി മുതല്‍ നാല് വര്‍ഷത്തിന് ശേഷം നിക്ഷേപം പിന്‍വലിക്കാം. 

പലിശ നിരക്ക്

ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ട് 2020 ആരംഭിച്ചതിന് ശേഷം ആദ്യമായാണ് പലിശ നിരക്ക് 8 ശതമാനം കടക്കാന്‍ പോകുന്നത്. നിക്ഷേപത്തിന് നിലവില്‍ 7.35 ശതമാനം പലിശയാണ് നല്‍കുന്നത്. എല്ലാം 6 മാസത്തിലുമാണ് പലിശ നിരക്ക് പുതുക്കുന്നത്. അടുത്ത മാറ്റം ജൂലായ് 1 ന് വരും.

ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ടിന്റെ പലിശ നിരക്ക് സ്ഥിരമായുള്ളതില്ല. നാഷണല്‍ സേവിംഗ്‌സ് സ്‌കീമിന്റെ പലിശ നിരക്കുമായി ഇത് ലിങ്ക് ചെയ്തിട്ടുണ്ട്. ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ടിന് നാഷണല്‍ സേവിംഗ്സ് സ്‌കീമിനേക്കാള്‍ 0.35 ശതമാനം അധിക പലിശ ലഭിക്കും. നാഷണല്‍ സേവിംഗ്‌സ് സ്‌കീം പലിശ എല്ലാ ത്രൈമാസത്തിലും പുതുക്കും. 

ഏപ്രില്‍- ജൂണ്‍ പാദത്തില്‍ 7.7 ശതമാനമാണ് നാഷണല്‍ സേവിംഗ്‌സ് സ്‌കീമിന്റെ പലിശ നിരക്ക്. ഇതേ പലിശ നിരക്ക് തുടര്‍ന്നാല്‍ ജൂലായ് ഒന്നിന് പലിശ നിരക്ക് പുതുക്കുമ്പോള്‍ 8.05 ശതമാനം പലിശ ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ട് നല്‍കും.

ബാങ്ക് നിക്ഷേപവുമായുള്ള വ്യത്യാസങ്ങൾ

ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ടിന്റെ 7 വർഷ ലോക് ഇൻ പിരിയഡ് മറ്റ് നിക്ഷേപങ്ങളുമായി നോക്കുമ്പോൾ അല്പം കൂടുതലാണ്. നാഷണൽ സേവിം​ഗ്സ് സർട്ടിഫിക്കറ്റിന് 5 വർഷമാണ് ലോക്-ഇൻ പിരിയഡ്.

ടാക്സ് സേവിം​ഗ് സ്ഥിര നിക്ഷേപമാണെങ്കിൽ 5 വർഷമായിരിക്കും. കാലാവധിക്ക് മുൻപ് പിന്‍വലിക്കാൻ അവസരമില്ല.എന്നാല്‍ മുതിര്‍ന്ന പൗരന്മാര്‍ക്ക് കുറഞ്ഞ ലോക്ക്-ഇന്‍ കാലയളവിന് ശേഷം പിഴയോടെ പണം പിന്‍വലിക്കാം. ബാങ്കിൽ സ്ഥിരനിക്ഷേപങ്ങള്‍ പിഴയോടെ നേരത്തെ പിൻവലിക്കാൻ അവസരമുണ്ട്. 

പലിശയിലെ വ്യത്യാസം

ബാങ്ക് പലിശയേക്കാള്‍ ഉയര്‍ന്ന നിരക്കാണ് ആർബിഐ ഫ്ളോട്ടിം​ഗ് റേറ്റ് സേവിം​ഗ്സ് ബോണ്ട് നൽകുന്നത്. 5 വര്‍ഷത്തെ സ്ഥിര നിക്ഷേപത്തിന് 6.50 ശതമാനമാണ് എസ്ബിഐ നല്‍കുന്ന പലിശ നിരിക്ക. എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക്, ആക്‌സിസ് ബാങ്ക് എന്നിവ 7 ശതമാനം പലിശ 5 വര്‍ഷത്തേക്ക് നല്‍കുന്നു.

പലിശ പേ ഔട്ടിലെ വ്യത്യാസം

ആര്‍ബിഐ ഫ്‌ളോട്ടിംഗ് റേറ്റ് സേവിംഗ്‌സ് ബോണ്ടുകള്‍ അര്‍ധ വാര്‍ഷികമായാണ് പലിശ നൽകുന്നത്. ബോണ്ടുകളുടെ പലിശ നിരക്ക് എല്ലാ വര്‍ഷവും ജനുവരി, ജൂലായ് 1 തീയതികളില്‍ നല്‍കും. ബാങ്കുകളിലെ സ്ഥിര നിക്ഷേപങ്ങള്‍ പ്രതിമാസ, ത്രൈമാസ, അര്‍ധ വാര്‍ഷിക, വാര്‍ഷിക പേഔട്ടുകൾ നൽകുന്നുണ്ട്.