റെക്കോർഡ് വണ്ടിയിൽ നിന്നും ഇറങ്ങാതെ സ്വർണം, വില വീണ്ടും കൂടി, 1 പവൻ വാങ്ങിയാൽ കീശ കീറും

ഓരോ ദിവസം കഴിയുമ്പോഴും ഉയരങ്ങളിൽ നിന്നും ഉയരങ്ങളിലേക്ക് പറക്കുകയാണ് സംസ്ഥാനത്തെ സ്വർണവില. കഴിഞ്ഞ ഏഴ് ദിവസം കൊണ്ട് 1,160 രൂപയാണ് ഒരു പവൻ സ്വർണത്തിന് കൂടിയത്. വരും ദിവസങ്ങളിലും മുകളിലേക്ക് ഉയർന്നാൽ പവന്‍റെ വില 60,000 കടക്കുമെന്ന കാര്യം ഉറപ്പാണ്. അതോടെ സ്വർണം എന്നത് സാധാരണക്കാരന് വെറും സ്വപ്നം മാത്രമാകും.

ഇന്നും റെക്കോർഡ്

പവന് 57280 രൂപ എന്ന നിരക്കിലായിരുന്നു സംസ്ഥാനത്ത് ഇന്നലെ സ്വർണവ്യാപാരം നടന്നത്. എന്നാൽ 24 മണിക്കൂർ തികയുന്നതിന് മുൻപേ സ്വർണവിലയിൽ 640 രൂപയാണ് കൂടിയത്. അതോടെ പവന്‍റെ വില 57,920 രൂപയിലേക്ക് കുതിച്ചു. 7,240 രൂപയാണ് ഒരു ഗ്രാം സ്വർണത്തിന്‍റെ വില. കേരളത്തിന്‍റെ ചരിത്രത്തിലെ ഏറ്റവും ഉയർന്ന സ്വർണവിലയാണ് ഇന്ന് രേഖപ്പെടുത്തിയത്.

1 പവൻ വാങ്ങാൻ

സ്വർണാഭരണം വാങ്ങുമ്പോൾ പവന്റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 62,000 രൂപ നൽകേണ്ടി വരും.

വില കത്തിക്കയറും

സ്വര്‍ണവില ഈ വര്‍ഷം അവസാനത്തോടെ പുതിയ റെക്കോര്‍ഡിലേക്കെത്തുമെന്നാണ് റിപ്പോര്‍ട്ടുകള്‍. ഡിസംബറോടെ സ്വര്‍ണം ഗ്രാമിന് 7550 മുതല്‍ 8000 രൂപ വരെ വിലയെത്തുമെന്നാണ് അനലിസ്റ്റുകളുടെ പ്രതീക്ഷ. ഇതുവരെയുള്ള കണക്കുകള്‍ പ്രകാരം കഴിഞ്ഞ വര്‍ഷത്തെ അപേക്ഷിച്ച് സ്വര്‍ണ വിലയില്‍ ഈ വര്‍ഷം 29 ശതമാനത്തിന്റെ വര്‍ധനയുണ്ടായിട്ടുണ്ട്. കഴിഞ്ഞ വര്‍ഷം സ്വര്‍ണത്തിന് 20 ശതമാനത്തിന്റെ വര്‍ധനയാണ് രേഖപ്പെടുത്തിയത്. ഈ വര്‍ഷം ഡിസംബറോടെ സ്വര്‍ണവില ഗ്രാമിന് 7550 രൂപയിലേക്കെത്തുമെന്നാണ് ആഗോള ഏജന്‍സിയായ ഫിച്ച് സൊല്യൂഷന്‍ വിലയിരുത്തുന്നത്.

ഗോള്‍ഡ് അഡ്വാന്‍സ് ബുക്കിംഗ്

സ്വർണവിലയിലെ ഭാവിയിൽ മുകളിലേക്ക് ഉയരാൻ തന്നെയാണ് സാധ്യത. അതുകാണ്ടു തന്നെ ഭാവിയിൽ ഉയർന്ന സ്വർണം ആവശ്യമുള്ളവർ ഗോള്‍ഡ് അഡ്വാന്‍സ് ബുക്കിംഗ് നടത്തുന്നതാണ് നല്ലത്. സ്വര്‍ണവില ഉയരുന്ന കാലത്ത് അധിക ഭാരം ഏറ്റെടുക്കാതെ സ്വര്‍ണം വാങ്ങാന്‍സാധാരണക്കാരെ സഹായിക്കുന്നൊരു മാര്‍ഗമാണ് ഗോള്‍ഡ് അഡ്വാന്‍സ് ബുക്കിംഗ് പ്ലാന്‍. വില ഇനിയും ഉയരുമെന്ന കണക്കുകൂട്ടലിൽ നിലവിലുള്ള വിലയില്‍സ്വര്‍ണം ബുക്ക് ചെയ്യാനുള്ള അവസരമാണ് അഡ്വാന്‍സ് ബുക്കിംഗിലൂടെ ലഭിക്കുന്നത്.

സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്‍റെ പ്രത്യേകത.

ആഗോള സ്വർണവില

ആഗോള സ്വർണ്ണ വില 16.30 ഡോളർ (0.60%) ഉയർന്ന് 2,710.01 ഡോളറിലാണ് വ്യാപാരം നടത്തുന്നത്. കഴിഞ്ഞ 30 ദിവസത്തിൽ ആഗോള വിലയിൽ 106.41 ഡോളറുകളുടെ (4.11%) വലിയ വർധനയാണ് ഉണ്ടായിരിക്കുന്നത്. നിലവിൽ, യു.എസിലെ മാന്ദ്യഭയത്തെ തുടർന്ന് ഫെഡ് പലിശ നിരക്കുകൾ വർധിപ്പിച്ചേക്കുമെന്ന സൂചന സ്വർണ്ണ വില വർധിക്കാനുള്ള ഒരു പ്രധാന ഘടകമാണ്.

വിലയിലെ കുതിപ്പിന് കാരണം

യു.എസിലെ മാന്ദ്യഭയത്തെ തുടർന്ന് ഫെഡ് പലിശ നിരക്കുകൾ വർധിപ്പിച്ചേക്കുമെന്ന സൂചന സ്വർണ്ണ വില വർധിക്കാനുള്ള ഒരു പ്രധാന ഘടകമാണ്. പലിശ കുറഞ്ഞാൽ ട്രഷറി വരുമാനങ്ങൾ കുറയാനും, ഡോളറിന്റെ മൂല്യം താഴാനും വൻകിട നിക്ഷേപകർ സ്വർണ്ണത്തിലേക്ക് ചുവടു മാറാനും കാരണമാകും. യു.എസിലെ പ്രസി‍ഡന്റ് തെരഞ്ഞെടുപ്പ് അടുക്കുന്നതും സുരക്ഷിത നിക്ഷേപം എന്ന നിലയിൽ സ്വർണ്ണത്തിന്റെ ഡിമാൻഡ് വർധിപ്പിക്കുന്നു. ആഗോള തലത്തിൽ സംഘർഷ സാഹചര്യങ്ങൾ വർധിക്കുന്നതാണ് സ്വർണ്ണ വിലയ്ക്ക് കരുത്തേകുന്ന മറ്റൊരു ഘടകം.