അക്കൗണ്ടിൽ 1 ലക്ഷം രൂപയുണ്ടെങ്കിൽ 7,000 രൂപ പലിശ നേടാം; മികച്ച പലിശയുള്ള സേവിം​ഗ്സ് അക്കൗണ്ടുകളിതാ

പെട്ടന്നുള്ള ആവശ്യത്തിന് ഉപയോ​ഗിക്കേണ്ട പണം, എമർജൻസി ഫണ്ടുകൾ സൂക്ഷിക്കാൻ പലരും ഉപയോ​ഗിക്കുന്നത് സേവിം​ഗ്സ് അക്കൗണ്ടുകളാണ്. ലിക്വിഡിറ്റി ആവശ്യം മാത്ര പരി​ഗണിച്ച് നിക്ഷേപിക്കുന്നതിനാൽ പലരും സേവിം​ഗ്സ് അക്കൗണ്ടുകളുടെ പലിശ നിരക്ക് പരി​ഗണിക്കാറില്ല.

സേവിം​ഗ്സ് അക്കൗണ്ടുകളുടെ പലിശ നിരക്ക് അക്കൗണ്ടിലെ ബാലൻസിനെ ആശ്രയിച്ചാണ് നൽകുന്നത്. ചില ബാങ്കുകൾ സേവിംഗ്സ് അക്കൗണ്ട് ബാലൻസിന് ഇൻക്രിമെന്റൽ അടിസ്ഥാനത്തിലും പലിശ നൽകുന്നു.

പൊതുമേഖലാ ബാങ്കായ എസ്ബിഐ 2.70 ശതമാനം പലിശയാണ് സേവിം​ഗ്സ് അക്കൗണ്ടിന് നൽകുന്നത്. 10 കോടി രൂപയ്ക്ക് കൂടുതൽ ബാലൻസുള്ള അക്കൗണ്ടിൽ 3 ശതമാനം പലിശ നൽകും.

സ്മോൾ ഫിനാൻസ് ബാങ്കുകളിൽ 7 ശതമാനം മുതൽ 7.50 ശതമാനം വരെ പലിശ നൽകുന്ന ബാങ്കുകളുണ്ട്. ഇവയെ പരിചയപ്പെടാം. 

ഉജ്ജീവന്‍ സ്‌മോള്‍ ഫിനാന്‍സ് ബാങ്ക്

സേവിംഗ്‌സ് അക്കൗണ്ടിന് 3.50 ശതമാനം മുതല്‍ 7.50 ശതമാനം വരെ പലിശ നല്‍കുന്നുണ്ട്. സേവിംഗ്‌സ് അക്കൗണ്ടില്‍ 1 ലക്ഷം രൂപ വെരയുള്ള ബാലന്‍സിന് 3.50 ശതമാനം പലിശ ലഭിക്കും.

1 ലക്ഷം രൂപ മുതല്‍ 5 ലക്ഷം രൂപ വരെ അക്കൗണ്ടിലുള്ളവര്‍ക്ക് 6 ശതമാനം പലിശ ലഭിക്കും. 5 ലക്ഷം രൂപ മുതല്‍ 25 കോടി രൂപ വരെ 7 ശതമാനവും 25 കോടിക്ക് മുകളില്‍ 7.50 ശതമാനം പലിശയും ലഭിക്കും.

ദിവസത്തിലെ ബാലന്‍സ് അടിസ്ഥാനമാക്കിയാണ് പലിശ കണക്കാക്കുന്നത്. ത്രൈമാസത്തിലാണ് പലിശ അനുവദിക്കുക. 1.20 ലക്ഷം രൂപ അക്കൗണ്ടിലുള്ള വ്യക്തിക്ക് 1 ലക്ഷത്തിന് 3.50 ശതമാനം പലിശയും 20,000 രൂപയ്ക്ക് 6 ശതമാനം പലിശയും ലഭിക്കും. 

ഇക്വിറ്റാസ് സ്‌മോള്‍ ഫിനാന്‍സ് ബാങ്ക്

1 ലക്ഷം രൂപ വരെയുള്ള ബാലന്‍സിന് 3.50 ശതമാനം പലിശയാണ് ഇക്വിറ്റാസ് സ്മോൾ ഫിനാൻസ് ബാങ്ക് നൽകുന്നത്. 1 ലക്ഷം രൂപയ്ക്ക് മുകളിൽ 5 ലക്ഷം രൂപ വരെയുള്ള സേവിംഗ്‌സ് അക്കൗണ്ട് ബാലന്‍സിന് 7 ശതമാനം പലിശ ലഭിക്കും.

ദിവസത്തിലെ ക്ലോസിംഗ് ബാലന്‍സ് അനുസരിച്ചാണ് പലിശ നിരക്ക് കണക്കാക്കുന്നത്. ത്രൈമാസത്തില്‍ പലിശ നിരക്ക് സേവിംഗ്‌സ് അക്കൗണ്ടില്‍ ക്രെഡിറ്റ് ചെയ്യും.

ജനസ്‌മോള്‍ ഫിനാന്‍സ് ബാങ്ക്

1 ലക്ഷം വരെയുള്ള സേവിംഗ്‌സ് അക്കൗണ്ട് ബാലന്‍സിന് ജനസ്‌മോള്‍ ഫിനാന്‍സ് ബാങ്കില്‍ നിന്ന് 3.50 ശതമാനം പലിശ ലഭിക്കും. ബാലന്‍സ് 1 ലക്ഷത്തിനും 10 ലക്ഷത്തിനും ഇടയിലാണെങ്കില്‍ 7 ശതമാനം പലിശ ലഭിക്കും.

10 ലക്ഷത്തിന് മുകളില്‍ 10 കോടി വരെ 7.25 ശതമാനം പലിശ നേടാം. 50 കോടിക്ക് മുകളിലാണെങ്കില്‍ 6.50 ശതമാനം പലിശയും ലഭിക്കും. 

യൂണിറ്റി സ്‌മോള്‍ ഫിനാന്‍സ് ബാങ്ക്

യൂണിറ്റി സ്‌മോള്‍ ഫിനാന്‍സ് ബാങ്കില്‍ 1 ലക്ഷം രൂപ വരെയുള്ള ബാലന്‍സിന് ലഭിക്കുന്ന പലിശ നിരക്ക് 6 ശതമാനമാണ്. 1 ലക്ഷത്തിന് മുകളിലാണ് ബാലന്‍സെങ്കില്‍ 7 ശതമാനം പലിശ ലഭിക്കും.

ശിവാലിക് സ്‌മോള്‍ ഫിനാന്‍സ് ബാങ്ക്

ശിവാലിക് സ്‌മോള്‍ ഫിനാന്‍സ് ബാങ്കിൽ സേവിം​ഗ്സ് അക്കൗണ്ട് പലിശ നിരക്ക് 3.50 ശതമാനം മുതല്‍ 6 ശതമാന വരെയാണ്. 10 ലക്ഷം രൂപ വരെ 3.50 ശതമാനം പലിശ ലഭിക്കും.

10 ലക്ഷത്തിനും 50 ലക്ഷത്തിനും ഇടയിലുള്ള സേവിംഗ്‌സ് അക്കൗണ്ട് ബാലന്‍സിന് 4.50 ശതമാനം പലിശ ലഭിക്കും. 1 കോടിക്ക് മുകളിലാണ് ബാലൻസെങ്കിൽ 6 ശതമാനം പലിശ നേടാം.