ഹൃദ്രോ​ഗത്തിനും ക്യാൻസറിനും എതിരെ മുൻകരുതൽ; ചികിത്സാ ചെലവ് ഉയരുമ്പോൾ എങ്ങനെ നേരിടണം

മുൻകാലങ്ങളിലേത് പോലെ അപൂർവ രോ​ഗമല്ല ഇന്ന് ക്യാൻസർ. രോ​ഗികളുടെ എണ്ണത്തിൽ കാലത്തിനൊത്ത് വർധനവുണ്ടാകുന്നത്. ഇതുപോലെ തന്നെയാണ് ഹൃദ്രോ​ഗത്തിന്റെ കാര്യത്തിലും. ജീവിത ശൈലികളിലടക്കം വന്ന മാറ്റങ്ങൾ കൂടുതൽ പേരെ ഹൃദ്രോ​ഗികളാക്കി മാറ്റുകയും ചെയ്യുന്നു. രോ​ഗികൾ കൂടുമ്പോഴും ചികിത്സാ ചെലവുകളിൽ ഉയർന്നു നിൽക്കുന്നവയാണ് ഇരു രോ​ഗങ്ങളും. കുടുംബത്തിലൊരാൾക്ക് ഇത്തരം രോ​ഗം വന്നാൽ മാനസിക പ്രയാസത്തിനൊപ്പം കുടുംബത്തിനുണ്ടായ സാമ്പത്തിക ചെലവ് വളരെ വലുതാണ്. 

ചികിത്സാ ചെലവിനുള്ള പണം കണ്ടെത്താൻ സാധിക്കാത്ത സാഹചര്യം രോ​ഗിയുടെ അവസ്ഥയെയും കുടുംബത്തിൻെറ മുന്നോട്ട് പോക്കിനെയും ബാധിക്കും. സാധാരണ ​ഗതിയിൽ ആശുപത്രി ചെലവുകളെ നേരിടേണ്ടി വരുന്ന സാമ്പത്തിക പ്രയാസമുള്ള കാലത്ത് ഇൻഷൂറൻസുകളാണ് കുടുംബത്തിന് സഹായകമാകുന്നത്. എന്നാൽ എല്ലാ മെഡിക്കൽ ഇൻഷൂറൻസുകളും ഹൃദ്രോ​ഗം, ക്യാൻസർ പോലുള്ള രോ​ഗങ്ങൾക്ക് കവറേജ് നൽകുന്നവയല്ല. ഈയൊരു അവസ്ഥയിൽ എങ്ങനെ സാമ്പത്തികമായി എങ്ങനെ സുരക്ഷിതമാകാം എന്ന് നോക്കാം. 

ക്രിട്ടിക്കല്‍ ഇല്‍നൈസ് പോളിസി

ആരോ​ഗ്യ ഇൻഷൂറൻസുകൾ ആശുപത്രി ബില്ലുകളെയാണ് കവർ ചെയ്യുന്നത്. ഇതിനൊപ്പം 30 ലധികം രോ​ഗങ്ങളെ കവർ ചെയ്യുന്ന ക്രിട്ടിക്കൽ ഇൽനെസ് പോളിസി എടുക്കുന്നത് ക്യാൻസർ പോലുള്ള രോ​ഗങ്ങൾക്ക് ​ഗുണകരമാകും. വലിയ ചെലവ് വരുന്ന രോ​ഗങ്ങളുടെ ചികിത്സയ്ക്ക് ഹെല്‍ത്ത് ഇന്‍ഷൂറന്‍സിലെ തുക പോരാതെ വരും. ഹെല്‍ത്ത് ഇന്‍ഷൂറന്‍സ് ആശുപത്രി ബില്ലിന് മാത്രമാണ് ലഭിക്കുക.

ഇവിടെ ക്രിട്ടിക്കൽ ഇൽനൈസ് പോളിസിയെടുക്കുന്നൊരാൾക്ക് രോ​ഗം കണ്ടെത്തുമ്പോൾ തന്നെ എത്ര തുകയ്ക്കാണോ പോളിസി എടുത്തത് അത്രയും തുക ലഭിക്കും. രോ​ഗത്തെ തുടർന്ന് ജോലിയില്‍ നിന്ന് മാറി നില്‍ക്കുക, മറ്റൊരിടത്ത് ചികിത്സയ്ക്കായി മാറേണ്ടി വരിക എന്നീ സാഹചര്യങ്ങളിൽ ക്രിട്ടിക്കൽ ഇൻനെസ് പോളിസി ഉപകാരപ്പെട്ടും. 

സാധാരണ ഇന്‍ഷൂറന്‍സ് പോളിസിയോടൊപ്പം അധിക പ്രീമിയം അടച്ചാണ് ക്രിട്ടിക്കൽ ഇൽനെസ് പോളിസിയെടുക്കേണ്ടത്. വരുമാനം കുറവായത് കൊണ്ടോ പ്രീമിയം തുക കൂടുന്നതിനാലോ ക്രിട്ടിക്കല്‍ ഇല്‍നെസ് പോളിസി തിരഞ്ഞെടുക്കാൻ സാധിക്കാത്തവർക്കുള്ള പോളിസികളാണ് ഹാര്‍ട്ട് ആന്‍ഡ് ക്യാന്‍സര്‍ പോളിസി. 

ഹാര്‍ട്ട് ആന്‍ഡ് ക്യാന്‍സര്‍ പോളിസി

മെഡിക്കല്‍ ചെക്കപ്പില്ലാതെ കുറഞ്ഞ പ്രീമിയത്തില്‍ വാങ്ങിക്കാവുന്ന പോളിസികളാണിവ. രണ്ട് രോ​ഗത്തിനും പ്രത്യേകമായാണ് പോളിസി എടുക്കേണ്ടത്. ഹൃ​ദ്രോ​ഗത്തിന് 25 ലക്ഷം രൂപ വരെയും ക്യാന്‍സറിന് 50 ലക്ഷം രൂപ വരെയും ഇൻഷൂറൻസ് ലഭിക്കും. രോ​ഗം കണ്ടെത്തിയ ഉടനെ രോ​ഗത്തിന്റെ തുടക്ക ഘട്ടമാണെങ്കിൽ പോളിസി തുകയുടെ 25 ശതമാനം ലഭിക്കും.

10 ലക്ഷം രൂപയ്ക്ക് ക്യാൻസർ ഇൻഷൂറൻസ് എടുത്തൊരാൾക്ക് തുടക്കത്തിൽ 2.5 ലക്ഷം രൂപ ലഭിക്കും. രോ​ഗം ​ഗുരുതരാവസ്ഥയിലേക്ക് പോവുകയാണെങ്കില്‍ അത് അനുസരിച്ച് ബാക്കി തുകയും കൂടെ ലഭിക്കും. ബാക്കി വരുന്ന 75 ശതമാനം ​ഗുരുതരാവസ്ഥയിലുള്ള ചികിത്സയ്ക്കാണ് ലഭിക്കുക. 

20 വർഷത്തോളം കാലയളവുള്ള പോളിസിയാണിത്. 5,000-10,000 രൂപവരെ വര്‍ഷിക പ്രീമിയം ഉള്ളവയാണ് ഈ പോളിസികൾ. പ്രായം കുറയുന്നതിന് അനുസരിച്ച് പോളിസി തുകയിലും കുറവ് വരാം. 50 വയസിന് താഴെയുള്ളവര്‍ക്ക് പോളിസി എടുക്കാൻ സാധിക്കും മാസത്തില്‍ 500, 1000 രൂപ മിച്ചം പിടിക്കുന്നവർക്ക് ആരോ​​ഗ്യ പ്രശ്നങ്ങളുണ്ടാകുമ്പോൾ സാമ്പത്തിക സഹായകമാകും.

വർധിച്ചുവരുന്ന ജീവിതശൈലീ രോഗങ്ങളും ഇതിനൊപ്പം ഉയരുന്ന ആശുപത്രി ചെലവുകളും നേരിടാൻ ആരോ​ഗ്യ ഇൻഷൂറൻസ് അനിവാര്യമാണ്. ഇതിൽ ഹൃദയ, കാൻസർ ഇൻഷുറൻസ് പോളിസികൾക്ക് പ്രത്യേത പരിഗണന നൽകാം. ആരോ​ഗ്യ ഇൻഷൂറൻസ് പോളിസികൾക്ക് ആദായനികുതി നിയമത്തിലെ സെക്ഷൻ 80D പ്രകാരം നികുതി ആനുകൂല്യവും ലഭിക്കും.