ഹൃദയം തകർത്ത് സ്വർണം, പവന്‍റെ വില പുതിയ റെക്കോർഡിൽ, ഒരു പവൻ വാങ്ങാൻ 60,000 രൂപ നൽകണം

സംസ്ഥാനത്തെ സ്വർണവില കത്തിപ്പടരുകയാണ്. ഓരോ ദിവസം കഴിയുമ്പോഴും പുതിയ ഉയരങ്ങൾ താണ്ടുകയാണ് വില. അഞ്ച് ദിവസം കൊണ്ട് 1400 രൂപയാണ് ഒരു പവൻ സ്വർണത്തിന് കൂടിയത്. വരും ദിവസങ്ങളിലും വില മുകളിലേക്ക് ഉയരുമോ എന്ന ആശങ്കയിലാണ് ആഭരണപ്രേമികൾ.

പുതിയ റെക്കോർഡ്

പവന് 56,000 രൂപ എന്ന നിരക്കിലായിരുന്നു ഇന്നലെ സംസ്ഥാനത്ത് സ്വർണവ്യാപാരം നടന്നത്. എന്നാൽ 24 മണിക്കൂർ തികയുന്നതിന് മുൻപേ പവന് 480 രൂപയും ഗ്രാമിന് 60 രൂപയും കൂടി. അതോടെ പവന്‍റെ വില 56,480 രൂപയും ഗ്രാമിന്‍റെ വില 7060 രൂപയിലേക്കും ഉയർന്നു. സംസ്ഥാനത്തിന്റെ ചരിത്രത്തിലെ പുതിയ സർവ്വകാല ഉയരമാണ് ഇന്ന് സ്വർണവില കുറിച്ചത്.

കുതിപ്പിന് കാരണം

രാജ്യാന്തര വിലയിലുണ്ടാകുന്ന വർധനവാണ് കേരളത്തിലെ വിലയിലും പ്രതിഫലിക്കുന്നത്. നിലവിൽ യുഎസ് ഫെഡ് പലിശ കുറച്ചതും, പശ്ചിമേഷ്യയിൽ സംഘർഷ സാഹചര്യങ്ങൾ വർധിക്കുന്നതുമാണ് സ്വർണ്ണ വിലയിൽ കുതിപ്പുണ്ടാക്കുന്നത്. ഈ മാസത്തെ താഴ്ന്ന നിരക്കിലേക്ക് സ്വർണ്ണം എത്തിയത് സെപ്തംബർ 2 മുതൽ 5 വരെയുള്ള തിയ്യതികളിലാണ്. ഈ ദിവസങ്ങളിൽ പവന് 53,360 രൂപയും, ഗ്രാമിന് 6,670 രൂപയുമായിരുന്നു വിലനിലവാരം.

ആഗോള സ്വർണവില

ബുധനാഴ്ച്ച രാവിലെ, രാജ്യാന്തര സ്വർണ്ണ വ്യാപാരം നേട്ടത്തിലാണ് വ്യാപാരം നടത്തുന്നത്. ട്രോയ് ഔൺസിന് 2.60 ഡോളർ (0.09%) ഉയർന്ന് 2,660.58 ഡോളർ എന്നതാണ് നിരക്ക്.

1 പവൻ വാങ്ങാൻ

സ്വർണവില ഉയർന്ന സാഹചര്യത്തിൽ 1 പവൻ സ്വാർണാഭരണം വാങ്ങാൻ എത്ര പണം നൽകേണ്ടി വരും എന്ന് പരിശോധിക്കാം. സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 61,000 രൂപ നൽകേണ്ടി വരും.

ഗോള്‍ഡ് അഡ്വാന്‍സ് ബുക്കിംഗ്

സ്വര്‍ണവില ഉയരുന്ന കാലത്ത് അധിക ഭാരം ഏറ്റെടുക്കാതെ സ്വര്‍ണം വാങ്ങാന്‍സാധാരണക്കാരെ സഹായിക്കുന്നൊരു മാര്‍ഗമാണ് ഗോള്‍ഡ് അഡ്വാന്‍സ് ബുക്കിംഗ് പ്ലാന്‍. വില ഇനിയും ഉയരുമെന്ന കണക്കുകൂട്ടലിൽ നിലവിലുള്ള വിലയില്‍സ്വര്‍ണം ബുക്ക് ചെയ്യാനുള്ള അവസരമാണ് അഡ്വാന്‍സ് ബുക്കിംഗിലൂടെ ലഭിക്കുന്നത്.

സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്റെ പ്രത്യേകത.

അത്യാവശ്യത്തിന് പണം നേടാം

സ്വർണവില റെക്കോർഡ് ഉയരം കുറിച്ച സാഹചര്യത്തിൽ സ്വർണപ്പണയത്തിലൂടെ ഉയർന്ന തുക കണ്ടെത്താൻ സാധിക്കും. പണയമായി നൽകുന്ന സ്വർണത്തിന്‍റെ മൂല്യത്തിന്‍റെ 75% വരെ വായ്പയെടുക്കാം. ചില വായ്പാദാതാക്കൾ പരമാവധി തുക വായ്പയായി നൽകാറുണ്ട്. സ്വർണ്ണ വായ്പ പലിശ നിരക്കുകൾ ഓരോ ബാങ്കിനും വ്യത്യസ്തമാണ്. സ്വർണ്ണ വായ്പകൾ നൽകുന്നതിന് പല ബാങ്കുകളും ഒരു പ്രോസസ്സിംഗ് ഫീ ഈടാക്കുന്നു എന്നത് ഓർത്തിരിക്കേണ്ടത് പ്രധാനമാണ്.

പെട്ടെന്ന് പണം ലഭിക്കും എന്നതു മാത്രമല്ല, കടം വാങ്ങുന്നവർക്ക് സുരക്ഷിതത്വബോധവും നൽകാൻ ഗോൾഡ് ലോണുകൾക്ക് സാധിക്കുന്നു. സാമ്പത്തിക പ്രതിസന്ധികൾക്കിടയിലും വ്യക്തികൾക്ക് ഒരു സ്ഥിരമായ വരുമാന മാർ​ഗം ഉണ്ടെങ്കിലും സ്വർണ്ണ വായ്പകളുടെ ആവശ്യം ഒരിക്കലും ഇല്ലാതെ വരുന്നില്ല. ഇന്നത്തെ സാമ്പത്തിക വ്യവസ്ഥയിൽ സ്വർണ്ണ വായ്പകൾ വഹിക്കുന്ന പങ്ക് നിർണായകമാണ്.