ഓഹരിയിൽ നിക്ഷേപമുണ്ടെങ്കിൽ ബാങ്ക് ലോൺ റെഡി; എങ്ങനെ എന്നറിയാം

ഇന്നത്തെ കാലത്ത് ബാങ്ക് വായ്പ കിട്ടാൻ ക്രെഡിറ്റ് സ്‌കോർ അത്യാവശ്യമാണ്. വ്യക്തിഗത വായ്പകളാണെങ്കിൽ പറയുകയും വേണ്ട. വായ്പ വേണ്ട നിങ്ങൾക്ക് ഓഹരി വിപണിയിൽ നിക്ഷേപമുണ്ടെങ്കിൽ ക്രെഡിറ്റ് സ്‌കോർ നോക്കേണ്ട ബാങ്ക് തരും വായ്പ. കയ്യിലുള്ള ഓഹരി ഈടുവച്ച് വായ്പയെടുക്കാൻ സാധിക്കും. അതായത് ഓഹരിയിലെ നിക്ഷേപം പിൻവലിക്കാതെ തന്നെ ആവശ്യമായ തുക കണ്ടെത്താൻ സാധിക്കും.

ഓഹരിക്ക് മേൽ വായ്പ

സ്വർണം പണയം വെയ്ക്കുന്നത് പോലെ ഈട് നൽകിയുള്ളൊരു സുരക്ഷിത വായ്പയാണ് ഓഹരിക്ക് മുകളിൽ ലഭിക്കുന്നത്. കയ്യിലുള്ള ഓഹരി ഈടായി സ്വീകരിച്ച് ബാങ്ക് വായ്പ നൽകും. ഇതിന് പലിശ ഈടാക്കും. മുതലും പലിശയും അടച്ചു തീർക്കുന്ന സമയത്ത് ബാങ്ക് ഓഹരികൾ തിരികെ നൽകും.

ഓഹരി ബാങ്കിൽ ഈടിലാണെങ്കിലും തുടർന്നും ലാഭവിഹിതം ഓഹരി ഉടമയ്ക്ക് ലഭിക്കും. കമ്പനി ഓഹരി വിഭജനമോ ബോണസ് ഓഹരിയോ പ്രഖ്യാപിച്ചാലും ഇതിന്റെ നേട്ടങ്ങളും ഓഹരി ഉടമയ്ക്ക് ലഭിക്കും. ഓഹരി പണയപ്പെടുത്തിയാലും ഉടമസ്ഥാവകാശം നിങ്ങൾക്ക് തന്നെയാകും. കൈമാറ്റം ചെയ്യാൻ സാധിക്കില്ലെന്ന് മാത്രം.

എത്ര തുക വായ്പ ലഭിക്കും

ഓഹരിയുടെ നിലവിലെ വിപണിമൂല്യത്തിന്റെ 50 ശതമാനമാണ് റിസർവ് ബാങ്ക് ഓഫ് ഇന്ത്യ ലോൺ ടു വാല്യു റേഷ്യോ ആയി നിശ്ചയിച്ചിരിക്കുന്നത്. നിലവിൽ കയ്യിലുള്ള ഓഹരിയുടെ വിപണി മൂല്യം 20 ലക്ഷം രൂപയാണെങ്കിൽ 10 ലക്ഷം രൂപ വായ്പയായി ലഭിക്കും. എൻഎസ്ഇയിലെ ഗ്രൂപ്പ് വൺ ഓഹരികൾക്ക് മാത്രമാണ് ബാങ്കുകൾ വായ്പ അനുവദിക്കുകയുള്ളൂ. കഴിഞ്ഞ ആരു മാസത്തിനിടെ 80 ശതമാനം ദിവസങ്ങളിലും വ്യാപാരം നടന്ന ഓഹരിയാകണം ഇവ. ഈയിടെ ലോൺ ടു വാല്യു റേഷ്യോ 60 ശതമാനമാക്കി ഉയർത്താൻ ആർബിഐ നിർദ്ദേശമുണ്ടായിരുന്നു. നിക്ഷേപകന് പരമാവധി ലഭിക്കുന്ന വായ്പ 10 കോടി രൂപയാക്കി ഉയർത്താനും ആർബിഐ നിർദ്ദേശമുണ്ട്.

ഓഹരി ഇടിഞ്ഞാൽ

ഈട് നൽകിയുള്ള വായ്പയാണെങ്കിലും മറ്റു സമാന വായ്പകളിൽ നിന്നും വ്യത്യസ്തമായി ഈട് നൽകിയ ഓഹരിയുടെ മൂല്യം കുറയാൻ സാധ്യതയുണ്ട്. ഈ സമയത്ത് വരുന്ന നഷ്ടം നികത്തേണ്ടത് വായ്പ എടുത്തയാളുടെ ഉത്തരവാദിത്വമാണ്. ഉദാഹരണമായി 20 ലക്ഷത്തിന്റെ ഓഹരി ഈട് നൽകി 10 ലക്ഷം രൂപ വായ്പയെടുത്തയാളുടെ ഓഹരി 30 ശതമാനം ഇടിഞ്ഞാൽ ലോൺ ടു വാല്യു റേഷ്യോ ഉയരും. ഇവിടെ ഓഹരിയുടെ മൂല്യം 20 ലക്ഷത്തിൽ നിന്നും 14 ലക്ഷമായി കുറയും. ഇവിടെ ആറു ലക്ഷത്തിന്റെ നഷ്ടം വന്നു. ഇത് മാർജിൻ ഉപയോഗിച്ച് അഡ്ജസ്റ്റ് ചെയ്യും. ബാക്കി തുക വായ്പയെടുത്തയാൾ പണമായി നൽകണം. ഇല്ലെങ്കിൽ ഈടായി നൽകിയ ഓഹരി വിറ്റ് തുക കണ്ടെത്താൻ ബാങ്കിന് അനുവാദമുണ്ട്.